លោកអូបាម៉ាចេញមុខការពារច្បាប់ស្តីពីការគ្រប់គ្រងជនអន្តោប្រវេសន៍
នៅថ្ងៃអង្គារ ទី២៩ មករានេះ លោកប្រធានាធីបតីអាមេរិក បារ៉ាក់ អូបាម៉ាចេញមុខការពារច្បាប់ស្តីពីបញ្ហាគ្រប់គ្រងជនអន្តោប្រវេសន៍។ ការចេញមុខការពាររបស់លោកអូបាម៉ាពេលនេះបានធ្វើឡើង មួយថ្ងៃ បន្ទាប់ពីក្រុមសមាជិកព្រឹទ្ធសភាមកពីគណបក្សសាធារណរដ្ឋ និងគណបក្សប្រជាធិបតេយ្យបានព្រមព្រៀងគ្នាលើផែនទីចង្អុលផ្លូវមួយដើម្បីដោះស្រាយរឿងជនអន្តោប្រវេសន៍ខុសច្បាប់ចំនួន ១១លាននាក់ដែលកំពុងរស់នៅលើទឹកដីអាមេរិកំាង។
ចុះផ្សាយនៅថ្ងៃ៖
ស្តាប់ - ០២:១៧
គឺជារឿងមួយដ៏កម្រមានណាស់ ដែលក្រុមអ្នកសាធារណរដ្ឋ និងក្រុមអ្នកប្រជាធិបតេយ្យចាប់ដៃធ្វើការរួមគ្នាលើសំណុំរឿងជនអន្តោប្រវេសន៍ខុសច្បាប់ដែលកំពុងរស់នៅសហរដ្ឋអាមេរិកនាពេលបច្ចុប្បន្ន។ ជារឿងមួយកម្រ ពីព្រោះវាជាសំណុំរឿងមួយដ៏សែនចម្រូងចម្រាស និងប្រទាញប្រទង់គ្នាខ្លំាង។ តែនៅទីបំផុត ទំាងអស់គ្នាហាក់បានយល់ឃើញថា គម្រោងកំណែទម្រង់ច្បាប់ស្តីពីការគ្រប់គ្រងជនអន្តោប្រវេសន៍ជារឿងមួយចំាបាច់ មិនអាចខ្វះបានទេ។ អ៊ីចឹងហើយបានជានៅថ្ងៃច័ន្ទ ទី២៨ មករាម្សិលមិញ ក្រុមសមាជិកព្រឹទ្ធសភាចំនួន ៨រូបមកពីគណបក្សសាធារណរដ្ឋ និងគណបក្សប្រជាធិបតេយ្យបានព្រមព្រៀងគ្នាលើផែនទីចង្អុលផ្លូវដែលមានកម្រាស់ ៤ទំព័រ។
នៅក្នុងឯកសារកម្រាស់ ៤ទំព័រនោះ ក្រុមសមាជិកព្រឹទ្ធសភាទំាង ៨រូបបានស្នើឲ្យមានការផ្តល់សញ្ជាតិអាមេរិកំាងដល់ជនអន្តោប្រវេសន៍គ្មានក្រដាសស្នាមទំាងអស់ដែលកំពុងរស់នៅក្នុងទឹកដីអាមេរិកំាងសព្វថ្ងៃ។ គឺជាគម្រោងកំណែទម្រង់មួយដែលនឹងអាចអនុញ្ញាតឲ្យជនអន្តោប្រវេសន៍ខុសច្បាប់ចំនួន ១១លាននាក់សព្វថ្ងៃទទួលបានសញ្ជាតិអាមេរិកំាង។ ក៏ប៉ុន្តែ ត្រូវគោរពតាមលក្ខខ័ណ្ឌមួយចំនួន ដូចយ៉ាង មិនធ្លាប់ប្រព្រឹត្តិបទល្មើស មានការងារធ្វើ បង់ប្រាក់ពិន័យត្រឹមត្រូវ ឬមួយក៏មិនដែលជំពាក់ពន្ធរដ្ឋជាដើម។ ម្យ៉ាងទៀត និងដើម្បីអាចឈានទៅទទួលសញ្ជាតិអាមេរិកំាងបាន ជនអន្តោប្រវេសន៍ខុសច្បាប់គ្រប់រូបត្រូវតែឆ្លងកាត់តាមដំណាក់កាលនីមួយៗជាមុនសិន រួមមានដំបូង ទទួលបានកាតស្នាក់នៅ ឬហៅថា « Green card » ហើយ ៥ឆ្នំាក្រោយមក ទើបមានសិទ្ធិទទួលសញ្ជាតិអាមេរិកំាង។
យ៉ាងណាក៏ដោយ គម្រោងកំណែទម្រង់ច្បាប់អន្តោប្រវេសន៍ដែលស្នើឡើងដោយក្រុមសមាជិកព្រឹទ្ធសភានាពេលនេះ នឹងត្រូវបញ្ជូនទៅឲ្យសភាពិនិត្យ និងបោះឆ្នោតសម្រេចនៅក្នុងខែមីនាខាងមុខ។ ចំណែកលោកប្រធានាធិបតីអូបាម៉ាបានចេញដំណើរទៅកាន់រដ្ឋ Nevada ក្នុងថ្ងៃនេះ និងដែលនៅទីនោះ លោកថ្លែងសុន្ទកថាមួយស្តីពីកំណែទម្រង់ច្បាប់គ្រប់គ្រងអន្តោប្រវេសន៍ដែលជាប្រធានបទអាទិភាពមួយក្នុងចំណោមប្រធានបទអាទិភាពផ្សេងទៀតរបស់លោកនៅក្នុងអណត្តិទី ២នេះ។ គួរជម្រាបជូនថា កាលពីដំណាច់ឆ្នំា ២០១០ លោកអូបាម៉ាធ្លាប់បានជម្រុញឲ្យមានកំណែទម្រង់ច្បាប់អន្តោប្រវេសន៍នេះម្តងហើយ តែកាលណោះ បានទទួលបរាជ័យដោយមានការបោះឆ្នោតប្រឆំាងពីក្រុមអ្នកសាធារណរដ្ឋ។ តែលើកនេះ លោកអូបាម៉ាខ្លួនឯងអាចនិយាយបានថា « អស់មានឧបសគ្គទៀតហើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ