សង្គ្រាមកំពុងគំរាមជីវិតកុមារស៊ូដង់ខាងត្បូង ឱ្យស្លាប់មុនអាយុ
កុមារជាង៥ម៉ឺននាក់ អាចនឹងរកគ្រោះស្លាប់បាត់បង់ជីវិត ក្នុងពេលឆាប់ៗខាងមុខនេះ ដោយគ្រោះទុរភិក្ស ឬដោយគ្រោះអត់ឃ្លាន មានជំងឺរាត់ត្បាត បន្ទាប់ពីប្រទេសបានឆ្លងកាត់សង្គ្រាមអស់រយៈពេល៦ខែ។ នេះបើតាមអង្គការសហប្រជាជាតិដែលបានទាញសញ្ញាអាសន្ន នៅថ្ងៃសោរ៍ទី ១៤មិថុនា និងទាមទារជំនួយប្រមាណ១ពាន់លានដុល្លារដើម្បីប្រជាពលរដ្ឋទាំងនោះ។
ចុះផ្សាយនៅថ្ងៃ៖
ស្តាប់ - ០១:៣៩
កម្មវត្ថុនៃប្រតិបត្តិការមនុស្សធម៌បន្ទាន់នេះ គឺដើម្បីសង្គ្រោះជីវិតមនុស្សពីភាពអត់ឃ្លាន ! ព្រោះបណ្តាជនស៊ូដង់ខាងត្បូងគ្មានស្រែគ្មានចម្ការ គ្មានការចិញ្ចឹមសត្វអ្វី ទៀតទេ ! គ្រោះជួបទុរភិក្ស មានកាន់តែខ្លាំង និងបានសម្លាប់ជីវិតមនុស្សជាបណ្តើរៗហើយ !
ជម្លោះសង្គ្រាមស៊ីវិល នៅស៊ូដង់ បានធ្វើឱ្យជីវិតមនុស្សរាប់សិប ឬរាប់រយពាន់នាក់ស្លាប់ (គ្មានទេតុល្យការច្បាស់ការណ៍ណាមួយត្រូវបានផ្សព្វផ្សាយជាសាធារណៈទេ) និងជាងមួយលាននាក់កន្លះភៀសខ្លួន។ ជាផលវិបាក កុមារយ៉ាងហោចណាស់ ៥ម៉ឺននាក់ នឹងអាចស្លាប់នៅក្នុងឆ្នាំ២០១៤នេះ ព្រោះជំងឺ ព្រោះភាពអត់ឃ្លាន ព្រោះអំពើហិង្សា និងព្រោះតែមិនបានជំនួយមនុស្សធម៌។ ប្រតិបត្តិការមនុស្សធម៌ស៊ូដង់ខាងត្បូង ដែលគ្រោងនឹងជួយសង្គ្រោះប្រជាជនប្រមាណ៣លាន៨សែននាក់។
ពេលនេះរដូវវស្សាបានមកដល់ លក្ខខណ្ឌរស់នៅកាន់តែលំបាក ! ជំងឺអាសន្នរោគ គ្រុនចាញ់អាចរាតត្បាតបានគ្រប់ពេលវេលា។ សម្រាប់អ្នកទទួលខុសត្រូវមនុស្សធម៌អង្គការសហប្រជាជាតិទទួលបន្ទុកស៊ូដង់ខាងត្បូង ប៉ាន់ប្រមាណ គេត្រូវការជំនួយប្រមាណ១ពាន់លានដុល្លារទៀត ដើម្បីជួយស្រោចស្រង់ជាបន្ទាន់ផ្នែកសេវាសុខភិបាល ចំណីអាហារ ទឹកស្អាត និងជំរក សម្រាប់ការពារភ្លៀងខ្យល់។
សូមបញ្ជាក់ថា តាំងពីសង្គ្រាមស៊ីវិល អន្តរសហគមន៍ បានផ្ទុះឡើង ប្រធានាធិបតីស៊ូដង់ លោក សាល់វ៉ាគៀ និងមេឧទ្ទាម រៀក ម៉ាហ្សារ បានព្រមព្រៀងនៅសប្តាហ៍នេះ បង្កើតរដ្ឋាភិបាលអន្តរកាលឱ្យបានក្នុងរយៈពេលពីរខែទៀត ប៉ុន្តែអ្នកឯកទេសមានមន្ទិលយ៉ាងខ្លាំងលើចេតនាចង់បញ្ចប់ជម្លោះតាមផ្លូវចរចា។ កិច្ចព្រមព្រៀងឈប់បាញ់មានពីរលើកមកហើយប៉ុន្តែគ្មានភាគីណាគោរពទេ។ ការប្រើកម្លាំងបាយ កម្លាំងយោធាទំនងជាច្រកផ្លូវអាទិភាពរបស់ពួកគេ។ សម្រាប់ពេលនេះ មានជនភៀសខ្លួនជិតមួយសែននាក់ ដែលរត់គេចពីការប្រល័យពូជសាសន៍គ្នា កំពុងប្រជៀតគ្នាស្នាក់នៅក្នុងមូលដ្ឋានអង្គការសហប្រជាជាតិ ដើម្បីបានទទួលការពារពីកងទ័ពមួកខៀវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ