ហ្ស៊កដានីបានប្តេជ្ញាធ្វើអ្វីៗគ្រប់បែបយ៉ាងដើម្បីរំដោះចំណាប់ខ្មំាងរបស់ខ្លួនពីកណ្តាប់ដៃអង្គការរដ្ឋអ៊ីស្លាម
មួយថ្ងៃក្រោយពីពួកជីហាតរបស់អង្គការរដ្ឋអ៊ីស្លាមបានសម្លាប់ចំណាប់ខ្មំាងជនជាតិជប៉ុនម្នាក់ទៀតឈ្មោះ Kenji Goto មក រដ្ឋាភិបាលនៃប្រទេសហ្ស៊កដានីបានប្តេជ្ញាចិត្តនៅថ្ងៃអាទិត្យ ទី១ កុម្ភៈម្សិលមិញថា នឹងធ្វើអ្វីៗគ្រប់បែបយ៉ាងទំាងអស់ដែលអាចធ្វើបានដើម្បីរំដោះចំណាប់ខ្មំាងរបស់ខ្លួនម្នាក់ជាអ្នកបើកយន្តហោះចម្បំាងឈ្មោះ Maaz al-Kassasbeh ពីកណ្តាប់ដៃអង្គការរដ្ឋអ៊ីស្លាម។ ទន្ទឹមគ្នានេះ ទីក្រុងអាម៉ានក៏បានផ្តន្ទាទោសលើទង្វើសម្លាប់ចំណាប់ខ្មំាងជប៉ុនទី២ ពីពួកជីហាតកាលពីថ្ងៃសៅរិ៍ ទី៣១ មករាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
ការប្តេជ្ញាចិត្តរបស់ហ្ស៊កដានីក្នុងការរំដោះចំណាប់ខ្មំាងខ្លួនពីកណ្តាប់ដៃពួកជីហាតបានធ្វើឡើងតាមរយៈអ្នកនំាពាក្យរបស់រដ្ឋាភិបាលទីក្រុងអាម៉ាន។ អ្នកនំាពាក្យរូបនោះបានប្រកាសធានាថា រដ្ឋាភិបាលនឹងធ្វើអ្វីៗគ្រប់បែបយ៉ាងទំាងអស់ដើម្បីជួយជីវិត និងរំដោះអ្នកបើកយន្តហោះចម្បំាងខ្លួនឈ្មោះ Maaz al-Kassasbeh និងបញ្ជាក់ថា ហ្ស៊កដានីក៏ធ្លាប់បានប្រឹងប្រែងយ៉ាងសកម្មជាមួយរដ្ឋាភិបាលជប៉ុនក្នុងការជួយរំដោះចំណាប់ខ្មំាងជប៉ុន Kenji Goto ដែរ តែនៅទីបំផុត ត្រូវបានពួកជីហាតសម្លាប់ដោយកាត់ក្បាលកាលពីថ្ងៃសៅរិ៍ ទី៣១ មករាកន្លងទៅ។ នៅក្នុងកិច្ចសន្ទនាតាមទូរស័ព្ទជាមួយលោកនាយករដ្ឋមន្រ្តីជប៉ុនស្ហ៊ីនហ្សូ អាបេ មហាក្សត្រហ្ស៊កដានីអាប់ដាឡា ទី២ បានផ្តន្តាទោសលើទង្វើសម្លាប់ចំណាប់ខ្មំាងជប៉ុនថា ជាទង្វើឧក្រិដ្ឋ និងកំសាកដែលគ្មានជាប់ទាក់ទងជាមួយនឹងសាសនាអ៊ីស្លាម ឬមួយក៏ច្បាប់អ៊ីស្លាមទេ។
ទន្ទឹមគ្នានេះ មហាក្សត្រហ្ស៊កដានីក៏បានបញ្ជាក់ពីការចូលរួមចំណែករបស់ប្រជាជនហ្ស៊កដានីគ្រប់រូបដើម្បីជួយស្រោចស្រង់ និងរំដោះជីវិតអ្នកបើកយន្តហោះចម្បំាង Maaz al-Kassasbeh ព្រមទំាងអំពាវនាវឲ្យមានសាមគ្គីភាពរបស់អន្តរជាតិក្នុងការប្រឈមមុខទល់នឹងភេរវនិយម និងពួកជ្រុលនិយម។ ចំណែកឱពុករបស់ចំណាប់ខ្មំាង Maaz al-Kassasbeh បានថ្លែងចូលរួមរំលែកទុកជាមួយក្រុមគ្រួសារសពចំណាប់ខ្មំាងជប៉ុន Kenji Goto ដោយសង្ឃឹមថា កូនប្រុសរបស់លោកនៅមានជីវិត និងមិនត្រូវពួកជីហាតកាត់ក្បាលទេ។ គួររម្លឹកជូនថា Maaz al Kassasbeh ត្រូវបានពួកជីហាតចាប់ជាចំណាប់ខ្មំាងកាលពីដំណាច់ខែធ្នូ ឆ្នំា ២០១៤ បន្ទាប់ពីយន្តហោះចម្បំាង F១៦ របស់ខ្លួនបានជួបគ្រោះថ្នាក់ក្នុងប្រទេសស៊ីរី។
កន្លងមក អង្គការរដ្ឋអ៊ីស្លាមបានទាមទារឲ្យរដ្ឋាភិបាលហ្ស៊កដានីដោះលែងស្ត្រីជីហាតម្នាក់ជនជាតិអ៊ីរ៉ាក់ឈ្មោះ Sajida Al-Rishawi ជាថ្នូរនឹងការដោះលែង Maaz al-Kassasbeh។ តែតំាងពីប៉ុន្មានថ្ងៃកន្លងទៅ ទីក្រុងអាម៉ានបានទាមទារភស្តុតាងមួយចំនួនដែលអាចបញ្ជាក់ថា អ្នកបើកបរយន្តហោះរូបនោះនៅមានជីវិត មុននឹងផ្តើមដោះលែងស្ត្រីជីហាត Sajida Al-Rishawi។ រូប Rishawi ដែលត្រូវបានតុលាការហ្ស៊កដានីកាត់ទោសប្រហារជីវិតពីបទបានចូលរួមនៅក្នុងអំពើភេរវកម្មសម្លាប់មនុស្ស ៦០នាក់នៅហ្ស៊កដានីកាលពីឆ្នំា ២០០៥។
សូមរម្លឹកជូនថា ពីដំបូង អង្គការរដ្ឋអ៊ីស្លាមបានដាក់ឱសានវាទត្រឹមថ្ងៃព្រហស្បតិ៍ ទី២២ មករាកន្លងទៅថា ពួកគេនឹងសម្លាប់ Maaz al-Kassasbeh បើហ្ស៊កដានីមិនព្រមដោះលែងស្ត្រីជីហាត Sajida Al-Rishawi ជាថ្នូរនឹងការដោះលែងចំណាប់ខ្មំាងជប៉ុន Kenji Goto នោះទេ។ តែទីបំផុត ពួកជ្រុលនិយមបែរជាសម្លាប់ Kenji Goto ទៅវិញ ដោយគេមិនដឹងថា តើ Maaz al-Kassasbeh នៅមានជីវិត ឬអត់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ