Brexit៖ រដ្ឋាភិបាលអង់គ្លេស ពន្យារពេលផ្សាយរបាយការណ៍ស្តីពីការជ្រៀតជ្រែករបស់រុស្ស៊ី ទៅលើប្រជាមតិ
រដ្ឋាភិបាលអង់គ្លេស បានពន្យារពេលការចេញផ្សាយរបាយការណ៍ស៊ើបអង្កេតស្តីពីការជ្រៀតជ្រែករបស់រុស្ស៊ីក្នុងការបោះឆ្នោតប្រជាមតិអង់គ្លេសដើរចេញពីសហភាពអឺរ៉ុប កាលពីឆ្នាំ២០១៦។ រដ្ឋាភិបាលអង់គ្លេស ទំនងជាត្រូវលើកពេលផ្សាយរបាយការណ៍នេះទៅខែធ្នូវិញ នៅពេលបោះឆ្នោតសភាចប់រួចរាល់។ ការរាំងខ្ទប់និងពន្យារពេលផ្សាយយ៉ាងដូច្នេះ គឺត្រូវគេរិះគន់យ៉ាងចម្រូងសម្រាសចំពោះការសម្រេចចិត្តខុសប្រក្រតីរបស់នាយករដ្ឋមន្ត្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
របាយការណ៍ស៊ើបអង្កេតនេះ មានកម្រាសជាង៥០ទំព័រ ស្រាវជ្រាវរៀបចំដោយក្រុមអ្នកជំនាញនិងភ្នាក់ងារភ្នាក់ស៊ើបការសម្ងាត់អង់គ្លេស។ ការរបាយការណ៍អង្កេតនេះ ពន្យល់ជាសំខាន់ចំពោះការចោទប្រកាន់ថា មានការជ្រៀតជ្រែងរបស់រុស្ស៊ីក្នុងការបោះឆ្នោតប្រជាមតិ Brexit កាលពីឆ្នាំ២០១៦ ហើយឥទ្ធិពលនៃការជ្រៀតជ្រែងនេះ ទៅលើលទ្ធផលនៃការបោះឆ្នោតនោះ។
តាមច្បាប់ទម្លាប់អង់គ្លេស, របាយការណ៍ដែលអាចប៉ះពាល់ដល់សន្តិជាតិយ៉ាងដូច្នេះ វាអាចផ្សាយចេញទៅបាន គឺទាល់តែទទួលការអនុញ្ញាត ផ្តល់ភ្លើងខៀវពីប្រមុខរដ្ឋាភិបាល ជាមុនសិន។ តាំងពីខែមីនាមកម្ល៉េះ ដែលក្រុមភ្នាក់ងារស៊ើបការសម្ងាត់អង់គ្លេសបានសម្រេចបញ្ចប់របាយការណ៍ និងបានបញ្ចូនបន្តទៅកាន់ការិយាល័យនាយករដ្ឋមន្ត្រីរួចទៅហើយ តាំងពីពាក់កណ្តាលខែតុលា។ ហើយបើតាមភាពត្រឹមត្រូវ នាយករដ្ឋមន្ត្រីអង់គ្លេស គួរតែត្រូវផ្តល់ភ្លើងខៀវឱ្យចេញផ្សាយតាំងពីមុនដាច់ខែតុលាមកម្ល៉េះ។ នេះបើតាមកាសែតអង់គ្លេស The Gardian។ ក៏ប៉ុន្តែ នាយករដ្ឋមន្ត្រីអង់គ្លេស លោក បូរីស ចនសុន ទំនងជាចង់រង់ចាំបោះឆ្នោតសភាថ្ងៃទី១២ធ្នូចប់រួចហើយ ទើបឱ្យផ្សព្វផ្សាយរបាយការណ៍។ ការសម្រេចដូច្នេះ គឺហាក់មិនទំនង ពីព្រោះថា ថ្ងៃអង្គារ៍នេះ អង្គសភាអង់គ្លេសនឹងត្រូវរំលាយ ហើយចាប់ផ្តើមរៀបចំការបោះឆ្នោតសភាឡើងវិញ ដែលចាំបាច់ត្រូវធ្វើរបាយការណ៍បិទបញ្ចប់អាណត្តិសភា និងបូកសរុបបង្ហើយការងារទាំងឡាយ មុននឹងរៀបចំបោះឆ្នោតជាថ្មី។
ប្រធានគណកម្មាការសភាទទួលបន្ទុកកិច្ចការសម្ងាត់និងសន្តិសុខជាតិ លោក Dominic Grieve ដែលត្រូវពិនិត្យរបាយការណ៍នោះ បានសម្តែងក្តីមិនពេញចិត្តចំពោះការពន្យារពេលរបស់លោក ចនសុន ហើយរិះគន់ថ្កោលទោសពីការសម្រេចចិត្តរបស់ប្រមុខរដ្ឋាភិបាល ដោយចាត់ទុកថា មិនសមហេតុផល។ ទន្ទឹមគ្នានេះដែរ តំណាងរាស្ត្រប្រឆាំងជាច្រើនផ្សេងទៀត បានចោទប្រកាន់លោកនាយករដ្ឋមន្ត្រី បូរីស ចនសុន ថាខំប្រឹងរកគ្រប់មូលហេតុដើម្បីបិទខ្ទប់ការចេញផ្សាយរបាយការណ៍អង្កេតនេះ ពីព្រោះថា បើវាចេញផ្សាយទៅ នឹងធ្វើឱ្យលោកនាយករដ្ឋមន្ត្រី បាក់មុខ បាត់បង់ប្រជាប្រិយភាព និងអាចនឹងមានសំណាងតិចតួច ដើម្បីឈ្នះឆ្នោត នៅថ្ងៃទី១២ធ្នូ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ