ពួកជីហាតរដ្ឋអ៊ីស្លាមបាញ់ទំលាក់យន្តហោះចម្បាំងជាលើកទីមួយ
ពួកឧទ្ទាមជីហាតរដ្ឋអ៊ីស្លាម ដែលកំពុងតែធ្វើការប្រយុទ្ធនៅអ៊ីរ៉ាក់ និងស៊ីរី ទើបបានបាញ់ទំលាក់យន្តហោះចម្បាំងរបស់ទាហានអាកាសហ្សកដានី ហើយបានចាប់ទុក ជាចំណាប់ខ្មាំង អ្នកបើកយន្តហោះម្នាក់ ដែលនៅរស់រានមានជិវិត ពីការធ្លាក់យន្តហោះ។ នេះជាលើកទីមួយហើយ ដែលក្រុមអ៊ីស្លាមជីហាត បានប្រើកាំភ្លើងមីស៊ីល បាញ់កម្ទេចយន្តហោះ។ អំណេះតទៅ ការវាយប្រហារ តាមផ្លូវអាកាស របស់ក្រុមសម្ព័ន្ធមិត្តអាមេរិក ទៅលើពួកជីហាត អាចនឹងជួបការលំបាក ដោយសារតែពួកនេះ មានបំពាក់គ្រាប់មីស៊ីលបាញ់យន្តហោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
អ្នកនាំពាក្យកងទ័ពរបស់ប្រទេសហ្សកដានី បានផ្តល់ព័ត៌មានជាផ្លូវការថា ពិតជាមានយន្តហោះកងទ័ពខ្លួន បានត្រូវគ្រាប់មីស៊ីល របស់ពួកជីហាតប្រាកដមែន។ ហេតុការណ៍នេះបានកើតឡើង ក្នុងពេលដែលកងទ័ពអាកាសហ្សកដានី បានចេញធ្វើបេសកកម្ម នៅខាងលើតំបន់ រ៉ាកា ក្នុងទឹកដីស៊ីរី។
ក្រោយការផ្ទុះ យន្តហោះបានបែកធ្លាក់ទៅដី ហើយមួយចំណែកបានធ្លាក់ទៅក្នុងទឹកបឹង ដែលធ្វើឲ្យអ្នកបើកយន្តហោះម្នាក់ នៅរស់រានមានជីវិត។ ពួកជីហាតអ៊ីស្លាមបានចាប់ អ្នកបើកយន្តហោះនោះធ្វើជាចំណាប់ខ្មាំង។ ពួកវាបានបង្ហោះរូបភាព ជាច្រើន នៅតាមទំព័រវែបសាយ របស់ពួកវា ដែលបង្ហាញពីកម្ទេចយន្តហោះ ដែលបានផ្ទុះធ្លាក់ និងអ្នកបើកយន្តហោះ ដែលពួកវាចាប់បាន។
យោងតាមព័ត៌មានផងដែរ អ្នកបើកយន្តហោះនោះ មានឈ្មោះ ម៉ាស អាល់ កាសាបេហ មានអាយុ២៦ឆ្នាំ ទើបតែបានរៀនចប់ ចេញពីសាលាទាហាន ហើយទើបបានរៀបការ មុននឹងចេញទៅបំពេញបេសកកម្ម ប្រយុទ្ធជាមួយពួកជីហាត ក្នុងកងទ័ពអាកាសហ្សកដានី។ ក្រុមគ្រួសារ របស់អ្នកបើកយន្តហោះវ័យក្មេងរូបនេះ បានអំពាវនាវឲ្យមហាក្សត្រហ្សកដានី ជួយស្រោចស្រង់ជីវិតយុវជននេះ។ យ៉ាងណាមិញ តាមពាក្យចចាមអារ៉ាមថា ពួកជីហាតកំពុងតែនិយាយមិនត្រូវរ៉ូវគ្នា ថាតើត្រូវទុកជីវិតអ្នកបើកយន្តហោះនេះ រឺយ៉ាងណានោះទេ។ តាមការវិភាគ ពួកនេះមានពីក្រុម គឺក្រុមជីហាតមកពីឆាឆិន្នី និងក្រុមជីហាតអ៊ីរ៉ាក់ ហើយពីរនាក់នេះ មិនដឹងថា មួយណាជាមេពិតប្រដកនោះទេ។
នេះគឺជាលើកទីមួយហើយ ដែលពួកជីហាតអ៊ីស្លាម បានប្រើប្រាស់គ្រាប់មីស៊ីល បាញ់កម្ទេចយន្តហោះរបស់ពួកសម្ព័ន្ធមិត្តអាមេរិក។ សូមបញ្ជាក់ដែរ អាមេរិក និងសម្ព័ន្ធមិត្ត បានជ្រើសរើសយកការវាយប្រហារតាមផ្លូវអាកាស ដោយគិតថាវាមានភាពងាយស្រួលជាង ហើយថាពួកជីហាតអ៊ីស្លាម ពុំមានអីមកបាញ់យន្តហោះទំលាក់បានទេ។ ប៉ុន្តែ បើយោងតាមសម្តីរបស់លោក អេលីយ៉ុត ហាហ្គីន អ្នកជំនាញផ្នែកអាវុធប្រើប្រាស់ក្នុងសង្គ្រាម បានឲ្យដឹងថា ពេលនេះគេអាចសន្និដ្ឋានបានថា ពួកអ៊ីស្លាមជីហាត មានបំពាក់ គ្រាប់មីស៊ីល បាញ់ទំលាក់យន្តហោះ ផលិតនៅរុស្ស៊ី និងនៅចិន ជាច្រើនគ្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ