ទូកដឹកជនភៀសខ្លួនរាប់រយនាក់ក្រឡាប់ក្បែរកោះក្រិក សាកសពជនភៀសខ្លួន១០៤នាក់ផ្សេងទៀតទើលើឆ្នេរលីប៊ី
ទូកដឹកជនភៀសខ្លួនរាប់រយនាក់បានក្រឡាប់លិច នៅថ្ងៃសុក្រ៣មិថុនា នៅសមុទ្រមេឌីទែរ៉ាណេ ក្បែរកោះមួយរបស់ក្រិក។ សាកសពជនរងគ្រោះយ៉ាងហោច៤នាក់ត្រូវបានគេស្រង់ឡើង។ ប្រតិបត្តិការសង្គ្រោះបានបន្តធ្វើ និងបានជួយជនរងគ្រោះ៣៤០នាក់អោយរួចផុតពីគ្រោះថ្នាក់។ នៅឆ្នេរZouara ភាគខាងលិចលីប៊ីវិញ គេបានរកឃើញសាកសពជនភៀសខ្លួន១០៤នាក់ ដែលអាចរងគ្រោះលិចទូកកាលពីសប្តាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
យោងតាមអង្គការអន្តោប្រវេសន៍អន្តរជាតិ MOI ទូកដឹកជនភៀសខ្លួនរាប់រយនាក់ដែលក្រឡាប់លិច នៅសមុទ្រមេឌីទែរ៉ាណេ ក្បែរកោះក្រិក នៅថ្ងៃសុក្រ៣មិថុនានេះ ជាទូកធ្វើដំណើរមកពីអាហ្វ្រិក ហើយដឹកជនភៀសខ្លួនយ៉ាងហោច៧០០នាក់។ ក្រុមប៉ូលិសកំពង់ផែក្រិកមិនបានបញ្ជាក់តួលេខនេះទេ តែលើកឡើងថា នៅលើទូក មានមនុស្សរាប់រយនាក់។
កងល្បាតដែនសមុទ្រអ៊ីតាលីបានទទួលដំណឹងអាសន្នពីកប៉ាល់រកស៊ីមួយគ្រឿង កាលពីល្ងាចថ្ងៃព្រហស្បតិ៍ ប្រាប់ថា មានកប៉ាល់ជនភៀសខ្លួន កំពុងជួបបញ្ហា នៅតំបន់ចន្លោះដែនទឹកក្រិកនិងអេហ្ស៊ីប។ ប៉ូលិសកំពង់ផែប្រាប់ថា នឹងបញ្ជូនជនភៀសខ្លួន ដែលរួចផុតពីគ្រោះថ្នាក់ក្រឡាប់ទូកនេះ បែងចែកចំនួនទៅអ៊ីតាលី និងអេហ្ស៊ីប អោយស្របតាមច្បាប់សមុទ្រចែងពីការសង្គ្រោះ។
ប៉ូលិសក្រិកទើបតែបានចាប់ទូកមួយគ្រឿង ដឹកជនភៀសខ្លួនស៊ីរី អាហ្វហ្កានីស្ថាន និងប៉ាគីស្ថាន កាលពីថ្ងៃ២៧ឧសភាប៉ុណ្ណោះ។ ការលិចទូកថ្ងៃសុក្រនេះ អាចបញ្ជាក់ថា ក្រុមជួញដូរជនភៀសខ្លួន ប្រហែលជាចង់បើកបរទូកគេចពីកងកម្លាំងអង្គការអូតង់ ដែលឃ្លាំយាម នៅតំបន់ចន្លោះឆ្នេរតួកគី និងឆ្នេរក្រិក។ គិតតាំងពីដើមឆ្នាំ២០១៦មក ជនភៀសខ្លួនជិត៤០០នាក់ ក្នុងនោះមានកុមារច្រើនសន្ធឹកសន្ធាប់ បានស្លាប់ក្នុងហេតុការណ៍លិចទូកផ្សេងៗ។
កាលពីថ្ងៃ២០មិនា កិច្ចព្រមព្រៀងរវាងសហភាពអឺរ៉ុបនិងតួកគី ស្តីពីការប្រយុទ្ធប្រឆាំងការជួញដូរជនភៀសខ្លួន បានចូលជាធរមាន ។ កិច្ចព្រមព្រៀងចែងតំរូវអោយតួកគីពង្រឹងការប្រឆាំងការជួញដូរជនភៀសខ្លួន ចាប់ពីឆ្នេរសមុទ្រតួកគីទៅ។ ជាការផ្តោះប្តូរ សហភាពអឺរ៉ុបជួយគាំទ្រនយោបាយនិងហិរញ្ញវត្ថុអោយតួកគី។ តាំងពីកិច្ចព្រមព្រៀងចូលជាធរមាននិងមានការពង្រាយកងកម្លាំងល្បាតមក ការឆ្លងទូកដឹកជនភៀសខ្លួនមកអឺរ៉ុប បានធ្លាក់ចុះជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ