លោកដូណាល់ត្រាំទំនងជាប្តូរជំហរឈប់ដកខ្លួនចេញពីកិច្ចព្រមព្រៀងអាកាសធាតុ
ចាប់តាំងពីអំឡុងពេលធ្វើយុទ្ធនាការឃោសនាបោះឆ្នោត រហូតដល់ក្រោយជាប់ឆ្នោតឡើងកាន់តំណែងជាប្រធានាធិបតី លោកដូណាល់ត្រាំ តែងតែបានបង្ហាញនូវជំហរចង់ឲ្យអាមេរិកដកខ្លួនចេញពីកិច្ចព្រមព្រៀងអាកាសធាតុ ដែលរដ្ឋការរបស់លោកអូបាម៉ាបានចុះ នៅក្នុងអំឡុងសន្និសីទអាកាសធាតុក្រុងប៉ារីស កាលពីចុងឆ្នាំ២០១៥កន្លងទៅ។ ក៏ប៉ុន្តែ នៅពេលនេះ លោកដូណាល់ត្រាំកំពុងតែពិចារណាមើលជំហររបស់លោកឡើងវិញ ហើយទំនងជានឹងសម្រេចមិនដកខ្លួនចេញពីកិច្ចព្រមព្រៀងអាកាសធាតុនេះទេ។
ចុះផ្សាយនៅថ្ងៃ៖
តម្រ៉ុយដ៏សំខាន់និងថ្មីចុងក្រោយគេ ដែលបង្ហាញថា រដ្ឋការរបស់លោកដូណាល់ត្រាំអាចផ្លាស់ប្តូរជំហរ នៅក្នុងសំណុំរឿងកិច្ចព្រមព្រៀងអាកាសធាតុនេះ គឺការថ្លែងរបស់រដ្ឋមន្រ្តីក្រសួងថាមពលអាមេរិក កាលពីថ្ងៃអង្គារ។ លោករីក ភែរី បានលើកឡើងថា លោកនឹងផ្តល់អានុសាសន៍ដល់លោកដូណាល់ត្រាំកុំឲ្យដកខ្លួនចេញពីកិច្ចព្រមព្រៀងអាកាសធាតុ ដោយគ្រាន់តែសុំចរចាឡើងវិញលើកាតព្វកិច្ចរបស់អាមេរិក នៅក្នុងកិច្ចព្រមព្រៀងនេះតែប៉ុណ្ណោះ។
ជំហររបស់លោករីក ភែរី គឺស្របនឹងជំហររបស់មន្រ្តីជាន់ខ្ពស់មួយចំនួនផ្សេងទៀត ដែលស្និទ្ធនឹងលោកដូណាល់ត្រាំ រួមមានដូចជា លោករ៉ិច ធីល័រសុន រដ្ឋមន្រ្តីការបរទេស លោកស្រីអ៊ីវ៉ាន់កា និងលោកចារេដ កាស្ហណ័រ ដែលជាកូនស្រី និងកូនប្រសារ ព្រមទាំងជាទីប្រឹក្សាដ៏មានឥទ្ធិពលរបស់លោកដូណាល់ត្រាំ។
ក្នុងពេលជាមួយគ្នានេះ ក្រុមហ៊ុនធំៗលំដាប់អន្តរជាតិចំនួន ១៣ ដែលក្នុងនោះក៏រួមមានទាំងក្រុមហ៊ុនរបស់អាមេរិកផងដែរ បាននាំគ្នាចេញសេចក្តីអំពាវនាវមួយ កាលពីថ្ងៃពុធម្សិលមិញ ស្នើសុំឲ្យលោកដូណាល់ត្រាំរក្សាសមាជិកភាពអាមេរិក នៅក្នុងកិច្ចព្រមព្រៀងអាកាសធាតុ។
ក្រុមហ៊ុនធំៗទាំងនេះ ដែលរួមមានដូចជាក្រុមហ៊ុនប្រេងប៊ីភី និងស្ហ៊ែល ក្រុមហ៊ុនគីមីឌុយប៉ុង និងក្រមហ៊ុនជំនាញខាងបច្ចេកវិទ្យា ដូចជា Google, Intel និង Microsoft ជាដើម បាននាំគ្នាលើកឡើងថា ការរក្សាសមាជិកភាពអាមេរិកនៅក្នុងកិច្ចព្រមព្រៀងអាកាសធាតុ គឺមិនត្រឹមតែរួមចំណែកក្នុងការទប់ស្កាត់ការប្រែប្រួលអាកាសធាតុតែប៉ុណ្ណោះទេ តែវាក៏នឹងជួយផងដែរដល់ក្រុមហ៊ុនពួកគេ នៅក្នុងការប្រកួតប្រជែងក្នុងទីផ្សារអន្តរជាតិ ក្នុងវិស័យថាមពលស្អាត ដែលបច្ចុប្បន្នកំពុងតែមានកំណើនខ្លាំង ហើយដែលជាទីផ្សារប្រកបដោយសក្តានុពលទៅថ្ងៃអនាគត។
ការអះអាងបែបនេះ គឺជាការផ្ទុយស្រឡះពីការអះអាងរបស់លោកដូណាល់ត្រាំ ដែលតែងតែលើកឡើងថា កិច្ចព្រមព្រៀងអាកាសធាតុធ្វើឲ្យក្រុមហ៊ុនអាមេរិកបាត់បង់ភាពប្រកួតប្រជែងលើទីផ្សារអន្តរជាតិ បង្កផលប៉ះពាល់ដល់កំណើនសេដ្ឋកិច្ចអាមេរិក និងធ្វើឲ្យប្រជាជនបាត់បង់ការងារធ្វើ។
ទោះជាយ៉ាង ការសម្រេចដកខ្លួន ឬបន្តស្ថិតក្នុងកិច្ចព្រមព្រៀងអាកាសធាតុ គឺស្ថិតនៅលើលោកដូណាល់ត្រាំ ហើយការសម្រេចចិត្តនេះគ្រោងនឹងធ្វើនៅមុនដំណាច់ខែឧសភាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ