ប្រទេស៥២ ប្តឹងតុលាការអន្តរជាតិអោយកាត់ទោសបទឧក្រិដ្ឋសង្គ្រាមនៅស៊ីរី
នៅថ្ងៃចន្ទទី ១៤មករា ខាងមុខនេះ ប្រទេសស្វ៊ីសនឹងផ្ញើលិខិតមួយ ទៅក្រុមប្រឹក្សាសន្តិសុខអង្គការសហប្រជាជាតិ ដើម្បីប្តឹងតុលាការអន្តរជាតិក្រុងឡាអេ អោយបើកសវនាកា កាត់ទោសបទឧក្រិដ្ឋសង្គ្រាម នៅស៊ីរី។ លិខិតនេះចុះហត្ថលេខា ដោយប្រទេសចំនួន ៥២ មិនពេញចិត្តនឹងឃើញ អំពើហិង្សា សំលាប់មនុស្សនៅស៊ីរី នៅបន្តរ៉ាំរ៉ៃ គ្មានការថ្កោលទោស។ ប្រទេសមួយចំនួន ជំទាស់មិនអោយមានការសំរេចចិត្តណាមួយ ផ្តល់នូវហេតុផលបន្ថែម ដល់ប្រធានាធិបតី អាសាដ អោយនៅបន្តដំណែង នៅក្នុងរដ្ឋាភិបាលស៊ីរី។ ចាប់តាំងពី ខែមិនា ឆ្នាំ ២០១១មក យោងតាមអង្គការសហប្រជាជាតិ អំពើហិង្សានៅក្នុងប្រទេសស៊ីរី បានធ្វើអោយមនុស្សជាង ៦០ ០០០ ស្លាប់បាត់បង់ជីវិត និង ៦០០ ០០០ នាក់ទៀតភៀសខ្លួន ទៅកាន់ប្រទេសជិតខាង។
ចុះផ្សាយនៅថ្ងៃ៖
ស្តាប់ - ០១:២៧
វិបត្តិនយោបាយ ដែលធ្វើអោយប្រទេសស៊ីរី រងគ្រោះដោយអំពើហិង្សាជិតពីរឆ្នាំមកហើយនេះ ហាក់មិនមានច្រកចេញសោះឡើយ ក្រៅតែពីបន្តធ្វើអោយមនុស្សស្លាប់កាន់តែច្រើន នៅក្នុងប្រទេស។
ប្រទេសចំនួន ៥២ ទូទាំងពិភពលោក បាននាំគ្នាចុះហត្ថលេខា ក្នុងលិខិតមួយ ដែលនឹងត្រូវបញ្ជូនដោយប្រទេសស្វ៊ីស ទៅក្រុមប្រឹក្សាសន្តិសុខរបស់អង្គការសហប្រជាជាតិ នៅថ្ងៃចន្ទខាងមុខនេះ ដើម្បីទាមទារអោយមានសវនាការជាអន្តរជាតិ ដាក់ទោសលើអំពើហិង្សានៅ ស៊ីរី ដែលគេចាត់ទុកថា ជាបទឧក្រិដ្ឋសង្គ្រាម។
ដោយសារតែប្រទេសស៊ីរី មិនបានចូលរួមក្នុងការ បង្កើតតុលាការអន្តរជាតិក្រុងឡាអេ ដូច្នេះ តំរូវអោយមានអន្តរាគមន៍មួយ ធ្វើឡើងដោយក្រុមប្រឹក្សាសន្តិសុខអង្គការសហប្រជាជាតិ ទើបតុលាការអន្តរជាតិក្រុងឡាអេ អាចបើកសវនាការកាត់ក្តីនេះបាន។
ទន្ទឹមនេះដែរ ប្រទេសអឺរ៉ុបចំនួន ៤ផ្សេងទៀត មាន ប្រទេស អូទ្រីស ដាណឺម៉ាក អៀរឡង់ និងស្លូវេនី បានធ្វើលិខិតរួមមួយ ចេញផ្សាយកាលពីថ្ងៃសុក្រម្សិលមិញនេះ សុំអោយក្រុមប្រឹក្សាសន្តិសុខអង្គការសហប្រជាជាតិ បញ្ជូនជាបន្ទាន់ ទៅតុលាការអន្តរជាតិ ដើម្បីសំរេចបាននូវការកាត់ទោស បទឧក្រិដ្ឋសង្គ្រាម នៅស៊ីរី។
នៅក្នុងលិខិតនេះ ប្រមុខការទូតរបស់ប្រទេសទាំង ៤នេះ បានសរសេរថា ៖ “ឧក្រិដ្ឋកម្មគួរអោយរន្ធត់បានបង្កឡើង ក្នុងជម្លោះនៅស៊ីរី ប៉ុន្តែជនដែលបង្កបទឧក្រិដ្ឋ មិនបានទទួលផលកម្មអ្វីឡើយ”។
យោងតាមអង្គការសហប្រជាជាតិ ចាប់តាំងពី ដើមឆ្នាំ ២០១១មក អំពើហិង្សានៅក្នុងប្រទេសស៊ីរី បានធ្វើអោយមនុស្សជាង ៦០ ០០០ ស្លាប់បាត់បង់ជីវិត និង ៦០០ ០០០ នាក់ទៀតភៀសខ្លួន ទៅកាន់ប្រទេសជិតខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ