សំដីខ្សឹបខ្សៀវរបស់លោកអូបាម៉ា ស្រាប់តែបែកការណ៍នាំឲ្យគេផ្អើល
សំដីខ្សឹបខ្សៀវនេះត្រូវបានលោកប្រធានាធិបតីអាមេរិកអូបាម៉ា ធ្វើទៅសមភាគី រុស្ស៊ី លោកមេដវេដេវ មុននឹងចាប់ផ្តើមសន្និសីទសារព័ត៌មាន បូកសរុបតុល្យាការនៃកិច្ចចរចា រវាងប្រមុខរដ្ឋទាំងពីរ ដែលបានប្រព្រឹត្តទៅក្នុងបរិវេណ “ជំនួបកំពូលស្តីអំពីសន្តិសុខនុយក្លេអ៊ែរ” នៅ ទីក្រុងសេអ៊ូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
គួរនិយាយថា ជំនួបទ្វេភាគី រវាងលោក អូបាម៉ា និង លោកមេដវេដេវ បានពន្យារទៅ អស់៤០នាទី ក្នុងលក្ខណៈបិទទ្វារ។ ក្នុងជំនួបនេះ គូភាគី នៅតែខ្វែងគំនិតគ្នាដដែល ជុំវិញបញ្ហា “ប្រព័ន្ធខែលមីស្ស៊ីល ប្រឆាំងមីស៊្សីល“ ដែលអាមេរិកកំពុងបង្កើតឡើង នៅលើដែនដី ទ្វីបអឺរ៉ុប ជិតព្រំប្រទល់រុស្ស៊ី ហេតុដែលតាមយោបល់ម៉ូស្គូ គឺនឹងបន្សោយ សក្តានុពល នៃ អាវុធបរមាណូរុស្ស៊ី បានន័យថា ជាគ្រោះថ្នាក់ដល់សន្តិសុខជាតិរុស្ស៊ីតែម្តង។
ដើម្បីឲ្យភាគីរុស្ស៊ីស្ងប់ចិត្ត លោកអូបាម៉ា បាននិយាយខ្សឹបៗទៅ លោកមេដវេដេវ ៖ “ ចាំគាត់ជាប់ឆ្នោតជាថ្មី ជាប្រធានាធិបតីស.រ.អា.នៅខែវិច្ឆិកាខាងមុខសិន ទើបគាត់មាន លំហទូលាយ សម្រាប់បត់បែន ក្នុងបញ្ហានេះ។ សូមលោក ពាំនាំរឿងនេះទៅជម្រាប លោកពូទីន ដែលជាប់ឆ្នោតជាប្រធានាធិបតី ថ្មីនៅរុស្ស៊ីផង”។ លោកមេដវេដេវ ពីចំណែកខ្លួន បានសន្យាទៅលោក អូបាម៉ាថា គាត់នឹងជម្រាបទៅលោកពូទីន ឲ្យបានជ្រាបអំពីរឿងនេះ។ ប៉ុន្តែ សំដីខ្សឹបខ្សៀវនោះ របស់លោកអូបាម៉ា ស្រាប់តែឮដល់ ត្រចៀកពួកអ្នកកាសែត មកពីប្រដាប់បំពងសំឡេង ត្រូវគេបើកឲ្យដើរ តាំងពីមុនដល់ពេលផ្តើម សន្និសីទសារពត៌មានម៉្លេះ។
សាច់រឿងដែលមានត្រូវបានលើកយកមក ចុះផ្សាយថ្ងៃនេះ ដោយកាសែតរុស្ស៊ីមួយចំនួន។ កាសែតខ្លះ បែបយ៉ាង Izvestia ចុះផ្សាយ ទាំងស្រុងតែម្តង ឃ្លាខ្សឹបខ្សៀវនោះជាភាសាអង់គ្លេស ទាំងអមទៅដោយការបកប្រែក្នុងវង់ក្រចក ជាភាសារុស្ស៊ីទៅផង។ ន័យនៃឃ្លាទាំងនោះ គឺនៅ ត្រង់ពាក្យថា ”លំហ” ជាកត្តាសំខាន់ សម្រាប់ដោះស្រាយឲ្យបានរួច បញ្ហាទាក់ទង នឹង ”ប្រព័ន្ធខែលមីស៊្សីលប្រឆាំងមីស្ស៊ីល”។ កាសែត ចុះផ្សាយ គឺ ការបកស្រាយបីបែប ដូចតទៅ ៖
ទី១- តាមមតិប្រភពក្នុងវិមានក្រេមឡាំង លោកអូបាម៉ា ចង់និយាយអំពីលំហតូចចង្អៀត សម្រាប់ គាត់ដំណើរការ ក្នុងសម័យឃោសនាបោះឆ្នោត ទៅទល់ខែវិច្ឆិកាឆ្នាំនេះ។
ទី២- លោកអូបាម៉ា ចង់និយាយអំពីការចូលរួមរបស់លោកមេដវេដេវ ក្នុងឋានៈជា នាយករដ្ឋមន្ត្រីទៅហើយ ក្នុងកិច្ចចរចាជុំវិញ រឿងប្រព័ន្ធខែលនោះ។
ទី៣- លោកអូបាម៉ាសង្ឃឹមថា រុស្ស៊ី គង់នឹងចូលរួមពុំខាន ក្នុងការបង្កើតប្រព័ន្ធនេះ ដោយរួម ជាមួយអាមេរិក ដើម្បីប្រឈមដូចគ្នា ទល់នឹងការគំរាមលើខ្លួន។
ប៉ុន្តែក្នុងដំណាក់កាលឥឡូវ ការធ្លាយចេញមកនៃ សំដីខ្សឹបខ្សៀវនេះញ៉ាំងឲ្យកើតឡើងជារឿងអាស្រូវ ទៅហើយ នៅអាមេរិកផ្ទាល់។ តាមកាសែតរុស្ស៊ី ពួកបេក្ខជននៃគណបក្សសាធារណរដ្ឋ មាន លោក Mitt Romney ជាដើម នាំគ្នាចោទលោក អូបាម៉ា ខាងគណបក្សប្រជាធិបតេយ្យ ថា កំពុងក្បត់ នឹង ផលប្រយោជន៍របស់ ស.រ.អា.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ