វិបត្តិបំណុលឆ្លងមកដល់អ៊ីតាលីដែលជាមហាអំណាចសេដ្ឋកិច្ចក្នុងតំបន់អឺរ៉ូ
ទីផ្សារមូលបត្រនៅគ្រប់កន្លែង ទាំងនៅអឺរ៉ុប នៅអាមេរិក និងនៅអាស៊ី បានចាប់ផ្តើមធ្លាក់ដាំដូងសាជាថ្មីម្តងទៀត នៅថ្ងៃពុធ និងថ្ងៃព្រហស្បតិ៍នេះ។ លុយអឺរ៉ូបានបន្តធ្លាក់ចុះជាបន្តបន្ទាប់ធៀបនឹងលុយដុល្លារ។ មូលហេតុ គឺមកពីមានការបារម្ភអំពីស្ថានភាពនយោបាយ និងសេដ្ឋកិច្ច នៅអ៊ីតាលី ដែលជាមហាអំណាចសេដ្ឋកិច្ចលំដាប់ទី៣ នៅក្នុងតំបន់ចាយលុយអឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ចាប់តាំងពីវិបត្តិបំណុលនៅប្រទេសក្រិកផ្ទុះឡើងមក អ្វីដែលគេបារម្ភខ្លាំងជាងគេបំផុតនោះ គឺខ្លាចវិបត្តិនេះឆ្លងរាលដាលទៅប្រទេសផ្សេងៗទៀត ក្នុងតំបន់អឺរ៉ូ។ ការឆ្លងរាលដាល ដែលគេបារម្ភនេះ ពិតជាបានកើតមានឡើងមែន កាលពីថ្ងៃពុធ ម្សិលមិញ ហើយវាបានកើតឡើងទៅដល់អ៊ីតាលី ដែលជាមហាអំណាចសេដ្ឋកិច្ច ក្នុងតំបន់ចាយលុយអឺរ៉ូ។
អត្រាការប្រាក់បំណុលរបស់អ៊ីតាលីបានកើនឡើងដល់កម្រិតខ្ពស់បំផុតមិនធ្លាប់មាន គឺរហូតដល់ ៧,៤% សម្រាប់មូលបត្របំណុល ដែលមានឥណប្រតិទានរយៈពេល ១០ឆ្នាំ។ ជាមួយនឹងអត្រាការប្រាក់ខ្ពស់បែបនេះ អ៊ីតាលី ដែលកំពុងតែជំពាក់បំណុលគេយ៉ាងច្រើន ស្រាប់ផងនោះ ពិតជាមិនអាចនៅឈរជាប់បានយូរនោះទេ។
លោកស៊ីលវីយ៉ូ ប៊ែរលូស្កូនី (Silvio Berlusconi) នាយករដ្ឋមន្រ្តីអ៊ីតាលី បានសន្យាថា លោកនឹងលាឈប់ពីតំណែង នៅក្រោយពេលដែលសភាអនុម័តច្បាប់ថវិកាជាតិ នៅចុងខែនេះ។ ការលាឈប់របស់លោកប៊ែរលូស្កូនីនេះមិនបានធ្វើឲ្យអ្នកវិនិយោគបានធូរស្បើយក្នុងចិត្តនោះទេ។ ផ្ទុយទៅវិញ ពួកគេកាន់តែមានការព្រួយបារម្ភខ្លាំងឡើងថែមទៀត ខ្លាចអ៊ីតាលីធ្លាក់ក្នុងវិបត្តិនយោបាយ ហើយមិនអាចបង្កើតបាននូវរដ្ឋាភិបាលថ្មីមួយ ដែលមានស្ថិរភាព។
អ្វីដែលធ្វើឲ្យគេព្រួយបារម្ភកាន់តែខ្លាំងទៅទៀតនោះ គឺនៅត្រង់ថា ខុសពីក្រិក ដែលជាប្រទេសតូចតាច អ៊ីតាលីគឺជាមហាអំណាចសេដ្ឋកិច្ចលំដាប់ទីបី ក្នុងតំបន់អឺរ៉ូ បន្ទាប់ពីអាល្លឺម៉ង់ និងបារាំង។ ផលិតផលក្នុងស្រុកសរុបរបស់អ៊ីតាលីមានប្រមាណជា ២០% នៃផលិតផលក្នុងស្រុកសរុបរបស់តំបន់អឺរ៉ូទាំងមូល។ បំណុលសរុបរបស់អ៊ីតាលី មានចំនួនច្រើនជាងបំណុលរបស់ក្រិករហូតដល់ទៅជាង ៥ដង (១ ៩០០ពាន់លានអឺរ៉ូ ស្មើនឹង ១២០% នៃផលិតផលក្នុងស្រុកសរុប)។ សំណួរចោទឡើងថា គ្រាន់តែក្រិកតូចមួយ អឺរ៉ុបនៅមិនទាន់អាចជួយបានផង ចុះទម្រាំអ៊ីតាលី តើឲ្យអឺរ៉ុបជួយម្តេចនឹងកើត?
បន្ថែមពីលើវិបត្តិអ៊ីតាលី មានបញ្ហាមួយទៀត ដែលធ្វើឲ្យទីផ្សារមូលបត្រច្រួលច្របល់កាន់តែខ្លាំងឡើង គឺព័ត៌មានស្តីពីការបែកបាក់នៃតំបន់ចាយលុយអឺរ៉ូ។ មន្រ្តីការទូតសហភាពអឺរ៉ុបខ្លះបានពន្លយពាក្យថា នៅពេលនេះ បារាំង និងអាល្លឺម៉ង់កំពុងតែជជែកគ្នាស្ងាត់ៗ ចង់បណ្តេញប្រទេសខ្លះចេញពីតំបន់ចាយលុយអឺរ៉ូ ដើម្បីឲ្យតំបន់អឺរ៉ូអាចបង្កើនសមាហរ័ណកម្មសេដ្ឋកិច្ច និងសារពើពន្ធឲ្យបានកាន់តែស៊ីជម្រៅថែមទៀត។ សញ្ញានៃការបែកបាក់គ្នានេះបានធ្វើឲ្យអ្នកវិនិយោគបាត់បង់ទំនុកចិត្តកាន់តែខ្លាំង លើលុយអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ