លោកអូបាម៉ាគ្រោងជជែកបញ្ហាកូរ៉េខាងជើងជាមួយលោកស៊ី ជីនពីង ក្នុងជំនួបកំពូលApec
ក្នុងជំនួបកំពូលប្រទេស២១ក្នុងតំបន៉អាស៊ី-ប៉ាស៊ីហ្វិក ហៅកាត់ថា Apec ដែលធ្វើនៅប៉េរូ ចុងសប្តាហ៍នេះ លោកអូបាម៉ា គ្រោងឆ្លៀតជជែកបញ្ហានុយក្លេអ៊ែរកូរ៉េខាងជើង ជាមួយប្រធានាធិបតីចិន ស៊ី ជីនពីង។ លោកអូបាម៉ា បានលាមេដឹកនាំអឺរ៉ុប ថ្ងៃសុក្រម្សិលមិញ ហើយធ្វើដំណើរមកចូលរួមជំនួប Apec ថ្ងៃសៅរ៍នេះ។ យោងតាមលោកMichael Flynn ជាអ្នកប្រឹក្សាសន្តិសុខជាតិ របស់រដ្ឋាភិបាលលោកត្រាំ នុយក្លេអ៊ែរក្រុងព្យុងយ៉ាងអាចជាអាទិភាពមួយ សម្រាប់រដ្ឋាភិបាលអាមេរិកថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
មុននឹងអស់អាណត្តិជាប្រធានាធិបតីអាមេរិក លោកអូបាម៉ា ចង់បង្ហាញជំហរម៉ឺងម៉ាត់ អោយដល់ទីបំផុត ប្រឈមនឹងការគំរាមនុយក្លេអ៊ែរ ពីកូរ៉េខាងជើង។ ចិនជាមិត្តនឹងកូរ៉េខាងជើង។ ដូច្នេះ ក្នុងឱកាសជំនួបកំពូលApec នៅប្រទេសប៉េរូ ថ្ងៃសៅរ៍នេះ លោកអូបាម៉ាត្រៀមជួបលោកស៊ី ជីនពីង ជជែកពីនុយក្លេអ៊ែរកូរ៉េខាងជើង។
ពេលលោកត្រាំ ជាប់ឆ្នោតជាប្រធានាធិបតី កូរ៉េខាងជើងបានទាមទារអោយរដ្ឋាភិបាលអាមេរិកថ្មីព្រមទទួលស្គាល់ថា កូរ៉េខាងជើងជាប្រទេសនុយក្លេអ៊ែរ ហើយអោយព្រមរាប់អានកូរ៉េខាងជើង។ ក្រុងព្យុងយ៉ាងថែមទាំងថា រដ្ឋាភិបាលលោកអូបាម៉ាបានសាកល្បងធ្វើសកម្មភាពបង្កអសន្តិសុខដល់អាមេរិក បន្សល់បញ្ហាដល់លោកត្រាំទៀតផង។ មុនជាប់ឆ្នោត លោកត្រាំឯណោះវិញ ក៏ធ្លាប់ប្រកាសចង់ដកទ័ពពីជប៉ុន និងកូរ៉េខាងត្បូង ហើយថែមទាំងស្នើអោយប្រទេសទាំង២នេះ បំពាក់អាវុធបរមាណូដើម្បីប្រឈមការគំរាមពីក្រុងព្យុងយ៉ាង។
ការចង់តតាំងនុយក្លេអ៊ែរទៅវិញទៅមកនេះ ធ្វើអោយលោកអូបាម៉ា និងប្រទេសសម្ព័ន្ធមិត្តអាមេរិក នៅអាស៊ី កាន់តែបារម្ភបញ្ហាសន្តិសុខ ប្រឈមការគំរាមពីក្រុងព្យុងយ៉ាង។ អង្គការសហប្រជាជាតិកំពុងពិភាក្សារកដំណោះស្រាយដាក់ទណ្ឌកម្មក្រុងព្យុងយ៉ាង ចំពោះការ សាកល្បងនុយក្លេអ៊ែរលើកទី៥កន្លងមក។ ទណ្ឌកម្មរបស់អង្គការសហប្រជាជាតិប្រហែលអាចទាក់ទងការនាំចេញធ្យូងថ្មរបស់កូរ៉េខាងជើង ទៅប្រទេសចិន។ ទណ្ឌកម្មអង្គការសហប្រជាជាតិកន្លងមក មិនបានហាមឃាត់ក្រុងព្យុងយ៉ាង អោយនាំចេញធ្យូងថ្មទៅចិនទេ។ ការនាំចេញធ្យូងថ្ម៦០ភាគរយទៅចិន បានផ្តល់ចំណូលដល់កូរ៉េខាងជើង ជាង១០០លានដុល្លារ ក្នុងមួយខែៗ។
ក្រុងព្យុងយ៉ាងចំណាយរាប់ពាន់លានដុល្លារ ដើម្បីអភីវឌ្ឈន៍អាវុធនុយក្លេអ៊ែរ ដោយមិនបានខ្វល់ពីគ្រោះអត់ឃ្លានរបស់ប្រជាជនក្នុងស្រុក។ ចិនមិនសូវជារហ័សដៃជើងក្នុងការដាក់ទណ្ឌកម្មកូរ៉េខាងជើងជាមិត្តប៉ុន្មានទេ តែឆ្នាំ២០១៦នេះ ចិនបានបើកការអង្កេត លើក្រុមហ៊ុនក្នុងស្រុកមួយ ជាប់សង្ស័យថា បានចូលរួមអភិវឌ្ឍន៍កម្មវិធីនុយក្លេអ៊ែររបស់ក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ