តើសេដ្ឋកិច្ចថៃអាចធន់នឹងវិបត្តិនយោបាយអូសបន្លាយបានប៉ុណ្ណា ?
ចុះផ្សាយនៅថ្ងៃ៖
ស្តាប់ - ០៦:៤៨
ថ្ងៃនេះ រដ្ឋាភិបាលស្តីទីថៃ បានបើកកិច្ចពិភាក្សា ជាមួយព្រឹទ្ធសភា ដើម្បីសាកល្បងស្វែងរកច្រកចេញឱ្យវិបត្តិនយោបាយដែលអូសបន្លាយកាន់តែយូរទៅៗ។ វិបត្តិនយោបាយអូសបន្លាយ ចលនាបាតុកម្ម មិនស្ងប់ស្ងាត់ បាតុករអាវក្រហម និងអាវលឿង បានឆ្លាស់គ្នាចុះថ្នល់ ឬទាំងពីរក្រុមចុះព្រមគ្នា បានផ្តើមជះឥទ្ធិពលអាក្រក់លើវិស័យសេដ្ឋកិច្ច។ វិបត្តិទំនងជាមិនងាយនឹងដោះស្រាយចេញដោយងាយៗឡើយ ដ្បិតនៅថ្ងៃនេះទៀត ក្នុងថ្ងៃខួបបួនឆ្នាំគត់នៃការបង្ក្រាបដ៏ហិង្សាចលនាបាតុកម្មអាវក្រហមនៅទីក្រុង បាងកក ! ក្រុមយោធាបានចេញមុខព្រមានថានឹងអាចអស់អំណត់។
ស្ថានភាពនយោបាយថៃកាន់ស្មុគស្មាញ ព្រោះថា បន្ទាប់ពីលោកស្រីយីងឡាក់ និងរដ្ឋមន្ត្រី៦រូបផ្សេងទៀត បានខ្ទាតចេញពីតំណែង ក្រោមចំណាត់ការរបស់តុលាការធម្មនុញ្ញមក រដ្ឋាភិបាលស្តីទីថៃ មានលទ្ធភាពតិចតួចបំផុត ក្នុងការចាត់ចែង និងសម្រេចការដឹកនាំប្រទេស។ នៅថ្ងៃនេះ ប្រមុខរដ្ឋាភិបាល បានបើកកិច្ចពិភាក្សាមួយជាមួយប្រធានព្រឹទ្ធសភា ! ជំនួបនេះបានប្រព្រឹត្តទៅដោយសម្ងាត់ ក្នុងទីកន្លែងដ៏អាថ៌កំបាំងមួយ ព្រោះខ្លាចមានចលនាបាតុកម្មទៅរំខាន។
យោធាព្រមានចេញមុខការពារប្រជាជន
តាំងពីជាច្រើនខែមកហើយ ដែលថៃគ្មានរដ្ឋសភា ! ព្រឹទ្ធិសភា ជាស្ថាប័នពេញតែអង្គ តែមួយគត់ មានដំណើរការពេញលេញ អាចនឹងសម្រេចប្តូរផ្លាស់នាយករដ្ឋមន្ត្រីស្តីទី ដោយតែងតាំង នាយករដ្ឋមន្ត្រីថ្មី ដែលមាននិន្នាការនយោបាយអព្យាក្រិត្យ។ ប្រសិនបើក្នុងដូច្នេះមែន នោះក្រុមអាវក្រហម ពិតជានឹងអាចចុះធ្វើបាតុកម្មដែរ។ ហេតុដូច្នេះហើយបានព្រឹទ្ធសភា ដែលជាកូនសោរនយោបាយថៃនាពេលនេះត្រូវការពិគ្រោះយោបល់ជាមួយនឹងរដ្ឋាភិបាលស្តីទីសិន។ ប៉ុន្តែបញ្ហានៅត្រង់ថា គំនិតផ្តួចផ្តើមនេះ មិនត្រូវបានស្វាគមន៍ពីសំណាក់ប្រមុខដឹកនាំចលនាអាវលឿងឬបក្សប្រឆាំង ស៊ូថេប ថងស៊ូបានទេ ! លោក បានបន្តស្រែកក្តែងៗទៀតនៅយប់មិញ ថានឹងទាមទារយកអំណាចប្រជាធិបតេយ្យ មកប្រគល់ឱ្យប្រជាពលរដ្ឋ បណ្តេញឱ្យអស់របបថាក់ស៊ីន ចាប់ពីថ្ងៃចន្ទទី ១៩នេះតទៅ !
ថ្ងៃ១៩ឧសភា ខួបបួនឆ្នាំគត់នៃការបង្ក្រាបហិង្សាបំបែកបាតុករអាវក្រហម ដែលកាលណោះបានធ្វើពលរដ្ឋ៩០នាក់ស្លាប់ និងជិតពីរពាន់នាក់រងរបួស។ ហេតុការណ៍នេះ នៅដក់ជាប់ក្នុងអារម្មណ៍ពលរដ្ឋថៃ ដូច្នេះប្រសិនបើមានអ្វីមិនស្រួលតែបន្តិច រងើកភ្លើងដែលនៅក្តៅស្រាប់ អាចឆាបឆេះជាអណ្តាលភ្លើងបានភ្លាម។ ខាងយោធា ដែលមានប្រមុខដឹកនាំ គឺ លោក ចាក់ទុប៉ន ព្រំប៉ង ជាមនុស្សស្និទ្ធនឹងបក្សត្រកូលថាក់ស៊ីន បានស្រែកដែរនៅថ្ងៃចន្ទនេះ ថានឹងការពារអំណាច សំឡេងប្រជាជន រហូតដល់ដង្ហើមចុងក្រោយ។
បើ ទាំងក្រុមអាវលឿងទាំងក្រុងក្រុមអាវក្រហម សុទ្ធតែនៅថ្នល់មកធ្វើជាផ្លូវសម្រាប់បញ្ចេញកំហឹងទាំងអស់គ្នា នោះការបះទង្គិចគ្នា អាចងាយនឹងផ្ទុះឡើងខ្លាំងណាស់។ អ្នកវិភាគខ្លះបានហ៊ានដល់ទៅ ព្រលយអំពីគ្រោះផ្ទុះចលាចលហិង្សាជាថ្មី ឬដល់ថ្នាក់សង្គ្រាមស៊ីវិលផង។
វិបត្តិនយោបាយជះចំហាយអាក្រក់ដល់សេដ្ឋកិច្ច
នេះជាលើកទីមួយហើយ គិតចាប់តាំងការរងគ្រោះទឹកជំនន់ដ៏ធ្ងន់ធ្ងរ កាលពីឆ្នាំ២០១១មក ដែលសេដ្ឋកិច្ចថៃ បានស្គាល់ការរួមថយចុះយ៉ាងដូច្នេះ។ ការធ្លាក់ចុះ មិនធ្លាប់មាននេះគឺបណ្តាលវិបត្តិនយោបាយបានធ្វើឱ្យអ្នកចាយវាយបាត់បង់ទំនុកទំនុកចិត្ត និងទេសចរភ័យខ្លាច។
ជាតួលេខ ៖ ផលិតផលសរុបក្នុងស្រុកធ្លាក់ចុះអស់ ០,៦%បើប្រៀបទៅនឹងរយៈពេលដូចគ្នានៅឆ្នាំ២០១៣ ខាងវិនិយោគវិញធ្លាក់ចុះ៩,៨% វិស័យទេសចរណ៍សណ្ឋាគារ ភោជ្ជនីដ្ឋានធ្លាក់ចុះជាងបីភាគរយ។
ថៃជាខ្លាសេដ្ឋកិច្ចប្រចាំតំបន់ ជាប្រទេសជាប់ចំណាត់ថ្នាក់លេខពីរ នៅអាស៊ីអាគ្នេយ៍ បន្ទាប់ពីប្រទេសឥណ្ឌូណេស៊ី។ ថៃនេះ មានកម្លាំងសេដ្ឋកិច្ចរឹងមាំខ្លាំង និងមានសមត្ថភាពល្បីគួរឱ្យកត់សម្គាល់ អាចធន់ទប់ទល់ នឹងវិបត្តិនយោបាយបានរហូតមក។ សូម្បីតែនៅឆ្នាំ២០១១ ឆ្នាំដែលមានគ្រោះមហន្តរាយទឹកជំនន់ប្រវត្តិសាស្ត្រធ្ងន់ធ្ងរខ្លាំង សេដ្ឋកិច្ចថៃរួញធ្លាក់ចុះខ្លាំង ដល់ទៅ៩% ហើយថៃត្រូវការតែមួយត្រីមាសប៉ុណ្ណោះ ក៏បានរើបឡើងវិញភ្លាម។
ប៉ុន្តែសម្រាប់លើកនេះ អ្នកវិភាគមានការសង្ស័យច្រើន ! ព្រោះ៦ខែក្រោយការផ្ទុះចលនាបាតុកម្ម មានស្លាប់ មានការទាមទារទម្លាក់ប្រមុខរដ្ឋាភិបាល បាតុកម្មនៅតែបន្តទៀតមកទល់នឹងពេលនេះម៉ោងនេះ ដើម្បីទម្លាក់រដ្ឋាភិបាលស្តីទី ទេសចរណ៍សរសរទ្រូងដ៏សំខាន់នៃសេដ្ឋកិច្ចថៃ បានធ្លាក់ចុះខ្លាំង ផលវិបាកមានធ្ងន់ធ្ងរជាពិសេសនៅបាងកក ដល់ទៅ៨-៩%។ ចំនួនទេសចរបរទេសឆ្នាំ២០១៤ បានធ្លាក់ចុះមកត្រឹមតែ ២៧លាននាក់ ទល់នឹង២៧លាននាក់កន្លះកាលពីឆ្នាំមុនៗ។
គ្រឹះសេដ្ឋកិច្ចរឹងមាំ
ជោគវាសនាសេដ្ឋកិច្ចជាទូទៅរំពឹងយ៉ាងខ្លាំងទៅលើស្ថានភាពនយោបាយ ដូច្នេះបើថៃគ្មានរដ្ឋសភា គ្មានទស្សនវិស័យដោះស្រាយវិបត្តិនៅសែនឆ្ងាយ រដ្ឋាភិបាលស្តីទីគ្មានលទ្ធភាពចាយវាយតិចតួច សេដ្ឋកិច្ចថៃត្រូវថយទៅតាមនោះដែរ។ ភ្នាក់ងារស្ថិតិជាតិព្យាករថាកំណើនសេដ្ឋកិច្ចថៃមានត្រឹមតែពី១,៥ ទៅ២,៥%ប៉ុណ្ណោះ បើប្រៀបទៅនឹងការគ្រោងទុក ៣ទៅ៤% កាលពីពេលមុន។
សេដ្ឋកិច្ចថៃ ផលិតផលសរុបធ្លាក់ចុះមែន ប៉ុន្តែអ្នកសេដ្ឋកិច្ចមិនសូវជ្រួលច្របល់ទេ ព្រោះយល់ថាមូលដ្ឋានគ្រិះសេដ្ឋកិច្ចប្រទេសនេះរឹងមាំខ្លាំងណាស់ សក្តិសមនឹងហៅថាជាខ្លាសេដ្ឋកិច្ចមែន។ ត្រឹមក្រោម១% មិនជាថ្វីទេ តែបើសេដ្ឋកិច្ចធ្លាក់ចុះពី ២ ទៅ៣%នោះទើបគួរឱ្យឆោរឡោ។ អ្នកឯកទេសជឿជាក់ថាការបោះឆ្នោតសភា នឹងអាចរៀបចំឡើងនៅខែខាងមុខ ថៃនឹងមានរដ្ឋាភិបាលថ្មី នៅត្រីមាសក្រោយ ហើយសេដ្ឋកិច្ចប្រទេសនេះនឹងស្ទុះងើបឡើងវិញ ជាក់ជាពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ