សាលាក្តីខ្មែរក្រហមប្រកាសនីតិវិធីបន្តជាច្រើន ទោះជាជួបវិបត្តិថវិកា
ទោះបីជាកំពុងជួបប្រទះបញ្ហាវិកាក៏ដោយ ក៏សាលាក្តីខ្មែរក្រហមបានប្រកាសឲ្យដឹងអំពីដំណើរការការងាររបស់ខ្លួនដើម្បីឈានទៅបញ្ចប់សវនាការសំណុំរឿង ០០២ វគ្គទី១ នៅចុងឆ្នាំ ២០១៣ នេះ។ ទន្ទឹមនឹងនេះ តុលាការកំពូលនៃសាលាក្តីក៏បញ្ជាឲ្យបង្កើតអង្គជំនុំជម្រះសាលាដំបូងមួយទៀត ដើម្បីដំណើរការសវនាការសំណុំរឿង ០០២ វគ្គទី២។ ប៉ុន្តែ អ្នកតាមដានសាលាក្តីនេះមួយចំនួនបានចាត់ទុកបញ្ជារបស់តុលាការកំពូលថា ជាការបង្កើតបញ្ហាថ្មីនៅក្នុងបញ្ហាចាស់ដែលមានស្រាប់តែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
សវនាការចុងក្រោយដើម្បីធ្វើសេចក្តីសន្និដ្ឋានបិទបញ្ចប់កិច្ចពិភាក្សាដេញដោលក្នុងសំណុំរឿង០០២ វគ្គទី១ នឹងបើកធ្វើពីថ្ងៃទី ៩ រហូតដល់ថ្ងៃទី២២ ខែតុលា ខាងមុខ។ នេះជាការប្រកាសឲ្យដឹងរបស់សាលាក្តីខ្មែរក្រហមកាលពីថ្ងៃទី២៤កក្កដា។
ប៉ុន្តែ ដើម្បីពន្លឿនដំណើរការនីតិវិធី អង្គជំនុំជម្រះតុលាការកំពូលបានចេញដីកាឲ្យបង្កើតអង្គជំនុំជម្រះសាលាដំបូងមួយទៀត ដើម្បីចាប់ផ្តើមដំណើរការសវនាការសំណុំរឿង ០០២ វគ្គទី២ ដោយមិនចាំបាច់រង់ចាំរហូតដល់ការបិទបញ្ចប់ទាំងស្រុងសំណុំរឿង ០០២ វគ្គទី១នោះឡើយ។
បើយោងតាមកាលវិភាគការងារដែលកំណត់ដោយសាលាក្តីខ្មែរក្រហម ភាគីនានាត្រូវបានផ្តល់ពេលវេលារហូតដល់ថ្ងៃទី១២ ខែកញ្ញា ឆ្នាំ ២០១៣ ដើម្បីដាក់សារណាបិទបញ្ចប់កិច្ចពិភាក្សាដេញដោលរបស់ខ្លួន។ រីឯការប្រកាសសាលក្រមសំណុំរឿង ០០២ វគ្គទី១ ត្រូវគេគ្រោងនឹងបើកធ្វើនៅក្នុងអំឡុងត្រីមាសទី១ ដើមឆ្នាំ ២០១៤ ឯណោះ។ នេះជាហេតុផលដែលតុលាការកំពូលចង់បង្កើតអង្គជំនុំជម្រះសាលាដំបូងមួយទៀតដើម្បីផ្តើមសវនាការសំណុំរឿង ០០២ វគ្គទី២ឲ្យបានឆាប់។
ប៉ុន្តែ លោក ឆាំង យុ ប្រធានមជ្ឈមណ្ឌលឯកសារកម្ពុជា បានមើលឃើញថា សាលាក្តីខ្មែរក្រហមគ្មានការចាំបាច់ដែលត្រូវបង្កើតអង្គជំនុំជម្រះសាលាដំបូងថ្មីមួយទៀតទេ។ សម្រាប់លោក ឆាំង យុ លក្ខខណ្ឌសុខភាពរបស់ជនជាប់ចោទមិនមែនជាបញ្ហាតម្រូវឲ្យតុលាការចាំបាច់ត្រូវបង្កើតអង្គជំនុំជម្រះថ្មីមួយទៀតនោះឡើយ។ ម្យ៉ាងទៀត ការបង្កើតអង្គជំនុំជម្រះថ្មីមួយទៀតគឺមិនខុសពីការបង្កើតបញ្ហាថ្មីបន្ថែមទៅលើបញ្ហាចាស់ដែលមានស្រាប់នោះឡើយ។
យ៉ាងណាក៏ដោយ លោក ឡាត់ គី អ្នកតាមដានសាលាក្តីខ្មែរក្រហមមួយរូបទៀតរបស់សមាគម អាដហុក បានមើលឃើញចំណាត់ការរបស់សលាក្តីនេះថា ជាកិច្ចខិតខំប្រឹងប្រែងមួយដើម្បីផ្តល់យុត្តិធម៌ដល់គ្រប់ភាគី។ សម្រាប់លោក ឡាត់ គី ទោះបីជាមានបញ្ហាថវិកា ប៉ុន្តែ ធនធានមនុស្សដែលមានស្រាប់អាចប្រើបានដើម្បីធ្វើកិច្ចការងារនេះ។
ប៉ុន្តែ សូមកត់សម្គាល់ថា សាលាក្តីខ្មែរក្រហមពេលនេះគ្មានវិកាសម្រាប់បើកឲ្យបុគ្គលិកជនជាតិខ្មែរឡើយ។ បុគ្គលិកខ្មែរមិនទទួលបានប្រាក់ខែចាប់តាំងពីខែមិថុនាម្ល៉េះ។ រហូតមកទល់ពេលនេះក៏នៅមិនទាន់មានប្រទេសណាសន្យាផ្តល់ជំនួយដល់សាលាក្តីនេះនៅឡើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ