អ.ស.ប.បានសម្រេចឲ្យអ៊ីស្រាអែលបង់ប្រាក់សំណងដល់លីបង់ចំនួន ៨៥៦លានដុល្លារ
ចុះផ្សាយនៅថ្ងៃ៖
ស្តាប់ - ០៥:០១
នៅថ្ងៃសៅរ៍ ទី២១ ធ្នូ អង្គការសហប្រជាជាតិបានតម្រូវឲ្យអ៊ីស្រាអែលបង់ប្រាក់ចំនួន ៨៥៦លានដុល្លារឲ្យប្រទេសលីបង់។ គឺជាប្រាក់សំណងនៃការបែកធ្លាយអាងស្តុកប្រេងហូរចូលក្នុងសមុទ្ររបស់មជ្ឈមណ្ឌលអគ្គិសនីមួយនៅលីបង់ ក្នុងពេលដែលអ៊ីស្រាអែលបានធ្វើសង្រ្គាមប្រឆំាងពួកអេបូឡាលីបង់កាលពីឆ្នំា ២០០៦។ រដ្ឋាភិបាលអ៊ីស្រាអែលបានជំទាស់ ដោយបានចាត់ទុកការសម្រេចចិត្តនោះថា មានលក្ខណៈលំអៀង និងមានចេតនាប្រឆំាងអ៊ីស្រាអែល។ ដោយឡែក រដ្ឋាភិបាលនៃប្រទេសលីបង់បានសាទរចំពោះសេចក្តីសម្រេចចិត្តរបស់អង្គការសហប្រជាជាតិ និងថា នេះជាមហាជោគជ័យនយោបាយ និងការទូតរបស់ប្រទេស និងប្រជាជនលីបង់។
រឿងរ៉ាវដំបូងបានកើតមានឡើងកាលពីឆ្នំា ២០០៦ ដែលកងទ័ពអ៊ីស្រាអែលបានបើកការវាយប្រហារលើពួកអេបូឡាលីបង់ស្ថិតនៅប៉ែកខាងត្បូងប្រទេសលីបង់។ ការវាយប្រហាររបស់ទ័ពអ៊ីស្រាអែលប្រឆំាងពួកអេបូឡាកាលណោះក៏បានធ្វើប៉ះពាល់បែកធ្លាយអាងស្តុកប្រេងមួយរបស់មជ្ឈមណ្ឌលអគ្គិសនីលីបង់ដែលស្ថិតនៅចម្ងាយប្រមាណជា ៣០គីឡូម៉ែត្រប៉ែកខាងត្បូងទីក្រុងបេរូត។ ឧប្បត្តិហេតុបែកធ្លាយអាងស្តុងប្រេងកាលណោះបានបណ្តាលឲ្យមានបរិមាណប្រេងពី ១០ ០០០ ទៅ ១៥ ០០០តោនហូរចូលក្នុងសមុទ្រ អណ្តែតតៀបត្រាខ្មៅងងឹតនៅលើផ្ទៃទឹកសមុទ្រតាមបណ្តោយឆ្នេរជាង ១០០គីឡូម៉ែត្រ និងបំពុលបរិស្ថាននៅក្នុងតំបន់មួយដែលកំពុងផុយស្រួយស្រាប់។ នេះជាមហន្តរាយបរិស្ថានដ៏ធំទី២ នៅក្នុងសមុទ្រមេឌីទែរ៉ានេ បន្ទាប់ពីគ្រោះថ្នាក់លេចកប៉ាល់ដឹកប្រេង Erika ក្នុងប្រទេសបារំាងកាលពីឆ្នំា ១៩៩៩។
គេត្រូវរង់ចំារយៈពេល ៣សប្តាហ៍ ពោលចំាដល់ទ័ពអ៊ីស្រាអែលបញ្ឈប់ការវាយប្រហារលើពួកអេបូឡា ទើបគេអាចចាប់ផ្តើមប្រតិបត្តិការបោសសំអាត បូមប្រេងលើផ្ទៃសមុទ្រនៅលីបង់បាន។ តែអ្វីៗហាក់ដូចជាយឺតពេលខ្លំាង ព្រោះប្រេងបានរសាត់អណ្តែតទៅបំពុលទីតំាងបង្កាត់ពូជរបស់សត្វអណ្តើក និងកំពុងផែជាប្រវត្តិសាស្រ្តមួយរបស់លីបង់។ តំាងពីពេលនោះមក រដ្ឋាភិបាលលីបង់ និងក្រុមអង្គការអ្នកការពារបរិស្ថានបានប្តឹងអ៊ីស្រាអែលឲ្យបង់ថ្លៃខូតខាត។ ៨ឆ្នំាក្រោយមក អង្គការសហប្រជាជាតិបានតម្រូវឲ្យអ៊ីស្រាអែលសងថ្លៃខូចខាតក្នុងរឿងបរិស្ថានចំនួន ៨៥៦លានដុល្លារ គឺមិនមែនខូចខាតក្នុងរឿងសង្រ្គាមប្រឆំាងអេបូឡាទេ។ តែសេចក្តីសម្រេចចិត្តរបស់អង្គការសហប្រជាជាតិពេលនេះមិនមានលក្ខណៈបង្ខិតបង្ខំឲ្យអ៊ីស្រាអែលត្រូវគោរពតាមដោយខានតែបាននោះទេ។
អ៊ីស្រាអែលចាត់ទុកជាសេចក្តីសម្រេចចិត្តមិនយុត្តិធម៌ និងលំអៀង
អ៊ីស្រាអែលបានចេញមុខជំទាស់នឹងសេចក្តីសម្រេចចិត្តថ្មីប្រឆំាងខ្លួនពីសំណាក់អង្គការសហប្រជាជាតិ ទោះបីជាសេចក្តីសម្រេចចិត្តនេះមិនមានលក្ខណៈបង្ខិតបង្ខំក៏ដោយ។ សម្រាប់រដ្ឋាភិបាលអ៊ីស្រាអែល នេះជារឿងអាម៉ាស់មួយខ្លំាងណាស់នៅចំពោះមុខលីបង់ដែលជាប្រទេសជិតខាង និងសត្រូវរបស់ខ្លួន។ អ៊ីស្រាអែលបានចាត់ទុកការសម្រេចរបស់អង្គការសហប្រជាជាតិថា មិនយុត្តិធម៌ មានភាពលំអៀង និងបានចោទស្ថាប័នកំពូលអន្តរជាតិមួយនេះថា កំពុងបន្តតាមរករឿងអ៊ីស្រាអែលមិនឈប់មិនឈរ ដោយរាប់បញ្ចូលទំាងអធិកររវាងអ៊ីស្រាអែល និងប៉ាឡេស្ទីនផង។
អ្វីដែលរដ្ឋាភិបាលអ៊ីស្រាអែលកំពុងបារម្ភខ្លំាងនោះ គឺខា្លចតែការសម្រេចចិត្តរបស់អង្គការសហប្រជាជាតិពេលនេះត្រូវបានប្រទេសសត្រូវផ្សេងរបស់អ៊ីស្រាអែលយកទៅធ្វើមូលដ្ឋានដើម្បីទាមទារឲ្យអ៊ីស្រាអែលសងថ្លៃខូចខាតនៅក្នុងសង្រ្គាមផ្សេងទៀតដែលអ៊ីស្រាអែលខ្លួនឯងយល់ឃើញថា ខ្លួនមិនគួរខ្លាចជាជនរងគ្រោះតែម្នាក់ឯងទេ ដូចយ៉ាងសង្រ្គាមអ៊ីស្រាអែលលើតំបន់ហ្គាហ្សាក្នុងទឹកដីប៉ាឡេស្ទីននារដូវក្តៅកន្លងមក។ ក្រៅពីនោះ អ៊ីស្រាអែលក៏កំពុងជាប់ចោទពីបទធ្វើឲ្យធ្លាយបំពុងបង្ហូរប្រេងកាលពីខែវិច្ឆិកាដែលបំពុលបរិស្ថាននៅតាមបណ្តោយព្រំដែនជាមួយប្រទេសហ្ស៊កដានី។
លីបង់ចាត់ទុកជាមហាជោគជ័យនយោបាយ និងការទូត
ទោះបីជាប្រទេសលីបង់ដឹងថា អ៊ីស្រាអែលនឹងមិនគោរពតាមសេចក្តីសម្រេចចិត្តរបស់អង្គការសហប្រជាជាតិពេលនេះក៏ដោយ ក៏ខ្លួនបានចាត់ទុកជាមហាជោគជ័យនយោបាយ និងការទូតមួយសម្រាប់ខ្លួន។ សម្រាប់ទីក្រុងបេរូត នេះជាផ្លៃផ្កាដែលលីបង់បានប្រឹងប្រែង និងបានទន្ទឹងរង់ចំាអស់ ៨ឆ្នំាមកហើយ។ លីបង់បានយល់ឃើញថា មហោជោគជ័យតាមផ្លូវទូតលើអ៊ីស្រាអែលពេលនេះនឹងអនុញ្ញាតឲ្យខ្លួនយកទៅធ្វើជាមូលដ្ឋានច្បាប់ដើម្បីបន្តប្តឹងអ៊ីស្រាអែលនៅក្នុងសំណុំរឿងផ្សេងទៀត។
នៅចំពោះមុខ និងអ្វីដែលលីបង់ត្រៀមប្តឹងអ៊ីស្រាអែលដោយប្រើវេទិកាអន្តរជាតិនោះ គឺទី១ ទាមទារឲ្យអ៊ីស្រាអែលបិទបញ្ចប់ការត្រួតត្រាតំបន់ឈឺបា និងតំបន់កូនភ្នំហ្វាឈូបាស្ថិតចុងប៉ែកអាគ្នេយ៍នៃប្រទេសលីបង់ និងទី២ ទាមទារពីសិទ្ធិរបស់ខ្លួនក្នុងការធ្វើអាជីវកម្មអណ្តូងប្រេងកាត និងឧស្ម័ននៅក្នុងតំបន់សមុទ្រដែលអ៊ីស្រាអែលកំពុងទាមទារកម្មសិទ្ធមួយភាគរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ