លោក បារាក់ អូបាម៉ា ត្រៀមផ្តល់សិទ្ធិដល់ជនអន្តោរប្រវេសន៍ខុសច្បាប់ ៥ លាននាក់
លោកប្រធានាធិបតីសហរដ្ឋអាមេរិកមានបំណងចុះហត្ថលេខាលើក្រិត្យមួយចំនួន ជាប្រយោជន៍ដើម្បីផ្តល់សិទ្ធិដល់ជនបរទេសចំនួន ៥ លាននាក់ ដែលពុំមានលិខិតស្នាមត្រឹមត្រូវ។ ការប៉ុនប៉ងរបស់លោកលោក អូបាម៉ា អាចបង្កអោយមានការប្រឈមមុខគ្នាជាមួយតំណាងគណបក្សសាធារណរដ្ឋ ដែលកំពុងគ្រប់គ្រងសភា និងព្រឹទ្ធសភា។
ចុះផ្សាយនៅថ្ងៃ៖ កែប្រែថ្ងៃទី៖
បើតាមការផ្សាយរបស់កាសែត New York Times លោកប្រធានាធិបតី បារាក់ អូបាម៉ា ចង់ជំរុញអោយមានអោយមានដំណោះស្រាយជាក់លាក់មួយលើសុំណុំរឿងជនអន្តោរប្រវេសន៍ខុសច្បាប់មួយនេះអោយបានចប់សព្វគ្រប់នៅដំណាច់ឆ្នាំនេះ។ បើតាមវិទ្យាស្ថាននយោបាយទេសន្តរប្រវេសន៍ (Migration Policy Institute) បានអោយដឹងថា សព្វថ្ងៃនេះ មានជនអន្តោរប្រវេសន៍ខុសច្បាប់គ្មានលិខិតស្នាមត្រឹមត្រូវចំនួន ១១ លាន ៧ សែននាក់កំពុងរស់នៅលើទឹកដីសហរដ្ឋអាមេរិក។ ភាគច្រើននៃជនទាំងនោះជាជនជាតិម៉ិកស៊ិក។
បើតាមប្រភពដែលសុំមិនបញ្ចេញឈ្មោះពីសេតវិមានបានអោយដឹងថា ផែនការរបស់លោក អូបាម៉ា គឺចង់ផ្តល់លិខិតស្នាមអនុញ្ញាតអោយជនអន្តោរប្រវេសន៍អាចធ្វើការងារស្របច្បាប់ និងទទួលបានកិច្ចការពារចៀងវាងការបណ្តេញចេញពីសហរដ្ឋអាមេរិក។ គំរោងនេះផ្តោតលើជន ដែលគ្មានលិខិតស្នាមត្រឹមត្រូវ ប៉ុន្តែមានកូនកើតនៅលើទឹកដីអាមេរិក។ កុមារទាំងនោះខ្លះមានសញ្ជាតិអាមរិក ខ្លះទៀតមានត្រឹមតែប័ណ្ណស្នាក់នៅអចិន្ត្រៃយ៍ (Green Card) តែប៉ុណ្ណោះ។ ចំនួនពិតប្រាកដណាមួយរបស់ជនអន្តោរប្រវេសន៍ ដែលអាចទទួលបានដំណោះស្រាយថ្មីនេះ អាស្រ័យលើលក្ខណៈវិនិច្ឆ័យជាពិសេសចំនួនឆ្នាំរស់នៅលើទឹកដីសហរដ្ឋអាមេរិក។
យោងតាមសំដីរបស់លោក Josh Earnest អ្នកនាំពាក្យប្រចាំសេតវិមានបានអោយដឹងថា មកដល់ពេលនេះពុំទាន់មានអ្វីត្រូវបានសំរេចឡើយ។ ក្រុមការងារលើសំណុំរឿងនេះនឹងដាក់អនុសាសន៍ជូនលោក អូបាម៉ា ក្រោយត្រលប់ពីដំណើរទស្សនកិច្ចនៅអាស៊ីចុងសប្តាហ៍នេះ។
ក្រោយពីបានទទួលដំណឹងនេះភ្លាម ខាងគណបក្សសាធារណរដ្ឋបានប្រកាសជំហរប្រឆាំងដាច់ខាត។ បើតាមលោក John Boehner តំណាងរាស្រ្តគណបក្សសាធារណរដ្ឋ និងជាប្រធានសភាបានអោយដឹងថា ប្រសិនបើរដ្ឋបាលលោក អូបាម៉ា ហ៊ានសំរេចសំណុំរឿងនេះតែឯងនោះ ខាងសភា និងព្រឹទ្ធសភានឹងបង្កព្យុះភ្លៀង ដោយគំរាមមិនអនុម័តច្បាប់ថវិកាជាតិ ដែលអាចធ្វើអោយរដ្ឋាភិបាលសហព័ន្ធសហរដ្ឋអាមេរិកជាប់គាំងដំណើរការដូចកាលពីខែតុលា ឆ្នាំ ២០១៣។ សូមបញ្ជាក់ថា បច្ចុប្បន្ននេះគណបក្សសាធារណរដ្ឋកំពុងគ្រប់គ្រងសភាតំណាងរាស្រ្ត និងព្រឹទ្ធសភា ក្រោយពីបានឈ្នះឆ្នោតពាក់កណ្តាលអាណ្ណត្តិកាលពីថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ