ឧបការីរងការបរទេសអាមេរិក នឹងមកកម្ពុជានិយាយពីសេចក្តីព្រាងច្បាប់អង្គការក្រៅរដ្ឋាភិបាល
នៅថ្ងៃទី១ និងទី២មិថុនាដើមខែក្រោយនេះ លោកScott Busby ឧបការីរងក្រសួងការបរទេសអាមេរិកដែលទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ នឹងមកបំពេញទស្សនកិច្ចនៅកម្ពុជា ។ តាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជាកាលពីម្សិលមិញ ក្នុងដំណើរទស្សនកិច្ចនេះ លោកScott Busby គ្រោងនឹងពិភាក្សាលើសេចក្តីព្រាងច្បាប់ស្តីពីសមាគមនិងអង្គការក្រៅរដ្ឋាភិបាលជាមួយរដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០១:៥១
បើគ្មានអ្វីប្រែប្រួលនោះទេ នៅថ្ងៃទី១ មិថុនា ដើមសប្តាហ៍ក្រោយនេះ លោកScott Busby ឧបការីរងក្រសួងការបរទេសអាមេរិកនឹងធ្វើដំណើរមកដល់ប្រទេសកម្ពុជាក្នុងដំណើរទស្សនកិច្ចរយៈពេលពីរថ្ងៃដែលនឹងបញ្ចប់នៅថ្ងៃទី២មិថុនា។
អ្វីជាការកត់សម្គាល់ នៅក្នុងដំណើរទស្សនកិច្ចនេះ លោក Scott Busby គ្រោងនឹងជួបជាមួយមន្ត្រីរដ្ឋាភិបាលកម្ពុជា ដើម្បីពិភាក្សាអំពីសេចក្តីព្រាងច្បាប់ស្តីសមាគម និងអង្គការមិនមែនរដ្ឋាភិបាល។ ជាសេចក្តីព្រាងច្បាប់ស្តីច្បាប់ ដែលកំពុងមានភាពចម្រូងចម្រាសយ៉ាងខ្លាំងរវាងរដ្ឋាភិបាលកម្ពុជា និងអង្គការសង្គមស៊ីវិល។អង្គការសង្គមស៊ីវិល បានរិះគន់ថា រដ្ឋាភិបាលកម្ពុជា បានតាក់តែងសេចក្តីព្រាងច្បាប់នេះឡើង ដើម្បីរឹតត្បិតសិទ្ធិសេរីភាពក្នុងការធ្វើសកម្មភាពរបស់ខ្លួន។ ក៏ប៉ុន្តែរដ្ឋាភិបាលបានបដិសេធ ដោយបញ្ជាក់ថា ច្បាប់នេះ គឺបង្កើតឡើង ដើម្បីលើកកម្ពស់កិច្ចសហប្រតិបត្តិការក្នុងភាពដៃគូរវាងរដ្ឋាភិបាល និងអង្គការសង្គមស៊ីវិលតែប៉ុណ្ណោះ។
គួរកត់សម្គាល់ថា ការគ្រោងជួបមន្ត្រីរដ្ឋាភិបាលដើម្បីពិភាក្សាលើសេចក្តីព្រាងច្បាប់ស្តីពីសមាគម និង អង្គការមិនមែនរដ្ឋាភិបាលពីសំណាក់មន្ត្រីការបរទេសជាន់ខ្ពស់អាមេរិកនេះ បានកើតឡើង បន្ទាប់ពីឯកអគ្គរដ្ឋទូតអាមេរិកប្រចាំនៅកម្ពុជា លោកWilliam Todd ត្រូវបានក្រសួងការបរទេសកម្ពុជា ធ្វើការក្រើនរំលឹកពីតួនាទីរបស់ខ្លួនក្នុងនាមជាឯកអគ្គរដ្ឋទូតស្ថានទូតមួយ។ លោកWilliam Todd កាលពីថ្ងៃទី១៩ ឧសភា បានប្រើប្រាស់បណ្តាញព័ត៌មានទិទៀនអំពីសេចក្តីព្រាងច្បាប់ដ៏ចម្រូងចម្រាសនេះ។ ក្រសួងការបរទេសកម្ពុជា បានចាត់ទុកថា ការរិះគន់នោះទេ មានលក្ខណៈព្រហើនខ្លាំង។
លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានបញ្ជាក់ថា ទោះបីមានការជួបពិភាក្សាគ្នារវាងរដ្ឋាភិបាលកម្ពុជា ជាមួយឧបការីរងក្រសួងការបរទេសអាមេរិកយ៉ាងណាក៏ដោយ ប៉ុន្តែដំណើរការតាក់តែងសេចក្តីព្រាងច្បាប់នេះ នឹងមិនថយក្រោយនោះឡើយ។ ជាមួយគ្នានេះ លោកផៃ ស៊ីផាន សង្ឃឹមថា សេចក្តីច្បាប់ស្តីពី សមាគម និងអង្គការមិនមែនរដ្ឋាភិបាល អាចនឹងត្រូវរដ្ឋាភិបាលអនុម័តនៅថ្ងៃសុក្រ សប្តាហ៍ក្រោយ និងបញ្ជូនបន្តទៅឲ្យរដ្ឋសភា ដើម្បីពិនិត្យ និងអនុម័ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ