ទំនាក់ទំនងតួកគី-អាល្លឺម៉ង់ចាប់ផ្តើមធូរស្រាល ក្រោយតួកគីលើកចេញបម្រាមប្រឆាំងអាល្លឺម៉ង់
តួកគីឈប់ហាមឃាត់តំណាងរាស្ត្រអាល្លឺម៉ង់ ចូលទស្សនកិច្ចមូលដ្ឋានយោធាតួកគី Incirlik ទៀតហើយ។ ថ្ងៃព្រហស្បតិ៍នេះ តួកគីបានលើកចេញនូវការហាមប្រាមនេះ បង្ហាញថា ទំនាក់ទំនងតួកគី-អាល្លឺម៉ង់ចាប់ផ្តើមធូរស្រាលវិញហើយ។ ទំនាក់ទំនងរវាងប្រទេសទាំង២ មានភាពតានតឹងកន្លងមក ដោយសារតែអាល្លឺម៉ង់ទទួលស្គាល់អំពើប្រល័យពូជសាសន៍លើប្រជាជនអាមេនី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ប្រមុខការទូតអាល្លឺម៉ង់ លោក Frank-Walter Steinmeier បានសំដែងការពេញចិត្ត ចំពោះរដ្ឋាភិបាលតួកគីដែលបានលើកចេញនូវបម្រាមប្រឆាំងអាល្លឺម៉ង់។ ជាបម្រាមមិនអោយតំណាងរាស្ត្រអាល្លឺម៉ង់ ឈានជើងចូលមូលដ្ឋានយោធា Incirlik នៅភាគខាងត្បូងតួកគី។ ទាហានអាល្លឺម៉ង់កំពុងតែស្ថិតនៅមូលដ្ឋានយោធាមួយនេះ ក្នុងក្របខណ្ឌបេសកកម្មកំចាត់ក្រុមជីហាតរដ្ឋអ៊ីស្លាមដើមបូព៌ា។
តួកគីបានចេញបម្រាមប្រឆាំងអាល្លឺម៉ង់ ក្រោយពេលសភាអាល្លឺម៉ង់ទទួលស្គាល់ កាលពីខែមិថុនា ថាក្នុងជំនាន់អាណាចក្រអូតូម៉ង់ ឆ្នាំ១៩១៥ ប្រជាជនអាមេនីបានរងគ្រោះដោយអំពើប្រល័យពូជសាសន៍។ តួកគីព្រមអោយតំណាងរាស្ត្រអាល្លឺម៉ង់បានទស្សនកិច្ចមូលដ្ឋានយោធាតួកគីវិញមែន តែការអនុញ្ញាតនេះក៏មានបង្កប់លក្ខខណ្ឌដែរថា បើអាល្លឺម៉ង់ចង់ធូរស្រាលជាមួយតួកគីវិញ អាល្លឺម៉ង់ត្រូវឈប់ប៉ះពាល់តួកគី។
កាលពិសប្តាហ៍មុន ប្រមុខការទូតអាល្លឺម៉ង់ និងប្រមុខដឹកនាំមែរគែល បានខំបន្ធូរជំហរតានតឹងជាមួយតួកគី ដោយបានលើកឡើងថា សេចក្តីសម្រេចរបស់សភាអាល្លឺម៉ង់ ចំពោះការសម្លាប់រង្គាលប្រជាជនអាមេនីកន្លងមកនោះ ក៏គ្មានលក្ខណៈបែបបង្ខំ រឺតានតឹងអ្វីដែរ។ ថ្នាក់ដឹកនាំអាល្លឺម៉ង់ចង់សំដៅថា សេចក្តីសម្រេចនេះ គ្មានអ្វីធ្ងន់ធ្ងរទេ។
ទាក់ទងនឹងបញ្ហាជនភៀសខ្លួននៅអឺរ៉ុប ដែលអាល្លឺម៉ង់កំពុងចូលរួមដោះស្រាយវិញ តួកគីធ្លាប់គំរាមកាត់ផ្តាច់កិច្ចព្រមព្រៀងស្តីពីជនភៀសខ្លួន ដែលសម្រេចកន្លងមក ជាមួយអឺរ៉ុប បើអឺរ៉ុបមិនមិនព្រមលើកលែងទិដ្ឋាការដើរហើរដល់ប្រជាជនតួកគីទេនោះ។
ដោយឡែក អាល្លឺម៉ង់បានសំដែងការមិនសប្បាយចិត្តចំពោះអាជ្ញាធរតួកគី ដែលបានដកហូត កាលពីថ្ងៃចន្ទ នូវបទសម្ភាស របស់ក្រុមវិទ្យុទូរទស្សន៍អាល្លឺម៉ង់មួយក្រុម ដែលបានសម្ភាសរដ្ឋមន្ត្រីក្រសួងកីឡាតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ