លោកស្រី យីងឡាក់ ប្រថុយធ្វើយុទ្ធនាការSelfies ដើម្បីនយោបាយ
ចំនួនអ្នកគាំទ្រទំព័រហ្វេសប៊ូករបស់លោកស្រីយីងឡាក់ បានឡើងដល់ជាង៥លាននាក់ ! ដើម្បីអបអរនិងថ្លែងអំណរគុណដល់Fans អតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត់ បានចេញធ្វើទស្សនាចរណ៍មួយជុំប្រទេស និងបានទៅដល់នៅថ្ងៃសៅរ៍និងអាទិត្យនេះ តំបន់ភាគខាងជើង ដែលជាមូលដ្ឋានរបស់ក្រុមអាវក្រហម។ លោកស្រីបានឆ្លៀតប្រើឱកាសដ៏ស្និទ្ធស្នាល ថតរូបសែលហ្វីការជួបជុំប្រកបដោយនិម្មិតរូប ដើម្បីបង្ហាញមិត្តរបស់លោកស្រីក្នុងប្រព័ន្ធសង្គមថា ត្រកូលស៊ីណាវ៉ាត់ នៅតែអាចធ្វើនយោបាយបាន បើទោះបីជារបបសឹកបិទខ្ទប់ផ្លូវយ៉ាងណាក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣១
បន្ទាប់ពីសំងំធ្វើចាញ់ មិនសូវចេញមុខចេញមាត់ អស់មួយរយៈធំមក នៅពេលនេះ លោកស្រី យីងឡាក់ បានលេចមុខជាថ្មី ក្រោមលេសជាផ្លូវការមួយថា ចេញធ្វើទស្សនកិច្ចវប្បធម៌ ដើម្បីអរគុណដល់ពលរដ្ឋថៃដែលបានគាំទ្រលោកស្រីក្នុងទំព័រហ្វេសប៊ូក។ ទំព័រប្រព័ន្ធសង្គមដែលមានFans ដល់ទៅជាង៥លាននាក់។
ថ្ងៃនេះលោកស្រីបានទៅខេត្តPhrae ភាគខាងជើងប្រទេស ដែលគ្រប់គ្នាបានដឹងស្រាប់ហើយថាជាតំបន់របស់ក្រុមអាវក្រហម ចលនាប្រជាជនដ៏ខ្លាំងក្លា មានភក្តីភាព និងគាំទ្រ ត្រកូលស៊ីណាវ៉ាត់ និងជាការគំរាមកំហែងសម្រាប់ក្រុមអ្នកអភិរក្សជាន់ខ្ពស់នៅក្រុង គាំទ្ររាជវង្ស នៅរាជធានីបាងកក ឬហៅខ្លីថាក្រុមអាវលឿង ដែលហាក់ដូចជាកំពុងជ្រួលច្រាល នឹងស្ថានភាពសុខភាពធ្លាក់ចុះរបស់ព្រះមហាក្សត្រ។
តាំងពីឆ្នាំ២០១៤មក ក្រោយការធ្វើរដ្ឋប្រហារទម្លាក់លោកស្រី យីងឡាក់ ចេញពីតំណែងមក មេដឹកនាំសឹកថៃ បានឡើងកាន់អំណាច និងបានហាមឃាត់រាល់គ្រប់ទម្រង់នៃការប្រមូលផ្តុំនយោបាយ។ ប៉ុន្តែនៅថ្ងៃនេះ និងក៏ដូចនៅតាមខេត្តផ្សេងៗដែលលោកស្រីបានទៅដល់ដែរ ពលរដ្ឋថៃភាគខាងជើង បានមកជួបជុំគ្នា ក្នុងសម្លៀកបំពាក់អាវយឺតក្រហម ប្រកបដោយនិម្មិត្តរូបរបស់ចលនាប្រជាជន ថតរូបសែលហ្វី មកធ្វើបុណ្យនៅវត្តជាមួយលោកស្រី យីងឡាក់ យ៉ាងច្រើនកុះករ និងស្រែកអបអរដោយគ្មានញញើតចង់ឃើញលោកស្រី យីងឡាក់ ដែលសម្រាប់ពួកគេស្អាតទាំងរូប ទាំងចិត្ត បានក្លាយជាប្រមុខដឹកនាំប្រទេសជាថ្មី។
ការជួបជុំដែលប្រៀបបាន នឹងស្នូរគោះជួងសេរីភាព ឱ្យបានលាន់រន្ទឺឡើងនៅក្នុងវត្ត។ តើនេះមិនមែនជានិម្មិត្តរូបនយោបាយដែលលោកស្រីយីងឡាក់ បានបង្វៀងរៀបចំឡើងប្រកបភាពឆ្លាតវៀងវៃទេឬ ?
ទោសធ្ងន់១០ឆ្នាំក្នុងពន្ធនាគារ
លោកស្រីយីងឡាក់ ត្រូវបានសភាថៃបោះឆ្នោតហាមប្រាមមិនឱ្យធ្វើនយោបាយរយៈពេល៥ឆ្នាំ គិតចាប់ពីឆ្នាំ២០១៤មក ! ប៉ុន្តែសម្រាប់សកម្មជន សវនការអស់នេះ មានលក្ខណៈនយោបាយសុទ្ធសាធ ដើម្បីបំបិទផ្លូវលោកស្រីតែប៉ុណ្ណោះ។ ឯលោកស្រីយីងឡាក់ ក៏បានសុខចិត្តសំងំធ្វើចាញ់ លាក់មុខ ដើម្បីការពារខ្លួន និងបានចៀសវាងមិនដើរតាមគន្លងបងប្រុសធ្វើនិរទេសខ្លួនទៅបរទេស ដើម្បីគេចពីតុលាការឡើយ។
ក្នុងបរិបទបែបនេះ យើងពិតជាមើលឃើញថា ដំណើរទស្សនកិច្ចវប្បធម៌ ដែលលោកស្រីបានប្រសិទ្ធិនាមថា “ប្រយុទ្ធដោយប្រើភាពញញឹម” ជាទង្វើមួយ ដ៏ប្រថុយប្រថានមួយ តែក៏អាចជាការជ្រ-ល ចិត្តដែលលោកស្រី យីងឡាក់ ចង់ស្ទាបស្ទង់មើល ក្នុងនាមលោកស្រីជាអ្នកជាប់បម្រាមអាជ្ញាធរមិនឱ្យធ្វើដំណើរទៅបរទេស ដោយហេតុតែកំពុងជាប់សវនាការ។
លោកស្រីបានដឹងយ៉ាងច្បាស់អំពីចំណុចនិងផលវិបាកនេះ ! លោកស្រីក៏បានបញ្ជាក់ដោយផ្ទាល់មាត់ខ្លួនឯងនៅថ្ងៃនេះ ទៅកាន់អ្នកសារព័ត៌មាន ថា “លោកស្រីជាប់បម្រាម៥ឆ្នាំ ! តែអ្វីដែលលោកស្រីអាចធ្វើបានគឺជួយប្រជាជនទៅតាមសមត្ថភាពលោកស្រី ជួយឃោសនាឱ្យមានសកម្មភាពវប្បធម៌ និងការដើរកំសាន្ត។ មិនមែនជាពេលវេលាដែលលោកស្រីធ្វើនយោបាយឡើយ។
ជាផ្លូវការ បើតាមប្រសាសន៍លោកស្រី គ្មានអ្វីជាសកម្មភាពផ្ទុយនឹងបម្រាមអាជ្ញាធរទេ ប៉ុន្តែយើងមិនទាន់អាចដឹងឡើយថាតើមេដឹកនាំសឹកយល់ស្របតាម និងបណ្តោយឱ្យលោកស្រីបន្តសកម្មភាពវប្បធម៌បែបនេះទៀតនោះ។ របបសឹកអាចមិនធ្វើអ្វីនៅពេលនេះ តែតុលាការអាចខ្ទាស់ លោកស្រីយីងឡាក់បានគ្រប់ពេលវេលា ព្រោះថាក្តីក្តាំពីបទប្រព្រឹត្តអំពើពុករលួយ ធ្វេសប្រហែសទិញស្រូវពីប្រជាជននាំឱ្យខូចសេដ្ឋកិច្ចជាតិ កំពុងស្ថិតក្នុងដំណើរការសវនាការ និងដែលនឹងអាចនាំលោកស្រីឱ្យចូលពន្ធនាគារដល់ទៅ១០ឆ្នាំ។
សវនាការនេះបានចាប់ផ្តើមបើកតាំងពីខែមករាដើមឆ្នាំមក និងត្រូវការប្រើពេលវេលា ប្រហែលមួយឆ្នាំដែរ។ នៅខែវិច្ឆិកាខាងមុខ នឹងដល់វេនចុងចោទ ត្រូវឡើងការពារខ្លួន។ ទោសដែលធ្ងន់បំផុតគឺអាចនឹងត្រូវជាប់ទោសក្នុងពន្ធនាគារដល់ទៅ ១០ឆ្នាំ។ តែលោកស្រីយីងឡាក់ តែងបានការពារខ្លួនជានិច្ចថា ការប្រមូលទិញស្រូវអង្ករពីពលរដ្ឋ ជាជំនួយចាំបាច់របស់រដ្ឋាភិបាលចំពោះប្រជាជនក្រីក្រ។
ហើយអ្វីជាការកត់សម្គាល់ គឺលោកស្រីយីងឡាក់ ជាប់បណ្តឹងដោយមកពីរបបសឹកយល់ថាពុករលួយ ទិញស្រូវប្រជាជនថ្លៃជាងទីផ្សារ ធ្វើឱ្យលក់មិនចេញ ខាតប្រយោជន៍សេដ្ឋកិច្ចជាតិ ទើបនាំលោកស្រីទៅតុលាការ តែពេលនេះ មេដឹកនាំសឹកក៏កំពុងអនុវត្តនយោបាយដូចលោកស្រីយីងឡាក់ដែរ ដោយបានប្រមូលទិញកៅស៊ូ ពីប្រជាជនក្នុងតម្លៃខ្ពស់ជាងទីផ្សារ។
សរុបទៅ របបសឹកបានធ្វើគ្រប់យ៉ាងក្នុងបំណងតែមួយគត់គឺទប់ស្កាត់មិនឱ្យលោកស្រីយីងឡាក់ ឬត្រកូលស៊ីណាវ៉ាត់ ដែលតែងតែឈ្នះឆ្នោតរហូតមក បានត្រលប់មកកាន់តំណែងវិញប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ