លោកនាយករដ្ឋមន្រ្តី Benyamin Netanyahu ប្រកាសរៀបចំបោះឆ្នោតសភាមុនអណត្តិ
នៅថ្ងៃពុធ ទី៩ តុលាម្សិលមិញ លោកនាយករដ្ឋមន្រ្តី Benyamin Netanyahu បានប្រកាសពីការរំលាយសភា និងរៀបចំបោះឆ្នោតសភាមុនកាលកំណត់ ពោលអាចនឹងរៀបចំនៅដើមឆ្នំា ២០១៣ ខាងមុខ។ តាមធម្មតា ការបោះឆ្នោតសភានៅអ៊ីស្រាអែលគ្រោងនឹងរៀបចំនៅក្នុងខែតុលា ឆ្នំា ២០១៣។ យ៉ាងណាក៏ដោយ ការប្រកាសរបស់លោកនាយករដ្ឋមន្រ្តីពេលនេះមិនបានធ្វើឲ្យគ្រប់គ្នាមានការភ្ញាក់ផ្អើលឡើយ។
ចុះផ្សាយនៅថ្ងៃ៖
ស្តាប់ - ០១:៣៦
នៅក្នុងសង្កថារយៈពេលខ្លីមួយ លោកនាយករដ្ឋមន្រ្តី Benyamin Netanyahu បានលើកឡើងនូវមូលហេតុដែលជម្រុញឲ្យលោករំលាយរដ្ឋសភា និងរៀបចំការបោះឆ្នោតមុនកាលកំណត់ គឺស្ថានភាពសេដ្ឋកិច្ច និងសន្តិសុខរបស់ប្រទេស។ សម្រាប់លោក Benyamin Netanyahu គេត្រូវតែមានជម្រើសនៅក្នុងការកំណត់ថវិកាជាតិដោយធ្វើយ៉ាងណា កុំឲ្យស្ថានភាពសេដ្ឋកិច្ចរបស់ប្រទេសធ្លាក់ក្នុងវិបត្តិដូចដែលប្រទេសមួយចំនួននៅអឺរ៉ុបកំពុងជួបប្រទះនាពេលបច្ចុប្បន្ន។ និយាយពីបញ្ហាសន្តិសុខវិញ លោកនាយករដ្ឋមន្រ្តីអ៊ីស្រាអែលបានលើកឡើងអំពីការចំណាយលើការសាងសង់ប្រព័ន្ធមីស្ស៊ីល ប្រឆំាងមីស្ស៊ីល ឬមួយក៏ការសាងសង់របងសន្តិសុខនៅតាមបណ្តោយព្រំប្រទល់ដែនជាមួយប្រទេសអេហ្ស៊ីបជាដើម។
នៅក្នុងបរិបទនេះ លោក Benyamin Netanyahu បានយល់ឃើញថា គណបក្សនយោបាយដែលកំពុងស្ថិតក្នុងរដ្ឋាភិបាលចម្រុះនាពេលបច្ចុប្បន្ន មិនអាចនិយាយចុះសម្រុងគ្នាក្នុងការកំណត់ថវិកាជាតិសម្រាប់ឆ្នំា ២០១៣ បានទេ។ គឺនៅក្នុងន័យនេះហើយ និងក្រោយពីបានជួបពិភាក្សាជាមួយគ្រប់គណបក្សដែលពាក់ព័ន្ធមក លោក Netanyahu ក៏បានប្រកាសឲ្យមានការរៀបចំបោះឆ្នោតសភាមុនកាលកំណត់ ពោលក្នុងរង្វង់ដើមឆ្នំា ២០១៣ ខាងមុខ។ ការរៀបចំបោះឆ្នោតសភាដែលតាមធម្មតា នឹងត្រូវប្រព្រឹត្តទៅ នៅក្នុងខែតុលា ឆ្នំា ២០១៣។
បើគេនិយាយជាលក្ខណៈនយោបាយ ការសម្រេចចិត្តរបស់លោក Benyamin Netanyahu ពេលនេះ មិនបានធ្វើឲ្យលោកខាតបង់អ្វីទេ គឺមានតែចំណេញ។ ចំណេញព្រោះលោកនាយករដ្ឋមន្រ្តីបានដឹងយ៉ាងច្បាស់ថា គណបក្ស Likoud របស់លោក និងខ្លួនលោកផ្ទាល់ ត្រូវបានលទ្ធផលនៃការស្ទង់មតិផ្តល់ជ័យជំនះតំាងពីប៉ុន្មានខែមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ