នាយករដ្ឋមន្ត្រីឥណ្ឌាចោទប៉ាគីស្ថាន ថាជាប្រទេសបញ្ចេញភេរវកម្មទៅគ្រប់ទិសទី
នៅថ្ងៃសៅរ៍នេះ នាយករដ្ឋមន្ត្រីឥណ្ឌា ណារិនដ្រា ម៉ូឌី បានចោទប្រកាន់ប៉ាគីស្ថាន ថាជាប្រទេសដែលនាំភេរវកម្ម ចេញទៅគ្រប់ទិសទីទាំងអស់។ នេះជាប្រតិកម្មជាសាធារណៈលើកទី១ ធ្វើឡើងដោយនាយករដ្ឋមន្ត្រីឥណ្ឌា គិតតាំងពីមានការវាយប្រហារទៅលើបន្ទាយកងទ័ពមួយកន្លែង នៅតំបន់កាស្មៀរ ធ្វើអោយស្លាប់ទាហានឥណ្ឌា១៨នាក់។
ចុះផ្សាយនៅថ្ងៃ៖ កែប្រែថ្ងៃទី៖
“យើងបានទទួលឯករាជ្យ ក្នុងឆ្នាំតែមួយដូចគ្នា ប៉ុន្តែ បច្ចុប្បន្ន ឥណ្ឌានាំចេញកម្មវិធីទាក់ទងកុំព្យូទ័រ ប៉ាគីស្ថាននាំចេញក្រុមភេរវជន” នេះជាពាក្យចោទប្រកាន់របស់នាយករដ្ឋមន្ត្រីឥណ្ឌា ណារិនដ្រា ម៉ូឌី ទៅលើប៉ាគីស្ថាន។ ថ្ងៃសៅរ៍នេះ លោកម៉ូឌី បានបញ្ចេញប្រតិកម្មលើកដំបូង ជាសាធារណៈ នៅរដ្ឋកេរ៉ាឡា ភាគខាងត្បូងប្រទេស ក្រោយកងទ័ពឥណ្ឌា១៨នាក់ បានស្លាប់ នៅបន្ទាយទ័ពក្នុងតំបន់កាស្មៀរឥណ្ឌា កាលពីថ្ងៃអាទិត្យសប្តាហ៍មុន។
កងទ័ពឥណ្ឌាបានចោទក្រុមជីហាតមួយក្រុមដែលមានមូលដ្ឋានក្នុងទឹកដីប៉ាគីស្ថាន ថាបានបង្កការវាយប្រហារនេះ។ ក្រុមជីហាតដដែលនេះក៏រងការចោទប្រកាន់ពីឥណ្ឌាដែរថា បានវាយប្រហារមូលដ្ឋានទ័ពអាកាសឥណ្ឌា នៅតំបន់ពេនចាប ភាគខាងជើង សម្លាប់មនុស្ស៧នាក់ កាលពីខែមករាដើមឆ្នាំ។
ថ្ងៃសៅរ៍នេះ នាយករដ្ឋមន្ត្រីឥណ្ឌា ក៏ជួបថ្នាក់ដឹកនាំកងទ័ពជាច្រើនរូបដែរ ហើយក៏ប្រហែលជាបានពីភាក្សាជាមួយកងទ័ព ស្តីពីការវាយប្រហារបន្ទាយទ័ព ដែលបានកើតឡើងកាលពីសប្តាហ៍មុន។
ឥណ្ឌាតែងចោទប៉ាគីស្ថានថា បានបំពាក់អាវុធក្រុមឧទ្ទាម និងបញ្ជូនក្រុមឧទ្ទាមអោយឆ្លងកាត់បន្ទាត់ព្រំដែន ដែលបែងចែកឥណ្ឌា និងប៉ាគីស្ថាន នៅតំបន់កាស្មៀរ។ យោងតាមនាយករដ្ឋមន្ត្រីឥណ្ឌា កងទ័ពឥណ្ឌាបានទប់ស្កាត់ការប៉ុនប៉ងបង្កប់ខ្លួន នៅតាមព្រំដែន ហើយបានសម្លាប់បណ្តាជនដែលចង់ធ្វើសកម្មភាពវាយប្រហារ ដល់ទៅ១១០នាក់ ក្នុងរយៈពេលចុងក្រោយនេះ។
ប៉ាគីស្ថានតែងបដិសេធការចោទប្រកាន់របស់ឥណ្ឌា ថាខ្លួនដើមហេតុនៃការវាយប្រហារនៅកាស្មៀរ។ ក្នុងមហាសន្និបាតអង្គការសហប្រជាជាតិ កាលពីថ្ងៃពុធ នាយករដ្ឋមន្ត្រី ណាវ៉ា ស្ហារីហ្វ បានរិះគន់ឥណ្ឌា ទាក់ទងនឹងតំបន់ជម្លោះកាស្មៀរ។ លោកស្ហារីហ្វចោទថា ឥណ្ឌាបង្កការរាំងស្ទះដល់សុខសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ