សហរដ្ឋអាមេរិកចង់បន្ថយចំនួនទាហាន ឱ្យស្មើសម័យមុនសង្គ្រាមលោក
ចុះផ្សាយនៅថ្ងៃ៖
ស្តាប់ - ០៧:២១
សហរដ្ឋអាមេរិកចង់បន្តនយោបាយកាត់បន្ថយថវិកាផ្នែកយោធា ! នេះជាការប្រកាសរបស់ក្រសួងការពារជាតិអាមេរិក នៅល្ងាចថ្ងៃចន្ទទី ២៤ កុម្ភៈ ដោយបានលើកគម្រោងថវិកា ទិសដៅឆ្នាំ២០១៥ មកបង្ហាញ។ ទិសដៅថ្មី ដែលមានន័យតែមួយគឺរិតត្បិតថវិកា។ កងទ័ពជើងទឹក ជើងអាកាស ចំនួនទាហាន ចំនួនយន្តហោះ ឧទ្ធម្ភាគចក្រ ចំនួននាវាចម្បាំង នាវាផ្ទុកយន្តហោះ ត្រូវកាត់បន្ថយទាំងអស់ លើកលែងតែកងកម្លាំងពិសេសមួយប៉ុណ្ណោះដែលត្រូវបង្កើនបរិមាណតិចតួច។ ក្រសួងការពារជាតិ គ្រោងនឹងបញ្ចុះចំនួនទ័ពថ្មើរជើង ឱ្យធ្លាក់មកទាបបំផុតមិនធ្លាប់មានគិតចាប់ពីឆ្នាំ១៩៤០មក។
ទ័ពជើងគោក
ការកាត់បន្ថយបរិមាណទ័ព ជាផលវិបាកនៃការត្បិតត្បៀតថវិកា ក៏ប៉ុន្តែនេះក៏អាចចាត់ទុកថាជាយុទ្ធសាស្ត្រថ្មី ជាទស្សនៈវិស័យថ្មីត្រៀមបើកសករាជក្រោយសង្គ្រាម ៖ សង្គ្រាមនៅអ៊ីរ៉ាក់ និងសង្គ្រាមនៅអាហ្វហ្កានីស្ថាន ដែលកងទ័ពអាមេរិកគ្រោងនឹងដកចេញទាំងអស់នៅចុងឆ្នាំ២០១៤នេះ។
បើតាមគម្រោង ចំនួនទ័ពអាមេរិកនឹងបញ្ចុះអស់ប្រមាណ ១សែននាក់ ពោលគឺពី ៥២០ ០០០ មកនៅត្រឹមតែ ៤៥០០០០នាក់។ នេះគឺជាលើកទីមួយហើយ ក្នុងប្រវត្តិយោធាអាមេរិក ដែលចំនួនទ័ពអាមេរិកមានតិចត្រឹមកំរិតនេះ បើគិតចាប់ពីឆ្នាំ១៩៤០មក។ តាមការពិតក្រោយសង្គ្រាមលោកភ្លាម ចំនួនទ័ពអាមេរិក បានធ្លាក់ចុះជាលំដាប់រហូតដល់ឆ្នាំ១៩៩៩ ហើយទើបស្ទុះឡើងខ្លាំងមកវិញ មុនមហាភេរវកម្មថ្ងៃទី១១កញ្ញាបន្តិច និងមុនសង្គ្រាមនៅអាហ្វហ្កានិស្ថាននិងអ៊ីរាក់។ នៅឆ្នាំ២០១០ ចំនួនទាហានអាមេរិកបានកើនឡើងដល់កំរិតកំពូល គឺជាង៥៦៦០០០នាក់។
កាត់បន្ថយលើគ្រប់ផ្នែក
ក្រៅពីផ្នែកទាហានថ្មើរជើង ទ័ពបំរុងដែលត្រូវការបំផុតនៅលើសមរភូមប្រយុទ្ធ ដូចយ៉ាងកាលសង្គ្រាមនៅអ៊ីរ៉ាក់ ឬអាហ្វហា្កនីស្ថាន ក៏ត្រូវកាត់បន្ថយជិតពាក់កណ្តាល។ កងទ័ពជើងឆើតនៃកងពលម៉ារីន ក៏រងផលប៉ះពាល់ នៃការកាត់បន្ថយដូចគ្នា។
ជាមួយនឹងផែនការកាត់បន្ថយកម្លាំង លោករដ្ឋមន្ត្រីក្រសួងការពារជាតិអាមេរិក ឆាក់ ហាហ្កែល ក៏បានកំណត់យុទ្ធសាស្ត្រថ្មី គឺថាមានកម្លាំងតិច តែខ្លាំង មានការបំពាក់បំប៉នត្រឹមត្រូវ មានសមត្ថភាពខ្ពស់ ធ្វើប្រតិបត្តិការប្រកបដោយប្រសិទ្ធភាព ការពារសុវត្ថិភាព-បូរណភាពជាតិ ពិភពលោក និងត្រៀមជាស្រេចចេញប្រយុទ្ធ តាមកាលៈទេសៈតម្រូវ។ សម្ភារៈបរិក្ខារ យន្តហោះ នាវាចាស់ៗ អាចនឹងត្រូវបញ្ជូនចូលឃ្លាំងទុក ដោយរក្សានិងធ្វើទំនើបកម្មសម្ភារៈបច្ចេកវិទ្យាថ្មី មានកម្លាំង មានប្រសិទ្ធិភាព លែងទាមទារឱ្យមានជោគជ័យពីរបីកន្លែងក្នុងពេលតែមួយ ដូចពេលមុនទៀតឡើយ។
យោធាជើងទឹក ចំនួននាវាផ្ទុកយន្តហោះត្រូវរក្សាទុកក្នុងបរិមាណដដែលមែន ប៉ុន្តែនាវាចម្បាំងធុនស្រាលនឹងត្រូវកំណត់ត្រឹម ៣២គ្រឿង (មិនមែន៥២ដូចគម្រោងចាស់)។ យន្តហោះស៊ើបអង្កេត នឹងត្រូវជំនួសដោយយន្តហោះគ្មានមនុស្សបើក Drone។
នេះបើនិយាយអំពីផ្នែកកម្លាំងទ័ព ! បើនិយាយអំពី ថវិកាសង្គមវិញ ប្រាក់បៀវត្សដែលធ្លាប់ដំឡើងបំប៉ោងតាំងពីឆ្នាំ២០០១មួយ ដូចជាមិនសូវមានកំណែទម្រង់អ្វីគួរឱ្យកត់សម្គាល់ទេ មានតែការប្រកាសដំឡើងប្រាក់បៀវត្ស ទាហាន ១% និងបញ្ចុះជំនួយសង្គម ផ្នែកផ្ទះសម្បែង។
ចំណាយយោធា កើនឡើងខ្លាំងនៅទូទាំងពិភពលោក
បើផ្អែកតាមតួលេខចុងក្រោយ គឺពិតណាស់ថាមានភាពក្រឡាប់ចាក់រវាងក្រុមមហាអំណាច។ ថវិកាផ្នែកយោធារបស់ក្រុមប្រទេសធំៗសំខាន់ៗនៃអង្គការអូតង់ ឬណាតូ នឹងបន្ថយថយចុះ នៅឆ្នាំខាងមុខ ប៉ុន្តែក្រុមប្រទេសភាគខាងត្បូង និងខាងកើត ប្រជុំគ្នាបង្កើនថវិកាផ្នែកយោធានេះ ទៅតាមកំណើនសេដ្ឋកិច្ចលូតលាស់របស់គេរៀងខ្លួនៗ។ ជាក់ស្តែងចិន បានបង្កើនថវិកាយោធាជិតទ្វេដងគិតដល់ឆ្នាំ២០១៥ ។ ដោយគ្មានបូកបញ្ចូលចិន តំបន់អាស៊ីប៉ាស៊ីហ្វិកមានទំហំថវិកាយោធាវ៉ាដាច់ក្រុមប្រទេសអឺរ៉ុបទៅហើយ នៅឆ្នាំ២០១៥។ រុស្ស៊ីបានក្លាយជាមហាអំណាចទីបីនៅលើពិភពលោក ដោយមានកញ្ចប់ថវិកាកើនឡើង ៤៤% ក្នុងរយៈពេលតែបីឆ្នាំ។ តាំងពីឆ្នាំ២០១៣ មករុស្ស៊ី អាស៊ី ដើមបូព៌ា បានក្លាយជាអូសទាញពិភពលោកក្នុងផ្នែកទីផ្សារយោធា។ សូម្បីតែប្រទេសអាល់ហ្សេរី ដែលកាលពីឆ្នាំ២០០៩ ស្ថិតនៅលំដាប់ឆ្ងាយសោះពេលនេះ បានចូលចំណោមប្រទេស២០ដំបូងផ្នែកកំណើនចំណាយយោធា។
ប៉ុន្តែសម្រាប់អាមេរិក បើទោះបីជាមានការរិតត្បិត កាត់បន្ថយទាហាន យ៉ាងណាក៏ដោយ ក៏អាមេរិក ស្ថិតលំដាប់ទីមួយ ឆ្ងាយដាច់ពីគេឯងយ៉ាងខ្លាំងណាស់ ដោយចំណាយប្រមាណ៥៨២ពាន់លានដុល្លារអាមេរិកនៅឆ្នាំ២០១៣ បើប្រៀបទៅនឹងចិន ក្នុងលំដាប់ទីពីរពិភពលោក ដែលមានត្រឹម ១៣៩ពាន់លានដុល្លារ។ កញ្ចប់ថវិកាយោធាអាមេរិក ដែលសភាបានព្រមព្រៀងអនុម័ត កាលពីខែធ្នូកន្លងទៅ គ្រោងនឹងបញ្ចុះ ឱ្យចំណាយយោធា ឱ្យមានលទ្ធភាពចាយវាយយ៉ាងច្រើន ត្រឹម ៤៩៦ពាន់លាន នៅឆ្នាំ២០១៥។ ដូច្នេះឃើញថាថវិកាអាមេរិកនៅច្រើនជាងគេដដែល បើទោះបីជាអាមេរិកកាត់បន្ថយថវិកាយ៉ាងណាក៏ដោយ។ បើតាមការប៉ាន់ប្រមាណរបស់អ្នកឯកទេស គេត្រូវការរង់ចាំពេលវេលាយូរទៀត យ៉ាងណាស់ (យ៉ាងឆាប់នៅឆ្នាំ២០២១) ទើបបណ្តាប្រទេសក្រៅបក្សសម្ព័ន្ធអូតង់ នៅទូទាំងពិភពលោក អាចវ៉ាក្រុមមហាអំណាចទាំង២៨របស់អូតង់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ