ជំនួបកំពូលនៃ”សហគមន៍សេដ្ឋកិច្ចអឺរ៉ុប-អាស៊ី”
រសៀលថ្ងៃនេះ ក្នុងវិមានក្រេមឡាំងនៅម៉ូស្គូបើកធ្វើជំនួបកំពូលនៃអង្គការ “សហគមន៍សេដ្ឋកិច្ចអឺរ៉ុប-អាស៊ី” ក្រោមប្រធានបទស្តីអំពី “អនាគតនៃដំណើរសមាហរ័ណកម្មក្នុងលំហសហគមន៍រដ្ឋឯករាជ្យ”។ ក៏ប៉ុន្តែសម្រាប់រដ្ឋខ្លះដែលចូលរួម គឺមានក្តីកង្វល់រៀងៗខ្លួនទេតើ៖ អ៊ុយក្រែនចង់ឲ្យរុស្ស៊ីបញ្ចុះថ្លៃឧស្ម័នខ្ពស់ជ្រុលដែលរុស្ស៊ីលក់ឲ្យខ្លួន ចំណែកបេឡារុស គឺសង្ឃឹមឲ្យរុស្ស៊ីជួយការពារខ្លួន ទល់នឹងការកំញើញបន្តឹងថែមទៀត ទណ្ឌកម្មពីខាងសហភាពអឺរ៉ុប ក្រោយពីបេឡារុសហ៊ានប្រហារមែន ជីវិតពលរដ្ឋខ្លួនពីរនាក់ដែលជាប់ទោសក្នុងការប្រព្រឹត្តអំពើភេរវកម្ម។
ចុះផ្សាយនៅថ្ងៃ៖
ស្តាប់ - ០២:៤១
ជាបឋម អំពី “សហគមន៍សេដ្ឋកិច្ចអឺរ៉ុប-អាស៊ី” ដែលប្រសូតមកក្នុងឆ្នាំ២០០១ ហើយដែលបច្ចុប្បន្នមាន៥ប្រទេស ជាសមាជិកពេញសិទ្ធិ គឺ កាហ្សាកស្ថាន កៀហ្ស៊ីស៊ីស្ថាន រុស្ស៊ី បេឡារុស និងតាហ្ស៊ិគីស្ថាន។ ចំណែក៣ប្រទេសទៀត ពោលគឺ អ៊ុយក្រែន អារមេនី ម៉ុលដាវី ជាសមាជិកសង្កេតការណ៍។ វាជាអង្គការសេដ្ឋកិច្ចអន្តរជាតិតាំងគោលដៅបង្កើតឡើងជាព្រំប្រទល់គយរួម ជានយោបាយសេដ្ឋកិច្ចក្រៅប្រទេសរួមសម្រាប់ទីផ្សាររួមរបស់ខ្លួន។ មុននឹងចេញដំណើរមកបំពេញទស្សនកិច្ចការងាររយៈពេល២ថ្ងៃនៅរុស្ស៊ី គឺដើម្បីចូលរួមក្នុងជំនួបកំពូលថ្ងៃនេះផង និងដើម្បីធ្វើកិច្ចចរចាជាមួយថ្នាក់ដឹកនាំរុស្ស៊ីនៅថ្ងៃស្អែកផង ជុំវិញបញ្ហាតម្លៃឧស្ម័ន លោកប្រធានាធិបតីអ៊ុយក្រែន Viktor Yanukovich បានថ្លែងទៅ ITAR-TASS ថា អ៊ុយក្រែនមិនអាចបង់តទៅទៀតឡើយ ថ្លៃឧស្ម័នខ្ពស់ម្ល៉ឹងៗដែលរុស្ស៊ីលក់ឲ្យខ្លួន។
ជាការកត់សម្គាល់ក្នុងត្រីមាសទី១ឆ្នាំនេះ ឧស្ម័នដែលរុស្ស៊ីលក់ទៅអ៊ុយក្រែន គឺថ្លៃ ៤១៦ដុល្លារក្នុង១.០០០ម៣។ តាមយោបល់លោកប្រធានាធិបតី Viktor Yanukovich ថ្លៃដែលត្រឹមត្រូវ គឺមិនត្រូវលើសពី ២៥០ ដុល្លារឡើយក្នុង ១.០០០ម៣។ តាមសំដីគាត់ ដោយមកពីថ្លៃខ្ពស់យ៉ាងនេះ អ៊ុយក្រែនបង់ខាតក្នុង១ឆ្នាំៗដល់ទៅ ៣.៧០០លានដុល្លារ។ ម៉ូស្គូតែងឆ្លើយថា ខ្លួនត្រៀមបញ្ចុះថ្លៃឧស្ម័ន បើអ៊ុយក្រែនសុខចិត្តច្របាច់ក្រុមហ៊ុនប្រេង និងឧស្ម័នរបស់ខ្លួន Naftogaz ឲ្យចូលជាមួយក្រុមហ៊ុនយក្សរុស្ស៊ី Gazprom ក្នុងន័យឲ្យរុស្ស៊ីលេបតែម្តង ឬមួយសុខចិត្តចូលមកក្នុង ”សហភាពគយ” ដែលដំណើរការតាំងពីថ្ងៃទី១ មករា ឆ្នាំ២០១២នេះមក ដោយមានរុស្ស៊ី បេឡារុស និង កាហ្សាកស្ថាន ជាសមាជិកទៅហើយ។ ប៉ុន្តែអ៊ុយក្រែនប្រកែក ពីព្រោះខ្លួន ចាត់ទុកជាអាទិភាព គឺបង្កើតជា”តំបន់នៃពាណិជ្ជកម្មសេរី” ជាមួយ សហភាពអឺរ៉ុបដើម្បីក្នុងអនាគតក្លាយទៅជាសមាជិកសហភាពនេះតែម្តង។
ចំណែកបេឡារុសដែលប៉ុន្មានថ្ងៃមុន បានប្រតិបត្តិមែន ទោសប្រហារជីវិតលើពលរដ្ឋខ្លួន ២នាក់ គឺញ៉ាំងឲ្យមានការថ្កោលទោសយ៉ាងខ្លាំង ពីខាងសហភាពអឺរ៉រុបដែលព្រមានថា នឹងមួលខ្ចៅបន្តឹងទណ្ឌកម្មថែមទៀត ទៅលើរបបគ្រប់គ្រងផ្តាច់ការនៃលោកប្រធានាធិបតី Alexandre Loukachenko។ បេឡារុស ជាប្រទេសតែមួយគត់នៅអឺរ៉ុបដែលបន្តបាញ់សម្លាប់មែន អ្នកទោសណាដែលជាប់ទោសប្រហារជីវិត។ រីឯពលរដ្ឋ២នាក់នោះ ត្រូវបានតុលាការកាត់ទោសបែបនេះ គឺចំពោះអំពើភេរវកម្មបំផ្ទុះគ្រាប់បែកក្នុងមេត្រូទីក្រុង Minsk កាលពីឆ្នាំមុន ដោយបានផ្តាច់ជីវិតមនុស្សអស់១៥នាក់ និងរបួសជាង ៣០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ