ភេរវកម្មក្រុងGaziantepតួកគី៖ លោកអ៊ែរដូហ្កានសង្ស័យលើក្រុមជីហាតរដ្ឋអ៊ីស្លាម
ចុះផ្សាយនៅថ្ងៃ៖
ស្តាប់ - ០៤:០៧
នៅតួកគី តួលេខអ្នកស្លាប់ក្នុងភេរវកម្មក្រុងហ្កាស្យានតេប Gaziantep ភាគអាគ្នេយ៍ យប់ថ្ងៃសៅរ៍ម្សិលមិញ បានកើនដល់៥០នាក់។ ភេរវកម្មយប់មិញ កើតឡើង ក្នុងពិធីអាពាហ៍ពិពាហ៍សហហគមន៍គួដឌីស្ថាន កើតឡើងតែប៉ុន្មានម៉ោងប៉ុណ្ណោះ ក្រោយនាយករដ្ឋមន្ត្រីតួកគីប្រកាសថា តួកគីចង់ចូលរួមដោះស្រាយវិបត្តិស៊ីរី អោយកាន់តែសកម្មជាងមុន។
ប្រធានាធិបតីអ៊ែរដូហ្កាន សង្ស័យថា ក្រុមជីហាតរដ្ឋអ៊ីស្លាមជាអ្នកបង្កភេរវកម្មនេះ។ លោកអ៊ែរដូហ្កានបានឆ្លៀតបញ្ចូលក្រុមលោកហ្គូឡិន ដែលតួកគីចោទថា ជាមេក្លោងរដ្ឋប្រហារមិនបានសម្រេចថ្ងៃ១៥កក្កដា ទៅក្នុងប្រភេទតែមួយជាមួយក្រុមភេរវជនរដ្ឋអ៊ីស្លាម។ លោកអ៊ែរដូហ្កានថា គ្មានអ្វីខុសគ្នារវាងក្រុមលោកហ្គូឡិន ក្រុមបក្សការងារគួដឌីស្ថានហៅកាត់ថា PKK និងក្រុមជីហាតរដ្ឋអ៊ីស្លាមទេ។
ហេតុផលនាំអោយប្រធានាធិបតីតួកគីសង្ស័យក្រុមភេរវជនរដ្ឋអ៊ីស្លាម
ប៉ុន្មានខែចុងក្រោយនេះ ក្រុមភេរវជនរដ្ឋអ៊ីស្លាមបានបង្កើនការវាយប្រហារនៅតួកគីច្រើន។ ជាក់ស្តែង យើងឃើញមានភេរវកម្មនៅអាកាសយានដ្ឋានអ៊ីស្តង់ប៊ូល កាលពីខែមិថុនា ដែលបានសម្លាប់មនុស្ស៤៤នាក់។ ត្បិតថា ភេរវកម្មនេះរួមទាំងភេរវកម្មផ្សេងៗទៀត មិនត្រូវបានក្រុមរដ្ឋអ៊ីស្លាមប្រកាសផ្លូវការថា ជាស្នាដៃក្រុមខ្លួន ក៏ក្រុមនេះមិនបានបដិសេធការចោទប្រកាន់ដែរ។
មូលហេតុមួយទៀត ភេរវកម្មនៅតួកគីយប់មិញ កើតឡើងនៅភាគអាគ្នេយ៍ នៅក្រុងហ្កាស្យានតេប ជាប់ព្រំដែនជាមួយស៊ីរី។ ជនភៀសខ្លួនស៊ីរី ដែលគេចហិង្សាសង្គ្រាមជាង៥ឆ្នាំមកនេះ ក៏បាននាំគ្នាភៀសចូលកាត់តាមក្រុងហ្កស្យានតេប ណៅតួកគីនេះដែរ។ ក្រៅពីមានជនភៀសខ្លួន និងក្រុមប្រឆាំងគួដឌីស្ថាន តំបន់ហ្កាស្យានតេបក៏អាចសំបូរក្រុមជីហាតច្រើនផ្តុំគ្នានៅដែរ។ នេះហើយជាបញ្ហាក្តៅ។
អ្នកកាសែតមួយរូបដែលបានទៅដល់ហា្កស្យានតេប ប្រាប់ថា ក្រុមជីហាតរដ្ឋអ៊ីស្លាមមានសកម្មជនខ្លួនខ្លះៗ នៅហ្កាស្យានតេប។ ម្ល៉ោះហើយ ទើបលោកអ៊ែរដូហ្កានហ៊ានសង្ស័យក្រុមភេរវជនរដ្ឋអ៊ីស្លាម ថាធ្វើភេរវកម្មយប់មិញនេះ។
មូលហេតុសំខាន់មួយទៀតគឺថា ភាគអាគ្នេយ៍តួកគីសំបូរសហគមន៍គួដឌីស្ថានរស់នៅ។ នៅស៊ីរីក្បែរនោះ កងកម្លាំងគួដឌីស្ថាន ជាមិត្តអាមេរិក បានប្រយុទ្ធស្វិតស្វាញប្រឆាំងក្រុមជីហាតរដ្ឋអ៊ីស្លាម។ ដូច្នេះ សហគមន៍គួដឌីស្ថានជាសត្រូវសំខាន់របស់ក្រុមភេរវជនរដ្ឋអ៊ីស្លាមដែរ។ ទាំងនេះសុទ្ធតែជាមូលហេតុដែលអាចអោយគេចោទក្រុមរដ្ឋអ៊ីស្លាម ថាបង្កភេរវកម្មយប់មិញនេះ។
លោកអ៊ែរដូហ្កានលើកឡើងដែរថា ភេរវកម្មយប់មិញ ធ្វើឡើងក្នុងទិសដៅធ្វើអោយសហគមន៍ជាតិពិន្ធុផ្សេងៗនៅតួកគី ជួបភាពតានតឹងនឹងគ្នា។
ភេរវកម្មនៅហ្កាស្យាតេប ក៏អាចមានហេតុផលពាក់ព័ន្ធនយោបាយស៊ីរីដែរ
ថ្ងៃសៅរ៍ម្សិលមិញ ប៉ុន្មានម៉ោងមុនភេរវកម្ម នាយករដ្ឋមន្ត្រីតួកគី ប៊ីណាលី យីលឌីរីម បានប្រកាសថា តួកគីចង់ដើរតួនាទីកាន់តែសកម្មក្នុងដំណោះស្រាយជម្លោះស៊ីរី។
តួកគីតែងមានជំហរប្រឆាំងលោកអាសាដ នៅស៊ីរី ជានិច្ច។ តែម្សិលមិញ នាយករដ្ឋមន្ត្រីយីលឌីរីម ហាក់ចង់លំអៀងទៅរកលោកអាសាដវិញ។ លោកយីលឌីរីម លើកឡើងថា ទោះជាតួកគីមិនពេញចិត្តលោកអាសាដ ក៏បច្ចុប្បន្ននេះ លោកអាសាដជាតួអង្គសំខាន់មួយក្នុងសង្គ្រាមស៊ីរី ហើយតួកគិប្រហែលអាចនិយាយជាមួយលោកអាសាដ ពីនយោបាយអន្តរកាលស៊ីរី។
ពាក្យទាំងនេះ អាចអោយគេគិតថា តួកគីកំពុងលំអៀងទៅរកលោកអាសាដ ហើយអាចនឹងគាំទ្រលោកអាសាដវិញក៏ថាបាន។ ដោយសារប្រទេសលោកខាងលិចរិះគន់ការបោសសម្អាតរដ្ឋប្រហារតួគកី តួកគីបានងាកទៅផ្សះផ្សាគ្នាជាមួយរុស្ស៊ីវិញ ដើម្បីទទួលបានការគាំទ្រពីរុស្ស៊ី រឿងតួកគីខឹងលោកហ្គូឡិន។ តែរុស្ស៊ីខុសពីតួគកី រុស្ស៊ីគាំទ្រលោកអាសាដ។ ដូច្នេះ ពេលនេះ តួកគីក៏អាចគាំទ្រលោកអាសាដតាមរុស្ស៊ីដែរ។
ក្រុមឧទ្ទាមស៊ីរី ក៏ដូចជាក្រុមភេរវជនរដ្ឋអ៊ីស្លាម សុទ្ធតែស្អប់លោកអាសាដ។ ដូច្នេះ ក្រុមរដ្ឋអ៊ីស្លាម រឺក៏ក្រុមភេរវជនណាមួយ អាចធ្វើភេរវកម្មម្សិលមិញនេះឡើង ដោយសារខឹងនឹងជំហរថ្មីរបស់តួកគី ដោយសារនាយករដ្ឋមន្ត្រីតួកគីលើកឡើងថា ចង់ពិភាក្សាជាមួយលោកអាសាដនេះឯង។
សប្តាហ៍នេះ ភាគអាគ្នេយ៍និងភាគខាងកើតតួកគីរងភេរវកម្មដល់ទៅ៣ សម្លាប់មនុស្ស១៤នាក់។ អាជ្ញាធរតួកគីទំលាក់កំហុសលើក្រុមប្រដាប់អាវុធបក្សការងារគួដឌីស្ថាន PKK។ រដ្ឋាភិបាលតួកគីក៏មិនខុសពីរដ្ឋាភិបាលស៊ីរី រឺក៏អ៊ីរ៉ង់ដែរ គឺតួកគីមិនពេញចិត្តនឹងក្រុមប្រដាប់អាវុធគួដឌីស្ថានដែលចង់អោយសហគមន៍គួដឌីស្ថានគ្រប់គ្រងនយោបាយតួកគី ចង់ផ្តាច់ទឹកដីពីតួកគី។
តួកគីលូកដៃផ្ទាល់ក្នុងបញ្ហាគួដឌីស្ថាននៅស៊ីរី ហើយទំនងជាកំពុងចរចាជាមួយលោកអាសាដរឿងនេះ។ ថ្មីៗនេះ តួកគី ស៊ីរី អ៊ីរ៉ង់ និងរុស្ស៊ី ក៏ប្រហែលជាបានព្រមព្រៀងគ្នាដោយសំងាត់ ទាក់ទងបញ្ហាគួដឌីស្ថាននេះ។
ដោយឡែក បូកផ្សំភាពតានតឹងជាមួយក្រុមគួដឌីស្ថាន និងក្រុមភេរវជនរដ្ឋអ៊ីស្លាម ស្ថានការណ៍នៅតួកគីពេលនេះ កំពុងផុយស្រួយ ពិសេសក្រោយរដ្ឋប្រហារមិនបានសម្រេចថ្ងៃ១៥កក្កដាតែម្តង។ ពេលនេះ តួកកីកាន់តែងាយរងគ្រោះដោយភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ