ឈើខុសច្បាប់ជាង៧ម៉ឺនម៉ែត្រគូបរកឃើញក្នុងប្រតិបត្តិការបង្ក្រាបបទល្មើសជាង៤ខែ
គណៈកម្មការជាតិបង្ក្រាប និងទប់ស្កាត់បទល្មើសព្រៃឈើ បានបញ្ជូនរបាយការណ៍នៃប្រតិបត្តិការបង្ក្រាបព្រៃឈើ ដែលផ្តើមតាំងពីខែមករាឆ្នាំ ២០១៦ ទៅកាន់រដ្ឋាភិបាលហើយ កាលពីថ្ងៃទី ១៨មេសា។ ក្នុងរបាយការណ៍នោះ បានបង្ហាញថា បានរកឃើញឈើខុសច្បាប់ជាង ៧ម៉ឺនម៉ែត្រគូប និងបានប្តឹងឈ្មួញរកស៊ីចំនួន ៥៧ករណី ទៅតុលាការ។ ក្រោយពីទទួលរបាយការណ៍ លោកនាយករដ្ឋមន្ត្រីហ៊ុន សែន បានចាត់លោកឧបនាយករដ្ឋមន្ត្រី ប៊ិន ឈិន ឲ្យដឹកនាំកិច្ចប្រជុំ ដើម្បីកំណត់ការងារបន្ត។
ចុះផ្សាយនៅថ្ងៃ៖
ស្តាប់ - ០២:០៦
អ្នកនាំពាក្យគណៈកម្មការជាតិបង្ក្រាប និងទប់ស្កាត់បទល្មើសព្រៃឈើ លោកអេង ហ៊ី បានប្រាប់វិទ្យុបារាំងនៅថ្ងៃព្រហស្បតិ៍នេះថា បន្ទាប់ពីបានចុះត្រួតពិនិត្យ នៅតាមក្រុមហ៊ុន និងទីតាំងស្តុកឈើ គេបានរកឃើញឈើខុសច្បាប់ជាង ៧ម៉ឺនម៉ែត្រគូប និងបានកសាងសំណុំរឿងតាមការរាយការណ៍របស់បណ្តាខេត្ត ទៅកាន់តុលាការ បានចំនួន ៥៧ករណី។ ហើយពេលនេះ អយ្យការអមតុលាការ កំពុងតែរៀបចំដីកាកោះហៅ ទៅតាមសមត្ថកិច្ចរបស់ខ្លួន។
តាមលោកអេង ហ៊ី ក្រោយពេលគណៈកម្មការបានដាក់របាយការណ៍ទៅកាន់រដ្ឋាភិបាលហើយ លោកនាយករដ្ឋមន្ត្រីហ៊ុន សែន បានចាត់តាំងលោកឧបនាយករដ្ឋមន្ត្រី ប៊ិន ឈិន មន្ត្រីជាន់ខ្ពស់នៃគណបក្សប្រជាជនកម្ពុជា ឲ្យរៀបចំដឹកនាំកិច្ចប្រជុំ ដើម្បីកំណត់ពីការងារបន្តទៀត។ កិច្ចប្រជុំ ដែលលោកអេង ហ៊ី មិនទាន់អាចបញ្ជាក់ពីកាលបរិច្ឆេទនៅឡើយទេ។
តាមរបាយការណ៍របស់គណៈកម្មការជាតិបង្ក្រាប និងទប់ស្កាត់បទល្មើសព្រៃឈើ ដែលបានធ្វើឡើងក្នុងតំបន់ភាគឦសាននៃប្រទេស រួមមានតាមខេត្តកំពង់ចាម ត្បូងឃ្មុំ ក្រចេះ ស្ទឹងត្រែង រតនគិរី និងខេត្តមណ្ឌលគិរី បានរកឃើញថា ខេត្តដែលរងបទល្មើសព្រៃឈើច្រើនជាងគេ គឺខេត្តមណ្ឌលគិរី។ យ៉ាងណាក៏ដោយ អ្នកនាំពាក្យគណៈកម្មការនេះ ហ៊ានអះអាងថា ក្រោយពេលប្រតិបត្តិការបានបញ្ចប់ ស្ថានភាពបទល្មើសព្រៃឈើនានា គឺបានស្ងប់ស្ងាត់ទាំងស្រុង មិនមានការកាប់ឈើ ឬដឹកឈើទៅក្រៅប្រទេសនោះទេ។ លើសពីនេះ អ្នកប្រព្រឹត្តបទល្មើស ក៏បានយកឧបករណ៍ និងចាកចេញពីក្នុងព្រៃអស់រលីង។
លោកអេង ហ៊ី បានបញ្ជាក់ថា ទោះបីជាគណៈកម្មការជាតិបង្ក្រាប និងទប់ស្កាត់បទល្មើសព្រៃឈើ អស់សុពលភាពក៏ដោយ ប៉ុន្តែលោកហ៊ានធានាថាបទល្មើសព្រៃឈើ នឹងមិនកើតឡើងទៀតទេ។ មិនកើតឡើង ព្រោះរាជរដ្ឋាភិបាល នឹងមានវិធានការបន្ត ឲ្យថ្នាក់ខេត្ត នៅតែអនុវត្ត។ ហើយយោងតាមអនុសាសន៍របស់លោកនាយករដ្ឋមន្ត្រីហ៊ុន សែន ដែលប្រកាសឲ្យឈើ ដែលរឹបអូសបាន ប្រគល់ទៅក្រសួងអប់រំនោះ ក៏ជាផ្នែកមួយ អាចទប់ស្កាត់បទល្មើសព្រៃឈើបានផងដែរ។
សូមបញ្ជាក់ថា កាលពីខែមីនាកន្លងទៅ ក្នុងពិធីបិទសន្និបាតក្រសួងអប់រំ យុវជន និងកីឡា ប្រមុខដឹកនាំរដ្ឋាភិបាលកម្ពុជា បានសម្រេចបញ្ជាឲ្យប្រគល់ឈើទាំងអស់ ដែលរឹបអូសបានពីការកាប់ឈើខុសច្បាប់ ទៅឲ្យក្រសួងអប់រំ ប្រើប្រាស់កសាងសាលារៀន សាងសង់ផ្ទះឲ្យគ្រូបង្រៀន និងច្នៃជាសម្ភារៈប្រើប្រាស់ផ្សេងៗ ក្នុងប្រព័ន្ធអប់រំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ