អតីតនាយករដ្ឋមន្ត្រី ប៊ូបាកា កីតា ឈ្នះសម្លេងឆ្នោតប្រធានាធិបតីម៉ាលីជុំទីមួយ
យោងតាមលទ្ធផលផ្លូវការនៃការបោះឆ្នោតប្រធានាធិបតីប្រទេសម៉ាលី ជុំទីមួយ ដែលចេញផ្សាយ នៅថ្ងៃសុក្រម្សិលមិញនេះ អតីតនាយករដ្ឋមន្ត្រី អ៊ីប្រាហ៊ីម ប៊ូបាកា កីតា បានទទួលជោគជ័យ ដោយទទួលបានសម្លេង ៣៩,២ភាគរយ លើសពីគូប្រជែងលោក គឺលោក ស៊ូម៉ៃឡា ស៊ីសសេ អតីតរដ្ឋមន្ត្រីក្រសួងហិរញ្ញវត្ថុ ដែលទទួលបានសម្លេង ១៩,៤ភាគរយ។ ដោយសារគ្មានសម្លេងច្រើនដាច់ខាតដូចដែលសកម្មជនរបស់លោក កីតា បានគិតទុកនោះ ការបោះឆ្នោតជុំទីពីរ នឹងប្រព្រឹត្តទៅនៅថ្ងៃទី ១១សីហាខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ប្រជាជនម៉ាលីនៅភាគខាងត្បូងប្រទេស បានបោះឆ្នោតគាំទ្រអតីតនាយករដ្ឋមន្ត្រី អ៊ីប្រាហ៊ីម ប៊ូបាកា កីតា អោយឈ្នះក្នុងជុំទីមួយ ជាមួយសម្លេងឆ្នោត៣៩,២ភាគរយ។ ទន្ទឹមនេះដែរ គូប្រជែងលោក កីតា គឺលោក ស៊ីសសេ បានទទួលការគាំទ្រជាមួយសម្លេង១៩,៤ភាគរយ ពីប្រជាជននៅភាគខាងជើងប្រទេស។
បេក្ខជនផ្សេងទៀតដូចជា Dramane Dembélé មកពីគណបក្សសម្ព័ន្ធប្រជាធិបតេយ្យម៉ាលី ទទួលបានសម្លេងជិត ៩,៦ភាគរយ ហើយលោក ម៉ូប៊ីដូ ស៊ីឌីបេ ដែលជាអតីតនាយករដ្ឋមន្ត្រីម៉ាលី មួយរូបផ្សេងទៀតនោះ ទទួលសម្លេង៤,៩ភាគរយ។
ដោយឡែក អ្វីដែលគួរអោយកត់សម្គាល់ក្នុងការបោះឆ្នោតនេះ គឺថា សម្លេងឆ្នោតដែលមិនអាចយកជាការបាន មានដល់ទៅ ៤សែន៣ពាន់សម្លេង។ បេក្ខជនស៊ីសសេ មានការសង្ស័យថា មានភាពមិនប្រក្រតី ហើយបានសុំអោយមានវិធានការច្បាស់លាស់សំរាប់ការបោះឆ្នោតជុំទីពីរ ដើម្បី ទប់ស្កាត់ការក្លែងបន្លំ។
គួររំលឹកឡើងវិញថា ប្រជាជនម៉ាលីដែលចូលរួមបោះឆ្នោតប្រធានាធិបតីជុំទីមួយ កាលពីថ្ងៃអាទិត្យសប្តាហ៍មុន មានប្រមាណ ៦លាន៩សែននាក់ ត្រូវនឹង៥១,៥ភាគរយ ជាភាគរយដ៏ខ្ពស់។ ការបោះឆ្នោតប្រធានាធិបតីកន្លងមក ភាគរយអ្នកបោះឆ្នោតមានមិនហួស៣៨ភាគរយឡើយ។ អនាគតប្រធានាធិបតីម៉ាលីដែលនឹងត្រូវរើសចេញពីការបោះឆ្នោតជុំទីពីរ នៅថ្ងៃ១១សីហាខាងមុខ មានភារកិច្ចចាំបាច់បំផុតចំពោះមុខ គឺត្រូវធ្វើយ៉ាងណា ស្តារសេដ្ឋកិច្ចប្រទេស និងធ្វើអោយជនរួមជាតិរួបរួមគ្នាឡើងវិញ។
ចាប់ពីខែមករា ឆ្នាំ ២០១២មក ប្រទេសម៉ាលីមានស្ថានភាពនយោបាយនិងយោធាមិននឹងនរ។ នៅភាគខាងជើង មានការវាយប្រហារពីក្រុមឧទ្ទាមទូអារ៉េក បន្ទាប់មកទៀត មានរដ្ឋប្រហារកើតឡើង ហើយឧក្រិដ្ឋជននិងក្រុមជីហាដពាក់ព័ន្ធនឹងក្រុមអាល់កៃដា បានកាន់កាប់ភាគខាងជើងប្រទេស។
បារាំងបានផ្តួចផ្តើមគំនិតធ្វើអន្តរាគមន៍យោធាដោយមានទ័ពបារាំងនិងទ័ពបរទេសផ្សេងទៀតចូលរួម បានរំដោះម៉ាលីចេញពីកណ្តាប់ដៃក្រុមឧទ្ទាម ដោយជោគជ័យ។ រដ្ឋាភិបាលបារាំងបានដាក់សម្ពាធរដ្ឋាភិបាលអន្តរកាលម៉ាលី អោយរៀបចំការបោះឆ្នោត ដែលបានប្រព្រឹត្តទៅកាលពីខែកក្កដាមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ