កូរ៉េខាងជើងបណ្តេញអ្នកទោសអាមេរិកអាយុ៨៥ឆ្នាំ ចេញពីទឹកដីខ្លួន
នៅថ្ងៃសៅរ៍នេះ រដ្ឋាភិបាលកូរ៉េខាងជើងបានប្រកាសថា ខ្លួនបានបណ្តេញអ្នកទោសជនជាតិអាមេរិចកាំងអាយុ៨៥ឆ្នាំ មួយរូប ចេញពីទឹកដីខ្លួន។ អ្នកទោសអាមេរិចកាំងដែលក្រុងព្យុងយ៉ាងបានបណ្តេញនោះ មានដើមកំណើតមកពីរដ្ឋកាលីហ្វ៊រនីញ៉ា គឺជាទាហានជើងចាស់សម័យសង្គ្រាមកូរ៉េ។ គាត់ត្រូវបានក្រុងព្យុងយ៉ាងឃុំខ្លួន កាលពីចុងខែតុលា កន្លងទៅ ពីបទធ្វើសកម្មភាពប្រឆាំងកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
អ្នកទោសជនជាតិអាមេរិចកាំងដែលកូរ៉េខាងជើង បានប្រកាសថា បានបណ្តេញចេញ ពីទឹកដីកូរ៉េរួចមកហើយនោះ ឈ្មោះថា មែររីល ញូម៉ាន Merrill Newman អាយុ៨៥ឆ្នាំ ជាទាហានជើងចាស់សម័យសង្គ្រាមកូរ៉េ។ លោកតែងមានបញ្ហាបេះដូងញឹកញាប់។ ក្រុងព្យុងយ៉ាងប្រាប់ថា ការបណ្តេញរូបលោកញូម៉ាននេះ គឺធ្វើឡើងក្នុងមូលហេតុមនុស្សធម៌។
អាជ្ញាធរកូរ៉េខាងជើងបានចាប់ខ្លួនលោក មែររីល ញូម៉ាន កាលពីថ្ងៃ២៦ តុលា កន្លងទៅ នៅក្នុងយន្តហោះមួយគ្រឿង ដែលត្រូវចាកចេញពីក្រុងព្យុងយ៉ាង។ លោក ញូម៉ានបានចូលមកក្នុងទឹកដីកូរ៉េខាងជើង ក្នុងនាមលោកជាអ្នកទេសចរ។ កូរ៉េខាងជើងចោទរូបលោកថា បានធ្វើសកម្មភាពប្រឆាំងរដ្ឋាភិបាលក្រុងព្យុងយ៉ាង មើលងាយមើលថោកប្រព័ន្ធសង្គមនិយមកូរ៉េខាងជើង ដែលផ្ទុយនឹងទិសដៅទេសចររបស់លោក។ ហើយកូរ៉េខាងជើងក៏ចោទលោក ញូម៉ានដែរថា កាលពីលោកញូម៉ានធ្វើជាទាហានក្នុងសម័យសង្គ្រាមកូរ៉េ ចន្លោះឆ្នាំ១៩៥០ និង១៩៥៣ លោកញូម៉ានធ្លាប់បានស៊ើបការណ៍ និងបានសម្លាប់ទាហានកូរ៉េខាងជើង និងជនស៊ីវិលជាច្រើនរូប។
កាលពីថ្ងៃ៣០ វិច្ឆិកា រដ្ឋាភិបាលក្រុងព្យុងយ៉ាងធ្លាប់បានប្រាប់ថា ខ្លួនមានជនជាតិអាមេរិចកាំងញូម៉ានរូបនេះ នៅក្នុងដៃ។ បន្ទាប់ពីនោះមក អាមេរិកបានជំរុញអោយក្រុងព្យុងយ៉ាងដោះលែងលោក ញូម៉ាន ជាបន្ទាន់។ ការប្រកាសថា បានបណ្តេញរូបលោកញូម៉ាន ពីទឹកដីកូរ៉េខាងជើង នៅពេលនេះ ត្រូវបានអាមេរិកវាយតំលៃថា ជាការសំរេចចិត្តបែបវិជ្ជមាន។
កូរ៉េខាងជើងបានប្រកាសបណ្តេញជនជាតិអាមេរិចកាំង ពីទឹកដីខ្លួន ចំពេលដែលអនុប្រធានាធិបតីអាមេរិក ចូ បៃដិន កំពុងទស្សនកិច្ចកូរ៉េខាងត្បូង ជាទស្សនកិច្ចចុងក្រោយ នៅអាស៊ី បន្ទាប់ពីលោកបែដិន បានទស្សនកិច្ចនៅជប៉ុន និងចិនរួចមក។
ដោយឡែក ក្រុងវ៉ាស៊ីនតោនក៏បានសុំអោយកូរ៉េខាងជើងដោះលែង លោកខេណេត បេ ជាពលរដ្ឋអាមេរិក មានដើមកំណើតជាជនជាតិកូរ៉េ ផងដែរ។ លោក ខេណេត បេ ជាប់ចោទពីបទចង់ផ្តួលរដ្ឋាភិបាលក្រុងព្យុងយ៉ាង និងបានទទួលទោសអោយធ្វើការក្នុងជំរំលត់ដំ១៥ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ