ដោយសារស្នូឌិន លោក អូបាម៉ា អំពាវនាវធ្វើកំណែទម្រង់ច្បាប់ប្រឆាំងភេវកម្ម Patriot Act ?
ចុះផ្សាយនៅថ្ងៃ៖
ស្តាប់ - ០៤:២៧
នេះគឺជាលើកទីមួយ ដែលលោកប្រធានាធិបតីអាមេរិក បានចំណាយដ៏ច្រើន និងបកស្រាយ ជាសាធារណៈ អំពីកម្មវិធីលួចតាមដាន យកការណ៍តាមប្រព័ន្ធទូរគមនាគមន៍ ដ៏ចម្រូងចម្រាស។ កម្មវិធីលួចស្តាប់ ដែលមានសារៈសំខាន់បំផុតសម្រាប់សន្តិសុខអាមេរិក ប៉ុន្តែលោកប្រធានាធិបតី បារ៉ាក់ អូបាម៉ា បានសន្យាធ្វើកំណែទម្រង់។ លើសពីនេះទៅទៀត ដើម្បីស្តារទំនុកចិត្តរបស់សាធារណៈមតិអាមេរិក លោកអូបាម៉ា នាឱកាសសន្និសីទកាសែតនៅថ្ងៃសុក្រទី ៩ សីហា ២០១៣ បានប្រកាសធ្វើសើរើមើលច្បាប់ ប្រយុទ្ធប្រឆាំងនឹងអំពើភេរវកម្ម Patriot Act និងចាត់វិធានការមួយចំនួន សម្រាប់ការពារជីវិតឯកជន និងសេរីភាពបុគ្គល ឱ្យកាន់តែមានតម្លាភាព។
តើអ្វីទៅជាវិធានការដែលលោកប្រធានាធិបតីអាមេរិក ស្នើឡើងដើម្បីឱ្យមានតម្លាភាព និងសេរីភាពជីវិតឯកជន ?!
ច្បាប់Patriot Act បានចូលជាធរមាន ក្នុងក្របខ័ណ្ឌប្រយុទ្ធប្រឆាំងនឹងអំពើភេរវកម្ម នៅសម័យអាមេរិកដឹកនាំដោយលោកប្រធានាធិបតី George W Bush ក្រោយមហាភេរវកម្ម នៅ World Trade Center ថ្ងៃទី ១១កញ្ញា ឆ្នាំ២០០១។ នៅក្នុងចង្កោមអត្ថបទច្បាប់ នេះមានជំពូកមួយ ដែលរដ្ឋបាលអាមេរិក - ក្រសួងស៊ើបការណ៍ ឬស្ថាប័នស៊ើបអង្កេតតែងយកមកធ្វើសំអាង ដើម្បីមានសិទ្ធិចូលទៅយកព័ត៌មាន ទាំងឡាយ តាមទូរស័ព្ទ តាមសារអេឡិចត្រូនិច មានទាំងរយៈពេល ទាំងឈ្មោះ ទាំងលេខ និងខ្លឹមសារ ដោយសម្ងាត់ តែស្របច្បាប់។
ប៉ុន្តែក្រោយការបកអាក្រាតរបស់ អេវ៉ា ស្នូឌិន ស្តីអំពីកម្មវិធីស៊ើបការណ៍សម្ងាត់ដែលមានឈ្មោះថា « Prism » មក ចំណោទទាក់ទងនឹងសិទ្ធិសេរីភាពបុគ្គល និងការលួចយកព័ត៌មានសម្ងាត់ បានចោទយ៉ាងខ្លាំង និងបានកា្លយជារឿងអាស្រូវដ៏ធំមួយរបស់អាមេរិក ហេតុដូច្នេះហើយបានជាលោកប្រធានាធិបតីអាមេរិក បារ៉ាក់ អូបាម៉ា ត្រូវការពង្រឹងទំនុកចិត្តសាធារណៈមតិឡើងវិញ បិទទំព័រចាស់ នៃសំណុំរឿងលួចស្តាប់ព័ត៌មានឯកជន ដោយចង់បើកសករាជថ្មី ក្នុងវិស័យស៊ើបការណ៍អាមេរិកនេះ ប្រកបដោយតម្លាភាព។
វិធានការទីមួយ គឺបង្កើតក្រុមអ្នកជំនាញត្រួតពិនិត្យសកម្មភាពរបស់ទីភ្នាក់ងារសន្តិសុខអាមេរិក NSA។ តុលាការភ្នាក់ងារស៊ើបអង្កេត ដែលមានសមាជិកចៅក្រម ១១នាក់ ជាអ្នកសម្រេចការណ៍ដោយសម្ងាត់ ឱ្យភ្នាក់ងារ NSA ទារយកព័ត៌មានពីក្រុមហ៊ុនទូរស័ព្ទឬអ៊ីនធ័រនែត នឹងត្រូវមានអ្នកត្រួតពីលើ។ តែងតាំងឱ្យមានអ្នកទទួលខុសត្រូវផ្នែកជីវិតឯកជន និងសេរីភាពបុគ្គលនៅក្នុងភ្នាក់ងារNSAនេះ ដើម្បីធ្វើឱ្យមានផ្លូវឯករាជ្យមួយ ធានាបាននូវលំនឹងរវាងសន្តិសុខជាតិនិងជីវិតឯកជន។ ។
ច្បាប់Patriot Act ក៏នឹងសើរើមើលឡើងវិញ។ រដ្ឋបាលលោកអូបាម៉ា និងសហការជាមួយសភា ដើម្បីធ្វើកំណែទម្រង់ច្បាប់នេះឱ្យបានសមស្រប និងឆ្លើយឱ្យបានទៅនឹងក្តីព្រួយបារម្ភរបស់បណ្តាជនអាមេរិក ក៏ដូចជាប្រទេសជាសម្ព័ន្ធមិត្ត ចំពោះការរំលោភបំពានសេរីភាព។ ប៉ុន្តែ លោកអូបាម៉ា មិនអាចបោះបង់បានចោទឡើយ ព្រោះច្បាប់និងកម្មវិធីនេះ មានប្រយោជន៍ខ្លាំងណាស់ សម្រាប់ប្រឆាំងនឹងអំពើភេរវនិយម។
ប៉ុន្តែបើគ្មានការគាស់កកាយរបស់ស្នូឌិន លោកប្រធានាធិបតីអាមេរិក ទំនងជានឹងមិនចំណាយពេលវេលាដ៏សន្ធឹកសន្ធាប់លើសកម្មភាពរបស់NSA ហើយជំនួបទ្វេភាគីជាមួយនឹងសមភាគីរុស្ស៊ី លោក វ្លាដេមៀ ពូទីន ក៏ទំនងជាអាចប្រព្រឹត្តទៅបានផង នៅខែកញ្ញាខាងមុខ ...
ជាការពិត ! នៅត្រង់ចំណុចនេះ លោកប្រធានាធិបតីអាមេរិក បានបង្ហាញភាពដាច់ខាតណាស់ ! គ្មានទេ ការអនុគ្រោះទោស ឬ ការយោគយល់ ចំពោះ ស្នូឌិន ពីព្រោះសម្រាប់លោក អូបាម៉ា សកម្មភាព និងទង្វើរបស់ស្នូឌិន ដែលបានទម្លាយរឿងសម្ងាត់នៃកម្មវិធីស៊ើបការណ៍អាមេរិក ដល់ពិភពលោកនេះ មិនត្រូវបានចាត់ទុកថា ជាទង្វើស្នេហាមាតុភូមិឡើយ ! ស្នូឌិន គួរតែត្រឡប់មកសហរដ្ឋអាមេរិក ដើម្បីទទួលការកាត់ទោស។
ទាក់ទងនឹងទំនាក់ទំនងជាមួយលោកប្រធានាធិបតីរុស្ស៊ី ពូទីនវិញ លោកអូបាម៉ា ថ្វីដ្បិតតែបានសម្តែងការសោកស្តាយ ចំពោះសកម្មភាពប្រឆាំងអាមេរិក ដែលកើនឡើងជាលំដាប់នៅរុស្ស៊ី ក្នុងរយៈកាលចុងក្រោយនេះ ប៉ុន្តែនៅតែអះអាងជានិច្ចថា គ្មានទំនាក់ទំនងមិនល្អណាជាមួយលោកពូទីនទេ។ ជំនួបទល់មុខគ្នារវាងប្រមុខដឹកនាំទាំងពីរត្រូវលុបចោលក៏ពិតមែន ប៉ុន្តែលោកប្រធានាធិបតី អះអាងថា នឹងខិតខំ បង្រួញការខ្វែងគំនិតគ្នា លើផ្នែកបុគ្គល ហើយនឹងគ្មានទេសង្គ្រាមត្រជាក់រវាងប្រទេសទាំងពីរ។ អាមេរិកនៅតែចូលរួមជានិច្ចកីឡាអូឡាំពិករដូវត្រជាក់នៅរុស្ស៊ីខែកុម្ភៈឆ្នាំ២០១៤ ដូចការគ្រោងទុក។
គ្មានសង្គ្រាមត្រជាក់ជាលើកទីពីរ ក៏ត្រូវបានបញ្ជាក់ដោយរដ្ឋមន្ត្រីក្រសួងការបរទេសរុស្ស៊ី នាឱកាសជួបពិភាក្សា៥ម៉ោងជាមួយសមភាគីអាមេរិក នៅល្ងាចមិញ។ សូមបញ្ជាក់ថា ជំនួបរវាងលោកអូបាម៉ា និងពូទីន បានលុបចោលមែន ព្រោះដោយសាររឿងអាស្រូវស្នូឌិន ប៉ុន្តែជំនួបថា្នក់ប្រមុខការទូត និងរដ្ឋមន្ត្រីការពារជាតិ ប្រព្រឹត្តទៅដោយធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ