ក្រុមប៉ូលិសកាណាដាបានបង្រ្កាបទាន់ពេលនូវគម្រោងបង្កភេរវកម្មបំផ្ទុះរថភ្លើងអ្នកដំណើរ
នៅប្រទេសកាណាដា ប៉ូលិសបានប្រកាសឲ្យដឹងនៅថ្ងៃចន្ទ ទី២២ មេសាម្សិលមិញថា ខ្លួនបានបង្រ្កាបទាន់ពេលនូវគម្រោងបង្កភេរវកម្មមួយនៅក្នុងតំបន់តូរ៉ុងតូ។ មានបុរសពីរនាក់ដែលគេនៅមិនទាន់ស្គាល់អត្តសញ្ញាណត្រូវបានចាប់ខ្លួន ម្នាក់ចាប់បាននៅតូរ៉ុងតូ និងម្នាក់ទៀតចាប់បាននៅក្នុងទីក្រុងម៉ុងត្រេអាល់។ យោងតាមប៉ូលិស បុរសទំាងពីរនាក់មានគម្រោងបើកការវាយប្រហារលើរថភ្លើងដឹកអ្នកដំណើរមួយខ្សែនៅក្នុងតំបន់តូរ៉ុងតូ។ ប្រភពប៉ូលិសដដែលបានធានាថា ជនសង្ស័យទំាងពីររូបបានទទួលបញ្ជាពីអង្គការភេរវនិយមអាល់កៃដានៅក្នុងប្រទេសអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០១:៥៨
យោងតាមលទ្ធផលនៃការស៊ើបអង្កេតដំបូងរបស់ប៉ូលិសកាណាដា ជនសង្ស័យទំាងពីររូបដែលគេនៅមិនទាន់ស្គាល់សញ្ជាតិច្បាស់លាស់មានគម្រោងដាក់បំផ្ទុះបណ្តាច់រថភ្លើងមួយខ្សែនៅក្នុងតំបន់តូរ៉ុងតូ។ មានទីភ្នាក់ងារព័ត៌មានមួយចំនួនថែមទំាងបានបញ្ជាក់ថា ផ្លូវរថភ្លើងដែលបុរសទំាងពីររូបនោះគ្រោងនឹងដាក់បំផ្ទុះបណ្តាច់ គឺជាផ្លូវរថភ្លើងដែលតភ្ជាប់រវាងតំបន់តូរ៉ុងតូប្រទេសកាណាដា និងទីក្រុងញូយ៉កសហរដ្ឋអាមេរិក។
ជនសង្ស័យទី១មានឈ្មោះ Chiheb Esseghaier អាយុ ៣០ឆ្នំា និងជនសង្ស័យទី២មានឈ្មោះ Raed Jaser អាយុ ៣៥ឆ្នំា។ យោងតាមប៉ូលិសកាណាដា បុរសទំាងពីរនាក់ប្រហែលជាបានទទួលការណែនំា និងព័ត៌មានពីក្រុមអង្គការភេរវនិយមអាល់កៃដាមានមូលដ្ឋាននៅក្នុងប្រទេសអ៊ីរ៉ង់។ គួរបញ្ជាក់ជូនថា ជនសង្ស័យទំាងពីររូបនេះត្រូវបានក្រុមអ្នកស៊ើបអង្កេតតាមឃ្លំាមើលតំាងតែពីខែសីហាឆ្នំាទៅមិញមកម្ល៉េះ តែនៅមិនទាន់បានបង្ហាញឲ្យដឹងនូវលទ្ធផលលំអិតនៅឡើយទេ។ ទន្ទឹមគ្នានេះ ក្រុមអ្នកស៊ើបអង្កេតក៏បានបដិសេធមិនបញ្ជាក់ទេថា តើមានក្រុម ឬចលនាណាផ្សេងដែលបានស៊ុមគ្រលំ ឃុបឃិតស្ថិតនៅពីក្រោយជនសង្ស័យទំាងពីរនាក់នោះ ឬអត់។
ម្យ៉ាងទៀតនៅពេលនេះ រដ្ឋអំណាចកាណាដាក៏នៅមិនដឹងថា តើបុរសសង្ស័យទំាងពីរនាក់មានបានកំណត់ថ្ងៃជាមុនដើម្បីបង្កភេរវកម្ម ឬអត់។ យ៉ាងណាក៏ដោយ មេប៉ូលិសកាណាដាបានព្យាយាមធានាប្រជាពលរដ្ឋទូទៅថា ទោះបីជាក្រុមជនសង្ស័យមានសមត្ថភាព និងឆន្ទៈក្នុងការប្រពឹត្តិទង្វើឧក្រិដ្ឋរបស់ខ្លួនក៏ដោយ ក៏គ្មានគ្រោះថ្នាក់ភ្លាមៗណាមួយអាចនឹងកើតមានឡើងចំពោះអ្នកដំណើរទូទៅ បុគ្គលិករបស់ក្រុមហ៊ុនដឹកជញ្ជូនសាធារណៈ ឬមួយក៏ហេដ្ឋារចនាសម្ព័ន្ធផ្លូវដែកដែរ។
ជាមួយគ្នានេះ ប៉ូលិសកាណាដាក៏បានគូសបញ្ជាក់ផងដែរ អំពីកិច្ចសហប្រតិបត្តិការស្អិតរមួតជាមួយក្រុម FBI អាមេរិកំាងនៅក្នុងសំណុំរឿងនេះ។ ចៅក្រមកាណាដាម្នាក់បានប្រាប់ឲ្យដឹងនៅថ្ងៃអង្គារ ទី២៣ មេសានេះថា គេនឹងអាចដឹងព័ត៌មានលំអិតបន្ថែមទៀតជុំវិញជនសង្ស័យទំាងពីររូបនាពេលខាងមុខ នៅពេលដែលបុរសទំាងពីររូបចូលឆ្លើយបំភ្លឺនៅមុខតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ