ជំនួបរវាងនាយករដ្ឋមន្ត្រីជប៉ុន និងលោកដូណាល់ ត្រាំ
នៅក្រុងញូវយក ថ្ងៃព្រហស្បតិ៍ម្សិលមិញ លោកដូណាល់ ត្រាំ បានទទួលជួបនាយករដ្ឋមន្ត្រីជប៉ុន លោកស្ហ៊ីនហ្សូ អាបេ ជាងមួយម៉ោង។ លោកអាបេបានលើកឡើងថា លោកត្រាំ ជាអ្នកដឹកនាំម្នាក់ ដែលលោកអាចផ្តល់ទំនុកចិត្តបាន។
ចុះផ្សាយនៅថ្ងៃ៖
នាយករដ្ឋមន្ត្រីជប៉ុន ស្ហ៊ីនហ្សូ អាបេ ជាមេដឹកនាំបរទេសទី១ ដែលលោកដូណាល់ ត្រាំ បានទទួលជួប បន្ទាប់ពីលោកត្រាំបានជាប់ឆ្នោត ជាប្រធានាធិបតីអាមេរិកមក។ លោកអាបេខំស្កាត់ទៅជួបលោកត្រាំ នៅសហរដ្ឋអាមេរិក ដោយសារតែលោកបារម្ភចំពោះទំនាក់ទំនង រវាងសហរដ្ឋអាមេរិក និងជប៉ុន នៅពេលលោកត្រាំ ចូលកាន់កាប់អាមេរិក នៅខែមករាខាងមុខនេះ។
ក្តីបារម្ភគឺដោយសារតែ ក្នុងយុទ្ធនាការឃោសនាបោះឆ្នោតប្រធានាធិបតីអាមេរិកកន្លងមក លោកត្រាំ បានលើកឡើងថា លោកគ្រោងដកទាហានអាមេរិកចេញពីភាគខាងត្បូងឧបទ្វីបកូរ៉េ និងចេញពីជប៉ុនផងដែរ ប្រសិនបើកូរ៉េខាងត្បូង និងជប៉ុនមិនបង់វិភាគទានអោយបានសមស្រប។ ដូណាល់ ត្រាំ ក៏បានស្នើអោយជប៉ុននិងកូរ៉េខាងត្បូង មានអាវុធបរមាណូផងដែរ ដើម្បីប្រឈមនឹងកូរ៉េខាងជើង។
លោកអាបេ ក៏ចង់លើកឡើងជាមួយលោកត្រាំ ពីកិច្ចព្រមព្រៀងរពាណិជ្ជកម្មសេរីអន្តរប៉ាស៊ីហ្វិកដែរ ព្រោះវាអាចជួយជប៉ុន ប្រឈមនឹងចិន នៅអាស៊ីបាន។ សភាអាមេរិកទាំង២មិនទាន់ផ្តល់សច្ចាប័នដល់កិច្ចព្រមព្រៀងនេះនៅឡើយ។
ទោះយ៉ាងនេះក្តី អ្នកនាំពាក្យរបស់លោកត្រាំ ប្រាប់ថា លោកអាបេ និងលោកត្រាំ មិនអាចជជែកគ្នាស៊ីជម្រៅ ពីសំណុំរឿងទាំងអស់នេះទេ ដរាបណាលោកត្រាំ នៅមិនទាន់ចូលកាន់តំណែងជាផ្លូវការ។
ទន្ទឹមនឹងជំនួបជាមួយលោកអាបេ តាំងពីថ្ងៃព្រហស្បតិ៍ម្សិលមិញ លោកត្រាំបន្តពិនិត្យជ្រើសរើសបេក្ខជនសម្រាប់តំណែងសំខាន់ៗ ក្នុងជួររដ្ឋាភិបាល។ នៅមិនទាន់មានការជ្រើសរើសណាមួយជាផ្លូវការនៅឡើយទេ។ ប៉ុន្តែ សារព័ត៌មានអាមេរិកមួយចំនួនបានចុះផ្សាយថា លោកMichael Flynn ជាអតីតមេដឹកនាំចារកិច្ចយោធា ចន្លោះឆ្នាំ២០១២ ដល់ឆ្នាំ២០១៤ ត្រូវបានជ្រើសរើសអោយធ្វើជាអ្នកប្រឹក្សាសន្តិសុខជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ