ព្រះសង្ឃប៊ុតប៊ុនទិញ ស្ងប់ព្រះទ័យ តែនៅតែឃ្លាំមើលថា ពុទ្ធសាសនបណ្ឌិត្យ នឹងមិនត្រូវក្លាយជាទំនិញទិញដូរ
ព្រះសង្ឃប៊ុត ប៊ុនទិញ ស្ថាបនិកបណ្តាញព្រះសង្ឃឯករាជ្យ ដើម្បីយុត្តិធម៌សង្គម ដែលបានដឹកនាំការទាមទារ ដាក់ញត្តិ រក្សាទីតាំងវិទ្យាស្ថានពុទ្ធសាសនបណ្ឌិត្យ បានបញ្ជាក់ថា ពុទ្ធបរិស័ទ បានស្ងប់ចិត្តហើយ បន្ទាប់ពីបានឃើញរបាយការណ៍របស់រដ្ឋាភិបាល បញ្ជាក់ទូលថ្វាយព្រះមហាក្សត្រ ថាពុំមានការលក់ដូរ ពុទ្ធសាសនបណ្ឌិតទេ តែថាបេសកកម្មឃ្លាំមើលទីតាំងពុទ្ធសាសនបណ្ឌិត្យនៅតែបន្ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
មន្ទិលសង្សយ័និងភាពចម្រូងចម្រាស់ទាក់ទងទៅនឹងទីតាំងរបស់ពុទ្ធសានបណ្ឌិត ត្រូវបានបញ្ចប់ហើយ បន្ទាប់ពីរដ្ឋាភិបាលបានធ្វើរបាយការណ៍បញ្ជាក់ទូលថ្វាយព្រះមហាក្សត្រ។ ព្រះសង្ឃប៊ុត ប៊ុនទិញ បានបញ្ជាក់ប្រាប់វិទ្យុបារាំងនៅថ្ងៃសៅរ៍នេះ ព្រះអង្គស្ងប់ព្រះទ័យបាន៩០%រយហើយ។ យ៉ាងក៏ដោយ ក្នុងឱកាសដែលការដ្ឋាននៅទីតាំងពុទ្ធសាសនបណ្ឌិតនៅតែបន្ត ព្រះអង្គនិងពុទ្ធបរិសទ័ទាំងអស់នឹងបន្តបេសសកម្មរង់ចាំមើលទៅមុខទៀតថា វិទ្យាស្ថានពុទ្ធសាសនបណ្ឌិត្យ ដែលជាគ្រឹះនៃព្រះពុទ្ធសាសនា នឹងគ្មានការប្តូរទីតាំង។
រដ្ឋាភិបាលបានរាយការណ៍ថ្វាយព្រះមហាក្សត្រសម្តេចព្រះបាននរោត្តមសីហមុនី ថា ក្រោយពីមានការសង្សយ័អំពីទីតាំងរបស់ពុទ្ធសាសនបណ្ឌិត ក្រសួងធម្មការនិងសាសនា បានធ្វើសន្និសីទកាសែតព្រមទាំងបានចេញសេចក្តីថ្លែងការណ៍ បញ្ជាក់និងបដិសេធយ៉ាងដាច់ខាតថា ក្រសួងពុំដែលមានគោលការណ៍គិតគូរដល់ការវិនិយោគឬលក់ពុទ្ធសាសនបណ្ឌិតនោះឡើយ។ចំនែករបង និងក្លោងទ្វារ ដែលបានរុះរើនោះ នឹងត្រូវសាងសង់ថ្មីឡើងវិញតាមរចនាបថដើម ក្រោយពីបញ្ចប់ការដ្ឋានផ្លូវក្រោមដីនៅពីមុខពុទ្ធសាសនបណ្ឌិត។នេះបើតាមលិខិតចុះថ្ងៃទី០៦តុលា ចុះហត្ថលេខាដោយលោកនាយករដ្ឋមន្ត្រីហ៊ុន សែន ឆ្លើយតបនឹងព្រះរាជសាររបស់ព្រះមហាក្សត្រ ដែលទើបត្រូវបានផ្សព្វផ្សាយដល់អ្នកកាសែតនៅថ្ងៃសុក្រម្សិលម៉ិញនេះ។
តាមប្រភពដដែល បានបញ្ជាក់ទៀតថាលើសពីនេះ ក្រសួងធម្មការ និងសាសនា ក៏បានលើកសំណើររួចហើយដែរ ក្នុងផែនការអនុវត្តកម្មវិធី៣ឆ្នាំរំកិល២០១៥-២០១៧ ដោយគ្រោងចំណាងទឹកប្រាក់៤,៦លានដុល្លាដើម្បីកសាងអគារបម្រើការងារ៤ឬ៥ជាន់នៅក្នុងបរិវេណពុទ្ធសាសនបណ្ឌិត្យ។
សូមបញ្ជាក់ថា ក្តីព្រួយបារម្ភនិងការតវ៉ា ដាក់ញត្តិ របស់ព្រះសង្ឃនិងពុទ្ធបរិសទ័ ទាក់ទងទៅនឹងទីតាំងរបស់ពុទ្ធសាសនបណ្ឌិតនេះ បានផ្ទុះឡើងកាលពីពាក់កណ្តាលឆ្នាំ២០១៤នេះ គឺនៅពេលដែល ណាហ្គា វើល បានព័ទ្ធរបង និងបើកការដ្ឋាន លើដីមួយផ្នែករបស់វិទ្យាស្ថានពុទ្ធសាសនបណ្ឌិត ក្រោមកិច្ចសន្យាជួល ហើយ របង និងក្លោងទ្វារ ផ្នែកខាងជើងរបស់វិទ្យាស្ថានពុទ្ធសាសនបណ្ឌិត ក៏ត្រូវក្រុមហ៊ុន ណាហ្គា វើល វាយចោល ដើម្បីលក្ខណ្ឌសុវត្ថិភាពក្នុងការ សាងសង់ផ្លូវ និងផ្សារក្រោមដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ