ប្រមុខចារកិច្ចអាមេរិកចូលខ្លួនបំភ្លឺព្រឹទ្ធសភាជុំវិញការវាយប្រហារតាមប្រព័ន្ធអ៊ីនធ័រនែតពីរុស្ស៊ី
នៅក្នុងពេលកំពុងមានបញ្ហាចម្រូងចម្រាសខ្លាំងជាមួយនឹងប្រធានាធិបតីទើបនឹងជាប់ឆ្នោត គឺលោកដូណាល់ត្រាំ ប្រមុខទីភ្នាក់ងារចារកិច្ចអាមេរិកត្រូវចូលខ្លួន នៅថ្ងៃព្រហស្បតិ៍នេះ ទៅឆ្លើយបំភ្លឺ នៅចំពោះមុខគណៈកម្មការការពារជាតិនៃព្រឹទ្ធសភា ជុំវិញករណីវាយប្រហារតាមប្រព័ន្ធអ៊ីនធ័រនែតមកលើគណបក្សប្រជាធិបតេយ្យក្នុងអំឡុងពេលបោះឆ្នោត។ ការវាយប្រហារតាមប្រព័ន្ធអ៊ីនធ័រនែត ដែលគ្រប់ទីភ្នាក់ងារចារកិច្ចអាមេរិកទាំងអស់សន្និដ្ឋានថាជាស្នាដៃរបស់រុស្ស៊ី ក៏ប៉ុន្តែ លោកដូណាល់ត្រាំច្រានចោលការសន្និដ្ឋាននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
តើរុស្ស៊ីពិតជាបានប្រើការវាយប្រហារតាមប្រព័ន្ធអ៊ីនធ័រនែត ដើម្បីលូកដៃចូលជ្រៀតជ្រែកក្នុងការបោះឆ្នោតប្រធានាធិបតីអាមេរិកមែនឬក៏យ៉ាងណា? នេះគឺជាសំណួរដែលកំពុងតែចោទឡើង និងដែលកំពុងតែបង្កើតឲ្យមានភាពចម្រូងចម្រាសដ៏ខ្លាំងមិនធ្លាប់មាន រវាងទីភ្នាក់ងារចារកិច្ចអាមេរិក និងប្រធានាធិបតី ដែលនឹងត្រូវឡើងមកកាន់តំណែង នៅក្នុងរយៈពេល២សប្តាហ៍ខាងមុខ។
ទីភ្នាក់ងារចារកិច្ចទាំងអស់របស់អាមេរិកសុទ្ធតែបានសន្និដ្ឋានថា រុស្ស៊ីគឺជាអ្នកចូលលួចអ៊ីមែលរបស់គណបក្សប្រជាធិបតេយ្យ រួចហើយធ្វើឲ្យលេចធ្លាយអ៊ីមែលអស់ទាំងនេះ ដែលធ្វើឲ្យប៉ះពាល់ដល់បេក្ខភាពរបស់លោកស្រីហ៊ីឡារីគ្លីនតុន តែជួយដល់លោកដូណាល់ត្រាំ។
លោកដូណាល់ត្រាំបានវាយបកមកវិញថា ទីភ្នាក់ងារចារកិច្ចដែលធ្វើសេចក្តីសន្និដ្ឋាននេះ គឺជាស្ថាប័នតែមួយ ដែលធ្លាប់សន្និដ្ឋានថា សាដាមហ៊ូសេនមានអាវុធប្រល័យលោក តែជាការសន្និដ្ឋានខុសស្រឡះ។ លើសពីនេះទៅទៀត លោកដូណាល់ត្រាំថែមទាំងបានដកស្រង់សម្តីរបស់ប្រមុខដឹកនាំ WikiLeaks គឺលោក ជូលៀន អាសាញ់ ដែលអះអាងថា រុស្ស៊ីមិនមែនជាអ្នកចូលលួចអ៊ីមែលរបស់គណបក្សប្រជាធិបតេយ្យ ហើយថា WikiLeaks ទទួលបានអ៊ីមែលទាំងនេះពីអ្នកផ្សេង។
ការវាយប្រហារទៅលើទីភ្នាក់ងារចារកិច្ចរបស់ខ្លួនឯង ហើយងាកទៅគាំទ្រមេដឹកនាំ WikiLeaks ដែលអាជ្ញាធរអាមេរិកកំពុងស្វែងរកចាប់ខ្លួនបែបនេះ ធ្វើឲ្យលោកដូណាល់ត្រាំ កំពុងទទួលរងនូវការរិះគន់ពីស្ទើរគ្រប់ទិសទី ជាពិសេស ពីមន្រ្តី និងអតីតមន្រ្តីចារកិច្ច និងទាំងពីថ្នាក់ដឹកនាំគណបក្សសាធារណរដ្ឋដូចគ្នា។
លោកចន ម៉ាក់ខេន អតីតបេក្ខជនប្រធានាធិបតីមកពីគណបក្សសាធារណរដ្ឋបានទាមទារឲ្យបង្កើតគណៈកម្មការឯករាជ្យចម្រុះបក្សមួយ ដើម្បីស៊ើបអង្កេតលើករណីជ្រៀតជ្រែករបស់រុស្ស៊ីមកលើការបោះឆ្នោតអាមេរិក ហើយកាលពីថ្ងៃពុធម្សិលមិញនេះ លោកបានលើកឡើងថា ការវាយប្រហារតាមប្រព័ន្ធអ៊ីនធ័រនែតពីសំណាក់រុស្ស៊ីមកលើស្ថាប័ននយោបាយអាមេរិក គឺស្មើនឹង “ការប្រកាសសង្រ្គាម”។
នៅថ្ងៃព្រហស្បតិ៍នេះ គឺនៅចំពោះមុខគណៈកម្មការការពារជាតិនៃព្រឹទ្ធសភា ដឹកនាំដោយលោក ចន ម៉ាក់ខេន ដែលប្រមុខដឹកនាំទីភ្នាក់ងារចារកិច្ចអាមេរិក ត្រូវចូលខ្លួនទៅឆ្លើយបំភ្លឺទាក់ទងនឹងការវាយប្រហារតាមប្រព័ន្ធអ៊ីនធ័រនែតពីរុស្ស៊ី មុននឹងជួបបំភ្លឺលោកដូណាល់ត្រាំ នៅថ្ងៃសុក្រស្អែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ