នាយករដ្ឋមន្ត្រីរុស្ស៊ីមេដវេដេវបំពេញទស្សនកិច្ចនៅប្រទេសឡាវ
ក្នុងក្របខ័ណ្ឌទស្សនកិច្ចប្រមុខរដ្ឋាភិបាលចូលរួមក្នុងជំនួបកំពូលនៃ”វេទិកាអាស៊ី-អឺរ៉ុប” ASEM ដែលបើកធ្វើថ្ងៃនេះនៅក្រុងវៀងច័ន្ទន៍។ វេទិកាដែលប្រទេសរុស្ស៊ី ត្រូវបានទទួលចូលជាសមាជិកកាលពីពីរឆ្នាំមុននិងជាពិសេស គឺពិភាក្សាជាមួយថ្នាក់ដឹកនាំឡាវអំពីទំនាក់ទំនងទ្វេភាគី មានបញ្ហាបំណុលដែលឡាវជំពាក់រុស្ស៊ីតាំងពីជំនាន់សហភាពសូវៀតមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
លោកនាយករដ្ឋមន្ត្រីរុស្ស៊ី មេដវេដេវថ្ងៃនេះត្រូវបានទទួលជួបដោយលោកប្រធានាធិបតីឡាវ Choummaly Sayasoneនិងធ្វើកិច្ចចរចាជាមួយសមភាគីឡាវគឺ លោកនាយករដ្ឋមន្ត្រីThonsing Thammavon។ គូភាគីបានពិភាក្សាទៅលើបញ្ហានៃសហប្រតិបត្តិការវិស័យយោធាបច្ចេកទេស,ទំនាក់ទំនងពាណិជ្ជកម្មសេដ្ឋកិច្ច,ការបំផុសបំផុលចំណងទ្វេភាគី តាមមុខព្រួញ Business ក្នុងនោះ មានទាំងដំណោះស្រាយរឿងបំណុលដែលឡាវជំពាក់រុស្ស៊ីតាំងពីសម័យសូវៀតមក។
ខាងផ្នែកយោធា៖ដោយហេតុថាកងទ័ពឡាវប្រដាប់សឹង១០០% ដោយអាវុធសូវៀតដែលមានបញ្ជូនទៅតាំងពីក្នុងរង្វង់ទសវត្សរ៍ទី៧០-៨០ហើយពួកយោធាឡាវទម្លាប់ប្រើអាវុធរុស្ស៊ី គូភាគីដាក់ទិសបន្តសហប្រតិបត្តិការតាមមុខព្រួញនេះតទៅទៀតបែបយ៉ាងទទួលគេមក បណ្តុះបណ្តាលនៅតាមសាលាយោធារុស្ស៊ីព្រមទាំងកម្លាំងមហាផ្ទៃឡាវផងដែរ។
ខាងផ្នែកពាណិជ្ជកម្ម៖ រុស្ស៊ីតែងបង្កើតលក្ខណៈអនុគ្រោះបំផុតសម្រាប់ឡាវ។ តាមតួលេខនៃ”មន្ទីរចម្រុះពាណិជ្ជកម្មនិងឧស្សាហកម្មរុស្ស៊ី” ក្នុងឆ្នាំ២០១១កន្លងទៅ ការផ្តោះប្តូរទំនិញ រវាងប្រទេសទាំងពីរបានកើនឡើង៥ដង បើប្រៀបទៅនឹងឆ្នាំ២០១០ លុះដល់ទឹកប្រាក់៤៦លានដុល្លារអាមេរិក។ គូភាគី ដាក់ទិសបង្កើនការផ្តោះប្តូរនេះ ឲ្យកាន់តែសកម្មទៅទៀត។
ក្រមហ៊ុនអាកាសចរណ៍ឡាវ កំពុងធ្វើកិច្ចចរចា ដើម្បីទិញយន្តហោះស៊ីវិលរុស្ស៊ីស្រករថ្មីម៉ាក Sukhoi Superjet-100 អាចផ្ទុកអ្នកដំណើរបាន១០០នាក់សម្រាប់ហោះ ទៅចម្ងាយមធ្យមពី៣.០០០ដល់ ៤.៥០០គម ដែលឆ្លើយស្របនឹងតម្រូវការរបស់ប្រទេសឡាវ។
អំពីបញ្ហាបំណុល៖ ស្របនឹងកិច្ចព្រមព្រៀងចុះឆ្នាំ២០០៣ រុស្ស៊ី ដែលជាប្រទេសម្ចាស់បំណុលដោយបំពេញតាមល័ក្ខខ័ណ្ឌខ្លួនជាសមាជិកក្រុមប្រទេសផ្តល់ប្រាក់កម្ចីហៅថា Club de Paris បានកាត់អស់៧០% បំណុលដែលឡាវជំពាក់ខ្លួនក្នុងទំហំ ១.២៩០លានដុល្លារអាមេរិកទាល់តែនៅសល់ត្រឹម ៣៨៨លានដុល្លារទុកឲ្យឡាវសងក្នុងរយៈពេល៣៣ឆ្នាំ សងជាភាគៗ កន្លះឆ្នាំម្តងហើយក្នុងករណីមានការអាក់ខានភាគីឡាវក៏ត្រូវបង់ទាំងការប្រាក់នៃភាគនោះទំហំពី ២,២៥% ដល់៥,៨៥%ហើយប្រាក់ដែលសងនោះគឺជា ដុល្លារអាមេរិកតែម្តង។
នាកិច្ចចរចាថ្ងៃនេះ ភាគីឡាវយកចិត្តទុកដាក់ឲ្យប្រែបំណុលនោះទៅជា វិនិយោគបញ្ចូលទៅក្នុងគម្រោងផងទាំងឡាយនៅក្នុងប្រទេសឡាវដែលមានការចូលរួមរបស់រុស្ស៊ី និងសម្រាប់ផ្តល់ជាហិរញ្ញប្បទានដល់គម្រោងវិនិយោគរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ