Twitter នឹងលែងទទួលផ្សាយពាណិជ្ជកម្ម នូវសារផ្សព្វផ្សាយនយោបាយ
បណ្តាញសង្គម Twitter បានប្រកាសនៅថ្ងៃទី៣១តុលានេះ ថាខ្លួននឹងលែងទទួលផ្សព្វផ្សាយពាណិជ្ជកម្ម នូវសារនានា ដែលមានលក្ខណៈនយោបាយទៀតហើយ។ លោកអគ្គនាយកTwitter បានលើកឡើងថា សារដែលមានលក្ខណៈនយោបាយ បើសិនជាបានទទួលការគាំទ្រពីមនុស្សទូទៅ គឺវាអាស្រ័យលើខ្លឹមសារ និងគុណតម្លៃនៃសារនយោបាយនោះ ពោលគឺមិនមែនដោយការយកប្រាក់មកទិញ ដើម្បីផ្សព្វផ្សាយបញ្ជ្រាបទៅមហាជននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
Twitter នឹងឈប់លក់សេវាកម្ម នៃការផ្សព្វផ្សាយសារដែលមានលក្ខណៈនយោបាយ តទៅទៀតហើយ។ លោក Jack Dorsey ស្ថាបនិក និងជាអគ្គនាយក Twitter បានពន្យល់ថា សារនយោបាយនីមួយៗ អាចរីកសាយភាពខ្លាំង ក៏ដោយសារតែមានចំនួនមនុស្សច្រើន ដែលចុះឈ្មោះតាមដានគណនីដែលបង្ហោះសារទាំងនោះ។ ដូច្នេះ ការចំណាយប្រាក់ ដើម្បីអាចទទួលបានអ្នកចុះឈ្មោះច្រើន នៅក្នុងគណនីរបស់ខ្លួន វាគឺជារឿងមិនត្រឹមត្រូវទេ ព្រោះថាវាបានធ្វើឲ្យបាត់បង់ នូវជម្រើសរបស់មនុស្ស ដែលចង់ឬមិនចង់ អានសារនយោបាយទាំងនោះ។ លោកបន្ថែមថា ការសម្រេចចិត្តរបស់អ្នកប្រើប្រាស់ ក្នុងការគាំទ្រឬមិនគាំទ្រ តាមដានឬមិនតានដាន នូវសារនយោបាយណាមួយ គឺវាមិនអាចត្រូវបានបំពុល ឬបង្វែរដោយការចំណាយប្រាក់នោះឡើយ។
We’ve made the decision to stop all political advertising on Twitter globally. We believe political message reach should be earned, not bought. Why? A few reasons…🧵
jack 🌍🌏🌎 (@jack) 30 octobre 2019
គួរកត់សំគាល់ថា ការគោលជំហររបស់Twitter ទាក់ទិននឹងបញ្ហានេះ គឺវាមានភាពផ្ទុយស្រលះ ពីFacebook ដែលជាបណ្តាញសង្គមពេញនិយមបំផុត ទូទាំងសកលលោក។ លោក Mark Zuckerberg ស្ថាបនិក និងជាអគ្គនាយកFacebook បានឆ្លើយការពារ សេវាកម្មបង់ប្រាក់ ដើម្បីធ្វើការផ្សព្វផ្សាយសារនយោបាយនៅលើFacebookថា បើទោះបីសារនោះ មានភ្ជាប់ដោយភាសាកុហក បោកប្រាស់ ឬព័ត៌មានមិនពិតក៏ដោយ ក៏Facebook នៅតែបន្តផ្សព្វផ្សាយវា ព្រោះវាជាសេរីភាពនៃការបញ្ចេញមតិ។
លោក Jack Dorsey អគ្គនាយក Twitter បានឆ្លើយទៅអគ្គនាយកFacebook វិញថា ស្ថិតក្នុងកាលៈទេសៈបច្ចុប្បន្ននេះ បណ្តាញសង្គមទាំងអស់ត្រូវតែបង្ហាញជំហរ ដល់អ្នកប្រើប្រាស់ ថាខ្លួនពិតជាមានឆន្ទៈពិតប្រាកដ ក្នុងការប្រយុទ្ធប្រឆាំងនឹង ការរីកសាយភាព នូវព័ត៌មានក្លែងក្លាយ ឬក៏សារនយោបាយ ដែលពន្យុះអំពើហិង្សាជាដើម។ ក្នុងនាមជាម្ចាស់បណ្តាញសង្គម យើងមិនអាចគ្រាន់តែនិយាយអះអាងថានឹងព្យាយាមធ្វើ តែផ្ទុយទៅវិញមានបណ្តាញសង្គមខ្លះ យកប្រាក់ពីគេហើយអនុញ្ញាតឲ្យគេផ្សាយព័ត៌មានពិតឬកុហក តាមតែអំពើចិត្ត។
សូមបញ្ជាក់ថា នៅតាមបណ្តាញសង្គមទាំងអស់រួមមានTwitter Facebook ឬ Youtube គឺគណនីនិមួយៗ សុទ្ធតែអាចចំណាយប្រាក់ ដើម្បីទទួលបានអ្នកចុះឈ្មោះច្រើន ឬក៏អាចលោតចេញញឹកញាប់ជាងគេ នៅខាងលើគេ ដើម្បីទាក់ទាញអ្នកប្រើប្រាស់។ សេវាកម្មនេះ ជាទូទៅ ត្រូវបានប្រើដោយអ្នកនយោបាយ ឬ ម្ចាស់គណនីមួយចំនួន ដែលត្រូវការប្រជាប្រិយភាពខ្លាំង ក្នុងគោលបំណងណាមួយ។
អ្នកជំនាញបានអបអរ ចំពោះការសម្រេចរបស់Twitter ដែលបិទចោលសេវាកម្មនេះ ទាក់ទិននឹងសារនយោបាយ។ តែយ៉ាងណាអ្នកជំនាញ អះអាងថា បញ្ហាចោទចំបងបង្អស់គឺនៅលើបណ្តាញ Facebook និង Youtube ដែលបណ្តាញទាំងពីរនេះ មានអ្នកប្រើប្រាស់ច្រើន ហើយ សារនយោបាយ ឬក៏វីដេអូផ្សព្វផ្សាយបោកបញ្ឆោត ពន្យុះហិង្សា បំភ្លៃការពិតជាដើម សំបូរ និង រីកសាយភាយ យ៉ាងពោពាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ