កម្ពុជារកឃើញជំងឺផ្តាសាយបក្សីកើតលើមនុស្ស ៣ករណីថ្មី ដែល២នាក់ស្លាប់
ជំងឺផ្តាសាយបក្សី៣ករណី ដែលឆ្លងទៅលើមនុស្ស ត្រូវបានរកឃើញនៅក្នុងសប្តាហ៍នេះ នៅក្នុងប្រទេសកម្ពុជា។ ហើយក្នុងចំណោមករណីនោះ មាន២ករណីបានស្លាប់រួចទៅហើយ។ រដ្ឋមន្ត្រីក្រសួងសុខាភិបាលបានថ្លែងថា ករណីជំងឺផ្តាសាយបក្សីនៅតែជាការគំរាមកំហែងដល់សុខភាពសាធារណៈរបស់ពលរដ្ឋកម្ពុជា ដែលក្នុងនោះកុមារ គឺជាមុខសញ្ញាគ្រោះថ្នាក់ជាងមនុស្សធំ។ លោករដ្ឋមន្ត្រីបានអំពាវនាវដល់ឪពុកម្តាយ អោយប្រយ័ត្នប្រយែងចំពោះសុខភាពកូនៗរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
បុរសអាយុ ៣៥ឆ្នាំម្នាក់ រស់នៅស្រុកគងពិសីខេត្តកំពង់ស្ពឺ និងកុមារីអាយុ១៥ឆ្នាំម្នាក់ មកពីស្រុកព្រៃកប្បាសខេត្តតាកែវ បានស្លាប់កាលពីថ្ងៃទី២១មករាសប្តាហ៍នេះ បន្ទាប់ពីពួកគេបានឆ្លងមេរោគផ្តាសាយបក្សី H5N1។ ករណីស្លាប់ទាំងពីរបានស្ថិតនៅក្នុងចំណោម៣ករណីនៃការរកឃើញជំងឺគ្រុនផ្តាសាយបក្សី ដែលឆ្លងមកលើមនុស្សនៅក្នុងខែមករានេះ នៅក្នុងប្រទេសកម្ពុជា។ ព័ត៌មានខាងលើនេះ ត្រូវបានផ្សព្វផ្សាយជាសាធារណៈដោយសេចក្តីប្រកាសព័ត៌មានរួម របស់ក្រសួងសុខាភិបាល និងអង្គការសុខភាពពិភពលោកប្រចាំនៅកម្ពុជា។
សេចក្តីប្រកាសព័ត៌មានរួមសរសេរថា ករណីទី៣នោះ បានកើតនៅលើកុមារអាយុ៨ឆ្នាំ រស់នៅក្នុងខណ្ឌពោធិ៍សែនជ័យ រាជធានីភ្នំពេញនេះ។ ហើយកុមារត្រូវបានព្យាបាលជាសះស្បើយហើយ។ ក្រោយការតាមដានប្រវត្តិអ្នកជំងឺ ទើបគេដឹងថា អ្នកជំងឺសុទ្ធតែមានទំនាក់ទំនង ជាមួយហ្វូងសត្វស្លាប ឬបក្សីនានា មុននឹងពួកគេធ្លាក់ខ្លួនឈឺ។
ក្នុងសេចក្តីប្រកាសព័ត៌មានរួមនោះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានបញ្ជាក់ថា មេរោគផ្តាសាយបក្សី នៅតែជាការគំរាមកំហែងដល់សុខភាពសាធារណៈ របស់ប្រជាពលរដ្ឋខ្មែរ។ នេះគឺជាករណីដែលបានកើតចំពោះមនុស្ស នៅក្នុងឆ្នាំនេះ ហើយថាកុមារនៅតែស្ថិតនៅក្នុងភាពងាយរងគ្រោះជាងគេ។ លោករដ្ឋមន្ត្រីក្រសួងសុខាភិបាល បានអំពាវនាវអោយឪពុកម្តាយ និងអាណាព្យាបាលទាំងឡាយ មិនអោយយកក្មេងទៅជិតទីកន្លែងចិញ្ចឹមសត្វមាន់ទា និងសត្វស្លាបនានា ហើយអោយពួកគេឧស្សាហ៍លាងដៃកូនៗរបស់ពួកគេ។
សេចក្តីប្រកាសព័ត៌មាន បានបញ្ជាក់ផងដែរថា ក្រុមគ្រូពេទ្យបានចុះទៅដល់កន្លែងកើតហេតុទាំង៣ករណីហើយ ដើម្បីតាមដាននិងស្រង់យកវត្ថុសំណាក ពីក្រុមមនុស្សសង្ស័យដែលបានរស់នៅ និងប៉ះពាល់អ្នកជំងឺ។ រាប់ទាំងករណីចុងក្រោយនេះ នៅកម្ពុជាមានមនុស្ស២៤នាក់ហើយ ដែលបានឆ្លងមេរោគផ្តាសាយបក្សី ហើយក្នុងចំណោមនោះ ២១នាក់បានស្លាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ