ក្រសួងការពារជាតិអាមេរិកគ្រោងប្តឹងអ្នកសរសេរសៀវភៅអំពីប៊ិនឡាដិន
កាលពីថ្ងៃព្រហស្បតិ៍ម្សិលមិញនេះ ក្រសួងការពារជាតិអាមេរិកបានផ្ញើលិខិតមួយច្បាប់ ទៅអតីតទាហានកុម្ម៉ង់ដូអាមេរិក ដែលបានសរសេរសៀវភៅ រៀបរាប់អំពីប្រតិបត្តិការសម្លាប់ប៊ិនឡាដិន នៅប៉ាគីស្ថាន ដោយបានប្រាប់ថា ក្រសួងការពារជាតិកំពុងពិចារណាដាក់ពាក្យបណ្តឹងទៅតុលាការ ពីបទរំលោភលើកិច្ចព្រមព្រៀងដែលបានចុះជាមួយក្រសួងការពារជាតិ ជុំវិញការសរសេរព័ត៌មានទាក់ទងនឹងការណ៍សម្ងាត់។ ក្រសួងការពារជាតិក៏ព្រមានប្តឹងរោងពុម្ព ដែលទទួលបោះពុម្ពសៀវភៅនេះផងដែរ។
ចុះផ្សាយនៅថ្ងៃ៖
ស្តាប់ - ០១:៥៥
អ្នកនិពន្ធសៀវភៅ « No Easy Day » ដែលរៀបរាប់អំពីប្រតិបត្តិការសម្លាប់ប៊ិនឡាដិន ប្រើឈ្មោះប៉ាកាថា Mark Owen គឺជាអតីតទាហានកុម្ម៉ង់ដូអាមេរិក ដែលបានចូលរួមផ្ទាល់ នៅក្នុងប្រតិបត្តិការនេះ ហើយក្រោយមកបានចូលនិវត្តន៍។ ក៏ប៉ុន្តែ ក្រសួងការពារជាតិអាមេរិកបានបញ្ជាក់ថា នៅមុនពេលចូលនិវត្តន៍ Mark Owen បានចុះកិច្ចព្រមព្រៀងជាមួយក្រសួងការពារជាតិ សន្យាថា នឹងមិនទម្លាយការណ៍សម្ងាត់ណាមួយជាដាច់ខាត ហើយថា ចំពោះរាល់ការសរសេរសៀវភៅអ្វីមួយ ចាំបាច់ត្រូវតែបញ្ជូនខ្លឹមសារនៃសៀវភៅនោះទៅឲ្យក្រសួងការពារជាតិពិនិត្យមើលមុន ទើបអាចចុះផ្សាយបាន។
នៅក្នុងលិខិតកាលពីម្សិលមិញ មេធាវីរបស់ក្រសួងការពារជាតិអាមេរិក បានជូនដំណឹងជាផ្លូវការ ដល់ Mark Owen ថា ក្រសួងការពារជាតិកំពុងពិចារណាដាក់ពាក្យបណ្តឹងទៅតុលាការ ជុំវិញការសរសេរសៀវភៅនេះ។ នៅក្នុងលិខិតនេះ ក្រសួងការពារជាតិអាមេរិកមិនបានចង្អុលបង្ហាញ អំពីចំណុចត្រង់ណា ក្នុងសៀវភៅ ដែលមានសរសេរទម្លាយអំពីការណ៍សម្ងាត់នោះទេ គ្រាន់តែបានបញ្ជាក់ថា ការបោះពុម្ពផ្សាយសៀវភៅ ដោយមិនបានបញ្ជូនមកឲ្យក្រសួងការពារជាតិពិនិត្យមើលជាមុន គឺជាការរំលោភលើកិច្ចព្រមព្រៀង ដែលបានចុះ ហើយត្រូវចូលជាបទល្មើសព្រហ្មទណ្ឌ។ លើសពីនេះទៅទៀត ក្រសួងការពារជាតិក៏បានព្រមានផងដែរថា នឹងរឹបអូសយកលុយទាំងអស់ ដែលបានមកពីការលក់សៀវភៅនេះ ហើយថា រោងពុម្ពដែលបោះពុម្ពសៀវភៅនេះ ក៏នឹងត្រូវប្រឈមមុខនឹងវិធានការផ្លូវច្បាប់ដែរ។
គួរបញ្ជាក់ថា សៀវភៅ « No Easy Day » នេះ ពីដំបូង គ្រោងនឹងត្រូវចេញផ្សាយ នៅចំថ្ងៃខួបភេរវកម្ម ១១ កញ្ញា ក៏ប៉ុន្តែ ដោយសារមានការបញ្ជាទិញច្រើន រោងពុម្ពក៏សម្រេចចេញផ្សាយមុនមួយសប្តាហ៍ ពោលគឺ នឹងត្រូវចេញផ្សាយនៅថ្ងៃអង្គារ សប្តាហ៍ក្រោយនេះ។ ទោះជាយ៉ាងណា ខ្លឹមសារខ្លះៗ នៃសៀវភៅនេះ ត្រូវបានបណ្តាញសារព័ត៌មាន លើកយកមកចុះផ្សាយតាំងពីថ្ងៃពុធម៉្លេះ។ តាមការរៀបរាប់របស់ Mark Owen នៅក្នុងសៀវភៅនេះ មានចំណុចខ្លះ ខុសពីអ្វីដែលបានលើកឡើង ដោយរដ្ឋាភិបាលរបស់លោកអូបាម៉ា ជាពិសេស ទាក់ទងនឹងការបាញ់សម្លាប់អូសាម៉ា ប៊ិនឡាដិន។
គួរបញ្ជាក់ផងដែរថា អត្តសញ្ញាណពិតប្រាកដរបស់ Mark Owen (ទាំងឈ្មោះពិត និងទាំងរូបថត) ក៏ត្រូវបានបណ្តាញផ្សព្វផ្សាយព័ត៌មានអាមេរិក ទម្លាយឲ្យដឹងជាសាធារណៈអស់ទៅហើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ