ទស្សនកិច្ចប្រមុខការទូតរុស្ស៊ីនៅស៊ូដង់ប្រទេសដែលឯកោក្រៃលើឆាកអន្តរជាតិ
“រុស្ស៊ី ប្រាថ្នារឹតចំណងយោធារបស់ខ្លួន ជាមួយប្រទេសស៊ូដង់ “ សេចក្តីនេះ ថ្លែងថ្ងៃទី៣ធ្នូ ក្នុងដំណើរទស្សនកិច្ចការងារនៅក្រុងខារទូម រដ្ឋធានីស៊ូដង់ ដោយលោករដ្ឋមន្ត្រី ការបរទេសរុស្ស៊ី ស៊ែរហ្គៃ ឡាវ៉្រូវ ដែលបានជួបចរចាទៅហើយ ជាមួយសមភាគីស៊ូដង់ លោក Ali Karti ហើយបន្ទាប់មកនឹងត្រូវទទួលជួបដោយលោកប្រធានាធិបតីស៊ូដង់ Omar el-Béchir។
ចុះផ្សាយនៅថ្ងៃ៖
ស្តាប់ - ០២:២៥
ក្រោយពីជួបចរចាជាមួយសមភាគីស៊ូដង់ លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ៉្រូវ បានប្រកាសជាអាទ៏ ៖ យើងមានគម្រោង បំផុសបំផុលសហប្រតិបត្តិការយោធានៅតាមទិសដែលមិននាំឲ្យខូចដល់ សមតាកម្លាំងនៅតំបន់ឡើយ។ ប៉ុន្តែគាត់មិនលំអិតអ្វីទេ។
ក្រសួងការបរទេសរុស្ស៊ីទាក់ទងនឹងទស្សនកិច្ចលោកឡាវ៉្រូវ គូសបញ្ជាក់ថា ៖ នេះជាទស្សនកិច្ចលើកទី១របស់ប្រមុខការទូតរុស្ស៊ីនៅស៊ូដង់ ក្រោយពីភាគខាងត្បូងប្រទេស នេះ បានផ្តាច់ខ្លួនចេញទៅជារដ្ឋឯករាជ្យថ្មីកាលពីឆ្នាំ ២០១១មកហើយទស្សនកិច្ចនេះ មាន លក្ខណៈការងារដោយគាត់ត្រូវចូលរួមក្នុងសម័យប្រជុំលើកទី២ នៃវេទិកាសហប្រតិបត្តិការ រុស្ស៊ី-អារ៉ាប ក្នុងជាន់ថ្នាក់រដ្ឋមន្ត្រីការបរទេស។ សម័យប្រជុំបែបនេះ លើកទី១ បានប្រព្រឹត្តទៅនៅម៉ូស្គូកាលពីខែកុម្ភៈឆ្នាំ២០១៣ ដោយមានការចូលរួមនៃ អគ្គលេខាធិការសម្ព័ន្ធរដ្ឋអារ៉ាបនៃរដ្ឋមន្ត្រីការបរទេសអ៊ីរ៉ាក់កូវ៉ែតលីបង់លីប៊ី។
លោក ឡាវ៉្រូវ ត្រូវជួបប្រស្រ័យ ជាមួយលោក Omar el-Béchir ប្រធានាធិបតីស៊ូដង់ ប្រទេស ដែលសេដ្ឋកិច្ចខ្លួនជាប់យ៉ាងធ្ងន់ក្នុងបម្រាមហាមធ្វើពាណិជ្ជកម្ម ពីខាងស.រ.អា.តាំងពីឆ្នាំ ១៩៩៧មក ក្រោមបទបំពានយ៉ាងកម្រោលលើសិទ្ធិមនុស្ស ប្រព្រឹត្តដោយ របបលោក Béchir ដែលថែមទាំងត្រូវគេប៉ាន់ស្មានថា មានចំណងពាក់ព័ន្ធនឹងពួកភេររវជន ទៅផង។
លោក Béchir ជាបុគ្គលស្វែងរកកាត់ទោសដោយតុលាការព្រហ្មទណ្ឌអន្តរជាតិចំពោះឧក្រិដ្ឋកម្មទល់នឹងមនុស្សជាតិដែលគាត់បានប្រព្រឹត្តនៅតំបន់ Dafour ប៉ែកខាងលិចប្រទេស។
លោករដ្ឋមន្ត្រីការបរទេសស៊ូដង់ Ali Karti ពីចំណែកខ្លួន បានឲ្យដឹងថា ក្រៅពីសំណុំរឿងយោធាគូភាគីបានលើកយកទៅពិភាក្សាគឺបញ្ហាថាមពលដែលក្នុងបរិបទនេះ ក្រុមហ៊ុនរុស្ស៊ីនានាសំដែងទៅហើយនូវការយកចិត្តទុកដាក់ទៅលើ ការជីកបូមប្រេងនិងឧស្ម័ន នៅស៊ូដង់។ គាត់សង្កត់ធ្ងន់ថាស៊ូដង់ប្រាថ្នាតាំងភាពជាដៃគូយុទ្ធសាស្ត្រ ជាមួយរុស្ស៊ី លើវិស័យប្លែកៗបំផុត។
រីឯគោលដៅមួយទៀតនៃទស្សនកិច្ចលោក ឡាវ៉្រូវ គឺរៀបចំកិច្ចប្រជុំលើកទី២ នៃគណៈកម្មការអន្តររដ្ឋាភិបាលរុស្ស៊ី-ស៊ូដង់ខាងសហប្រតិបត្តិការពាណិជ្ជកម្ម សេដ្ឋកិច្ច ដែលនឹងប្រព្រឹត្តទៅនៅរដ្ឋធានីរុស្ស៊ីថ្ងៃ១០-១២ ធ្នូខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ