រដ្ឋប្រហារស្របច្បាប់នៅប៉ារ៉ាហ្កាយ?
វិបត្តិដីធ្លី នៅក្នុងប្រទេសប៉ារ៉ាហ្កាយបានប្រែក្លាយទៅជាវិបត្តិនយោបាយ ដែលឈានទៅដល់ផ្លាស់ប្តូរមុខប្រធានាធិបតី ក្នុងរយៈពេលបីថ្ងៃ។ កាលពីថ្ងៃសុក្រ សភាបានបោះឆ្នោតដកទំនុកចិត្តពីប្រធានាធិបតីចាស់ គឺលោក Fernado Lugo និងជ្រើសតាំងលោកFederio Franco ដែលជាអនុប្រធានាធិបតីឲ្យធ្វើជាប្រធានាធិបតីស្របច្បាប់របស់ប៉ារ៉ាហ្កាយវិញ។ ប្រទេសជិតខាង ប៉ារ៉ាហ្កាយ នៅទ្វីបអាមេរិកខាងត្បូង បានបដិសេធមិនទទួលស្គាល់ប្រធានាធិបតីថ្មីប៉ារ៉ាហ្កាយ និងចាត់ទុកថា ប្រធានាធិបតីចាស់ត្រូវគេធ្វើរដ្ឋប្រហារទម្លាក់ចេញពីអំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
លោកអតីតប្រធានាធិបតី Fernado Lugo ដែលនៅសល់តែមួយឆ្នាំទៀតនឹងអស់អាណត្តិនោះ ក៏បាននិយាយដែរថា គាត់ជាជនរងគ្រោះនៃរដ្ឋប្រហារ និងបានអំពាវនាវនៅថ្ងៃអាទិត្យនេះ ឲ្យអ្នកគាំទ្រគាត់ចុះតាមថ្នល់ធ្វើការតវ៉ាដោយសន្តិភាព។
ប៉ុន្តែ សម្រាប់លោក Federio Franco ប្រធានាធិបតី ថ្មីរបស់ប៉ារ៉ាហ្កាយ គ្មានរដ្ឋប្រហារ នៅប៉ារ៉ាហ្កាយទេ ប៉ុន្តែ គ្រាន់តែមានការផ្លាស់ប្តូរថ្នាក់ដឹកនាំកំពូលប្រទេស ដែលស្របតាមរដ្ឋធម្មនុញ្ញតែប៉ុណ្ណោះ។ កាលពីថ្ងៃសុក្រ សភាប៉ារ៉ាហ្កាយបានបោះឆ្នោតទម្លាក់ ប្រធានាធិបតី ចាស់ លោកFernado Lugo ចេញពីអំណាច ដោយមូលហេតុថា គាត់មិនបានបំពេញមុខនាទីជាប្រធានាធិបតី និងបានបណ្តោយឲ្យជម្លោះដីធ្លី ក្នុងប្រទេសប្រែក្លាយទៅជាបាតុកម្មហិង្សា រវាងប៉ូលិស និងកសិករ រហូតដល់បង្កឲ្យមានអ្នកស្លាប់១៧នាក់ កាលពីសប្តាហ៍។
ការផ្លាស់ប្តូរមុខប្រធានាធិបតីនៅប៉ារ៉ាហ្កាយនេះមិនត្រូវបានប្រទេសជិតខាងស្វាគមទេ។ ប្រេស៊ីល អាហ្សង់ទីន អ៊ុយរ៉ាហ្គាយ វេណេហ្សុយអេឡា និងអេក្វាទ័របានប្រកាសភ្លាមៗ មិនទទួលស្គាល់ប្រមុខដឹកនាំថ្មីរបស់ប៉ារ៉ាហ្កាយ។ ប្រធានាធិបតីអាហ្សង់ទីនបានកោះហៅឯកអគ្គរដ្ឋទូតរបស់ខ្លួនចូលប្រទេសវិញ ទម្រាំដល់មានសណ្តាប់ធ្នាប់នយោបាយ នៅប៉ារ៉ាហ្កាយ ចំណែករដ្ឋាភិបាលប្រេស៊ីលចាត់ទុកព្រឹត្តិការណ៍នៅប៉ារ៉ាហ្កាយ គឺជារដ្ឋប្រហារ ព្រោះប្រធានាធិបតីចាស់មិនត្រូវបានគេផ្តល់ពេលវេលាគ្រប់គ្រាន់ដើម្បីការពារខ្លួន។
ក្រុមអ្នកជំនួញនៅប៉ារ៉ាហ្កាយបានវាយតម្លៃថា លោកFederio Franco ដែលទើបស្បថចូលធ្វើជាប្រធានាធិបតីប៉ារ៉ាហ្កាយថ្មី មានសមត្ថភាពដោះស្រាយបញ្ហាប្រទេស។ លោកFederio Franco បានទទួលការគាំទ្រពីអ្នកនៅក្នុងស្រុក ប៉ុន្តែ គេនៅរង់ចាំមើលថា តើ លោកFederio Franco ត្រូវចរចាយ៉ាងម៉េចជាមួយក្រុមប្រទេសអាមេរិកឡាទីន ដើម្បីកុំឲ្យដាក់សម្ពាធមកលើខ្លួន។ ការទទួលស្គាល់ពីក្រុមប្រទេសអាមេរិកឡាទីនសំខាន់សម្រាប់ប៉ារ៉ាហ្កាយព្រោះបើមិនដូច្នោះទេ ប៉ារ៉ាហ្កាយនឹងត្រូវគេដាក់ឲ្យនៅឯកោ ទាំងនៅក្នុងឆាកនយោបាយ និងសេដ្ឋកិច្ចតំបន់ គឺដោយត្រូវគេផាត់ចេញពីស្ថាប័នប្រចាំទ្វីប ដូចជា UNASUR ឬចេញពីក្នុងក្រុមប្រទេសនៃទីផ្សាររួមខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ