សភាអ៊ុយក្រែនសុំតុលាការអន្តរជាតិក្រុងឡាអេអោយកាត់ទោសលោកយ៉ានូកូវិច
នៅថ្ងៃអង្គារនេះ សភាអ៊ុយក្រែនបានសុំតុលាការព្រហ្មទណ្ឌអន្តរជាតិ ក្រុងឡាអេ អោយកាត់ទោសប្រធានាធិបតីធ្លាក់ពីតំណែង វិចទ័រ យ៉ានូកូវិច។ សភាអ៊ុយក្រែនបានបោះឆ្នោតដោយសម្លេងភាគច្រើន សម្រេចអោយសវនាការកាត់ទោសលោកយ៉ានូកូវិច ធ្វើឡើងនៅតុលាការអន្តរជាតិក្រុងឡាអេ។ សំណូមពរនេះធ្វើឡើង ក្រោយពេលមានការបង្ក្រាបហិង្សាលើក្រុមបាតុករ នៅទីក្រុងគៀវ កាលពីសប្តាហ៍មុន សម្លាប់មនុស្ស៨២នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
នៅថ្ងៃអង្គារនេះ សភាអ៊ុយក្រែន បានសុំតុលាការព្រហ្មទណ្ឌអន្តរជាតិ ក្រុងឡាអេ អោយកាត់ទោសលោកវិចទ័រ យ៉ានូកូវិចដែលសភាបានទំលាក់ចេញពីតំណែង កាលពីថ្ងៃសៅរ៍សប្តាហ៍មុន។ យោងតាមសភាអ៊ុយក្រែន លោកយ៉ានូកូវិច គឺជាអ្នកទទួលខុសត្រូវក្នុងបទឧក្រិដ្ឋប្រឆាំងមនុស្សជាតិ។ សភាអ៊ុយក្រែនក៏បានសុំតុលាការក្រុងឡាអេ អោយកាត់ទោសអ្នកទទួលខុសត្រូវជាន់ខ្ពស់មួយចំនួនទៀត ដែលបានដាក់បញ្ជាអោយមានការបង្ក្រាបក្រុមបាតុករផងដែរ ក្នុងពេល៣ខែមកនេះ។
សភាបានបរិហារថា ជាង៣ខែមកនេះ កងកម្លាំងអ៊ុយក្រែនទទួលបញ្ជាអោយប្រើកម្លាំងបាយ និងអាវុធប្រឆាំងបាតុករដែលមកតវ៉ាតាមបែបផែនសន្តិភាព ធ្វើអោយមនុស្សជាង១០០នាក់ ជាជនជាតិអ៊ុយក្រែន និងជនបរទេស ត្រូវរងការសម្លាប់។ មនុស្សជាង២ពាន់នាក់រងរបួស ក្នុងនោះ៥០០នាក់ស្ថិតក្នុងដំណាក់កាលធ្ងន់ធ្ងរ។
នៅថ្ងៃអង្គារនេះ តំណាងសហភាពអឺរ៉ុប លោកស្រីកាថឺរីន អាស្ហតុន ដែលកំពុងទស្សនកិច្ចអ៊ុយក្រែន បានសុំអោយរុស្ស៊ីដែលមិនទទួលស្គាល់អាជ្ញាធរអ៊ុយក្រែនថ្មីនោះ ទុកដោយអ៊ុយក្រែនជ្រើសរើសផ្លូវដើរដោយខ្លួនឯង និងបានសុំអោយអ៊ុយក្រែនរក្សាអោយបាននូវបូរណភាពទឹកដី។ ដោយឡែក ការបង្កើត រដ្ឋាភិបាលអ៊ុយក្រែនថ្មី ដែលត្រូវធ្វើនៅថ្ងៃអង្គារនេះ ត្រូវបានលើកពេលទៅធ្វើនៅថ្ងៃព្រហស្បតិ៍វិញ។ នៅថ្ងៃអង្គារនេះ យុទ្ធនាការឃោសនាបោះឆ្នោត សម្រាប់ការបោះឆ្នោតប្រធានាធិបតីមុនអាណត្តិ ថ្ងៃ២៥ឧសភាខាងមុខ បានចាប់ផ្តើមហើយ។ បេក្ខជនចង់ឈរឈ្មោះ ត្រូវមកចុះឈ្មោះអោយបានយ៉ាងយូរ ថ្ងៃ៣០មិនា ខាងមុខ។ អតីតជើងឯកកីឡាប្រដាល់ លោក វិតាលី គ្លីតឆ្កូ ដែលជាមេដឹកនាំចលនាប្រឆាំងដ៏ល្បីឈ្មោះ បានប្រកាសឈរឈ្មោះ ជាបេក្ខជន។ រីឯអតីតនាយករដ្ឋមន្ត្រី លោកស្រីទីម៉ូឆេនកូ បានប្រាប់ថា មិនកាន់តំណែងទៀតទេ ហើយលោកស្រីនឹងទៅព្យាបាលជំងឺនៅអាល្លឺម៉ង់៕
រុស្ស៊ីជំទាស់នឹងការរៀបចំការបោះឆ្នោតប្រធានាធិបតីខែឧសភានេះ ព្រោះថា យោងតាមកិច្ចព្រមព្រៀងស្រោចស្រង់វិបត្តិអ៊ុយក្រែន ដែលក្រុមប្រឆាំង បានចុះហត្ថលេខាជាមួយលោកយ៉ានូកូវិច កាលពីថ្ងៃសុក្រសប្តាហ៍មុន ការបោះឆ្នោតនេះ អាចធ្វើទៅបាន លុះត្រាមានកំណែទម្រង់រដ្ឋធម្មនុញ្ញជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ