កម្ពុជាប្រើប្រាស់ថវិកាអស់ជាង ៣០០លានដុល្លារ សម្រាប់ការប្រែប្រួលអាកាសធាតុ
រហូតមកដល់បច្ចុប្បន្ន កម្ពុជាបានប្រើប្រាស់ទឹកប្រាក់អស់ប្រមាណជា ៣៣៨ លានដុល្លាហើយ សម្រាប់គម្រោងដែលពាក់ព័ន្ធនឹងអាកាសធាតុក្នុងស្រុកក្នុងចំណោមថវិកាដែលកម្ពុជាទទួលបានជាង ៦៥៥ លានដុល្លារ។ របាយការណ៍នេះត្រូវបានគេបង្ហាញ នៅក្នុងវេទិកានៃអង្គការមិនមែនរដ្ឋាភិបាលស្តីពីកម្ពុជា នៅព្រឹកថ្ងៃសុក្រទី០៧កុម្ភៈនេះ។
ចុះផ្សាយនៅថ្ងៃ៖
ស្តាប់ - ០១:៥៥
តាំងពីឆ្នាំ ២០០៣ រហូតមកដល់សព្វថ្ងៃនេះ កម្ពុជាបានទទួលហិរញ្ញប្បទានសរុប ប្រមាណជា ៦៥៥លានដុល្លា ដែលក្នុងនោះ ៦៤ភាគរយនៃទឹកប្រាក់នេះ គឺជាជំនួយឥតសំណង ដែលបានមកពីគម្រោងពាក់ព័ន្ធនឹងអាកាសធាតុក្នុងស្រុកចំនួន ៩៥ និង៣៦ភាគរយ ជាកម្ចីសម្បទាន។ នេះបើយោងតាមរបាយការណ៍ ដែលត្រូវបានផ្សព្វផ្សាយនៅក្នុងសិក្ខាសាលាផ្សព្វផ្សាយ ស្តីពីហិរញ្ញប្បទាន ការប្រែប្រួលអាកាសធាតុ នៅកម្ពុជា ដែលបានធ្វើឡើងនៅសណ្ឋាគារកាំបូឌីយ៉ាណា ក្នុងទីក្រុងភ្នំពេញ នៅថ្ងៃទី០៧កុម្ភៈនេះ។
អ្នកចូលរួមប្រមាណជា ៧០នាក់ មកពីតំណាងរដ្ឋាភិបាល ក្រសួងបរិស្ថាន សង្គមស៊ីវិល និងដៃគូពាក់ព័ន្ធនានា បានពិភាក្សា អំពីប្រធានបទក្តៅគគុកមួយនេះ ក្រោមការរៀបចំ ដោយវេទិកាអង្គការមិនមែនរដ្ឋាភិបាល ស្តីពីកម្ពុជា។
លោក តឹក វណ្ណារ៉ា នាយកប្រតិបត្តិស្តីទី វេទិកានៃអង្គការមិនមែនរដ្ឋាភិបាល ស្តីពីកម្ពុជា បានឲ្យដឹងថា ក្នុងអំឡុងពេលប៉ុន្មានឆ្នាំចុងក្រោយនេះ ប្រទេសកម្ពុជា បានទទួលរងគ្រោះមហន្តរាយយ៉ាងធ្ងន់ធ្ងរ និងកាន់តែខ្លាំងឡើងៗ។ ជាពិសេស ក្នុងឆ្នាំ ២០១៣ កម្ពុជា បានជួបគ្រោះទឹកជំនន់ និងគ្រោះរាំងស្ងួត ដែលធ្វើឲ្យប៉ះពាល់ ដល់ជីវិតមនុស្សចំនួន ១៦៨នាក់ ដែលភាគច្រើនជាកុមារ។ ក្នុងនោះផ្ទៃដីកសិកម្ម ក៏ត្រូវបានទទួលការបំផ្លាញ និងខូចខាតទាំងស្រុងផងដែរ។
លោក តឹក វណ្ណារ៉ា បានបន្តថា បញ្ហាការប្រែប្រួលអាកាសធាតុនេះ គឺជាបញ្ហារបស់មនុស្សជាតិទាំងអស់គ្នា ដូច្នេះត្រូវមានវិធានការទប់ស្កាត់ទាំងអស់គ្នាដែរ។ លោកបន្តឲ្យដឹងថា កម្ពុជា បានប្រើប្រាស់ ទឹកប្រាក់ចំនួន ៣៣៨លានដុល្លា ក្នុងចំណោម ទឹកប្រាក់ហិរញ្ញាប្បទាន ចំនួន ៦៦៥លានដុល្លា ដែលប្រមែប្រមូលបាន។ ចំនែកទឹកប្រាក់ ៣១៦លានដុល្លា ទៀត នឹងត្រូវប្រើប្រាស់ សម្រាប់រយៈពេល ៧ឆ្នាំ បន្ទាប់ទៀត ពោលគឺពីឆ្នាំ ២០១៤ ដល់ ២០២០។
សូមបញ្ជាក់ថា គោលបំណងសំខាន់នៃការរៀបចំសិក្ខាសាលាស្តីពិហិរញ្ញប្បទានការប្រែប្រួលអាកាសធាតុ នៅកម្ពុជានេះ គឺដើម្បី ចែករំលែកបទពិសោធន៍ បញ្ហាប្រឈម ការអភិវឌ្ឍគោលនយោបាយ និងបង្ហាញពីលទ្ធផលនៃ ការស្រាវជ្រាវស្តីពីបម្រែបម្រួលអាកាសធាតុនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ