ភាពតានតឹងបានកើតឡើងជាថ្មីរវាងជប៉ុន និងចិនជុំវិញទីប្រជុំកោះសេនកាគុ
ជាថ្មីម្តងទៀត ភាពតានតឹងបានកើតមានរវាងចិន និងជប៉ុនជុំវិញទីប្រជុំកោះសេនកាគុ។ នៅថ្ងៃអង្គារ ទី២៣ មេសានេះ និងបើយោងតាមឆ្មំាសមុទ្រជប៉ុន មាននាវាឃ្លំាមើលរបស់ចិនចំនួន ៨គ្រឿងបានបើកចូលក្នុងដែនទឹកក្បែរទីប្រជុំកោះសេនកាគុ។ លោកនាយករដ្ឋមន្រ្តីជប៉ុន Shinzo Abe បានព្រមាននៅថ្ងៃនេះថា ប្រសិនបើមានជនជាតិចិនព្យាយាមឡើងទៅលើទីប្រជុំកោះសេនកាគុនោះ ជប៉ុននឹងប្រើកម្លំាងដើម្បីបណ្តេញពួកគេចេញវិញ។ អ្វីជាការកត់សម្គាល់ ភាពតានតឹងថ្មីនេះបានផ្ទុះឡើង ចំពេលដែលមានសមាជិកសភាជប៉ុនប្រមាណជា ១៧០នាក់បាននំាគ្នាទៅទស្សនាវិហារ Yasukuni ក្នុងទីក្រុងតូក្យូ។
ចុះផ្សាយនៅថ្ងៃ៖
ស្តាប់ - ០២:៣២
តាមពិតទៅ វត្តមានយន្តហោះចម្បំាង នាវាចម្បំាង ឬមួយក៏នាវាឃ្លំាមើលរបស់ចិននៅក្នុងដែនទឹកក្បែរទីប្រជុំកោះសេនកាគុពេលនេះ មិនមែនជារឿងថ្មី ហើយក៏គ្មានអ្វីគួរឲ្យភ្ញាក់ផ្អើលដែរ មិនភ្ញាក់ផ្អើលព្រោះថា ចិនធ្លាប់តែបានធ្វើជារឿយៗកន្លងមក ពិសេស តំាងពីក្រោយរដ្ឋាភិបាលជប៉ុនបានទិញយកកោះមួយចំនួនពីប្រជាជនខ្លួនមកធ្វើជាសម្បត្តិរបស់រដ្ឋ។ ក៏ប៉ុន្តែ និងអ្វីដែលគួរឲ្យភ្ញាក់ផ្អើលបន្តិចនាពេលនេះ គឺវត្តមាននាវាចិនដ៏ច្រើនសម្បើមមិនធ្លាប់មានរហូតដល់ទៅ ៨គ្រឿងនៅពេលនេះ។ ជាទូទៅ នាវារបស់ចិនស្ថិតនៅម្តុំនោះតែប៉ុន្មានម៉ោងប៉ុណ្ណោះ មុននឹងដកថយចេញទៅវិញ។ តែយ៉ាងណាក៏ដោយ មិនអាចធ្វើឲ្យជប៉ុនឈរឱបដៃមើលបានទេ។
« យើងប្រឆំាងដាច់ខាតនឹងទង្វើរបស់ចិន » នេះជាប្រតិកម្មរបស់លោក Yoshihide Suga អ្នកនំាពាក្យរបស់រដ្ឋាភិបាលជប៉ុន។ ក្នុងពេលជាមួយគ្នានេះ ឯកអគ្គរដ្ឋទូតចិនប្រចំាទីក្រុងតូក្យូក៏ត្រូវបានក្រសួងការបរទេសជប៉ុនកោះហៅឲ្យចូលជួបដែរ។ ម្យ៉ាងទៀតនៅក្នុងរដ្ឋសភាជប៉ុន លោកនាយករដ្ឋមន្រ្តី Shinzo Abe ត្រូវបានក្រុមសមាជិកសភាចោទសួរជុំវិញសំណួរដែលថា បើមានជនជាតិចិននំាគ្នាឡើងលើទីក្រុងកោះសេនកាគុនោះ តើអ្វីទៅ ជាវិធានការរបស់រដ្ឋាភិបាលក្រុងតូក្យូ ?។ លោក Shinzo Abe បានឆ្លើយភ្លាមថា វាជារឿងមួយធម្មតាទេដែលជប៉ុនត្រូវតែប្រើកម្លំាងបណ្តេញពួកទំាងនោះចេញ។ ដោយឡែកក្នុងថ្ងៃនេះដែរ មានចលនាអ្នកជាតិនិយមជប៉ុនមួយក្រុមបានប្រកាសឲ្យដឹងថា ពួកគេបានបញ្ជូនទូកនេសាទចំនួន ៩គ្រឿងទៅកាន់តំបន់ក្បែរទីប្រជុំកោះសេនកាគុដើម្បីចូលរួមការពារបូរណភាពទឹកដីរបស់ជប៉ុន។
គួរបញ្ជាក់ជូនថា វត្តមាននាវាចិនដ៏ច្រើនសម្បើមនៅក្នុងដែនទឹកក្បែរទីប្រជុំកោះសេនកាគុពេលនេះបានកើតមានឡើង ចំពេលដែលមានដំណើរទស្សនកិច្ចរបស់សមាជិកសភាជប៉ុនប្រមាណជា ១៧០នាក់នៅក្នុងវិហារ Yasukuni ក្នុងទីក្រុងតូក្យូ។ វិហារ Yasukuni ដែលមានដាក់តំាងរូបថតសពទាហានជប៉ុនប្រមាណជា ២,៥លាននាក់ដែលបានបាត់បង់ជីវិតដើម្បីបុព្វហេតុជាតិក្នុងសម័យសង្រ្គាមលោក។ ក៏ប៉ុន្តែ អ្វីដែលធ្វើឲ្យចិន និងកូរ៉េក្តៅក្រហាយខ្លំាងនោះនៅត្រង់ថា ក្នុងចំណោមរូបថតសាកសពទាហានជប៉ុនទំាងនោះ មាន ១៤រូបត្រូវបានតុលាការអន្តរជាតិកាត់ទោសពីបទឧក្រិដ្ឋកម្មសង្រ្គាម នៅក្រោយសង្រ្គាមលោកលើកទី២។
នៅថ្ងៃចន្ទ ទី២២ មេសាម្សិលមិញ កូរ៉េខាងត្បូងក៏បានសម្រេចលុបចោលដំណើរទស្សនកិច្ចរបស់រដ្ឋមន្រ្តីការបរទេសខ្លួនទៅកាន់ទីក្រុងតូក្យូ ដើម្បីប្រឆំាងនឹងដំណើរទស្សនកិច្ចរបស់មន្រ្តីជាន់ខ្ពស់ជប៉ុន ៣រូប ទៅកាន់វិហារ Yasukuni កាលពីចុងសប្តាហ៍កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ