នគរបាលបានបាញ់សំលាប់យុវជនស្បែកខ្មៅម្នាក់ទៀត
យុវជនអាមេរិកស្បែកខ្មៅម្នាក់អាយុ ១២ ឆ្នាំ ត្រូវបាននគរបាលបាញ់សំលាប់ កាលពីថ្មីៗនេះ នៅទីក្រុងគ្លីវើលែន (Cleveland) រដ្ឋអូហៃយោ (Ohio)។ ហេតុការណ៍បាញ់ប្រហារនេះបានកើតឡើងកាលពីថ្ងៃសៅរ៍សប្តាហ៍មុន ប៉ុន្តែ ព័ត៌មាន និងរូបភាពវីដេអូទើបតែបែកធ្លាយ កាលពីម្សិលមិញ។ អំពើហឹង្សានេះកាន់តែបង្កើនកំហឹងថែមទៀត ខណៈដែលហ្វូងមហាជនកំពុងតវ៉ាទូទាំងសហរដ្ឋអាមេរិក ប្រឆាំងនឹងការសម្រេចរបស់ក្រុមប្រឹក្សាតុលាការក្រុង Ferguson មិនចោទប្រកាន់ប៉ូលីសស្បែកសបាញ់សម្លាប់យុវជនស្បែកខ្មៅ Michael Brown។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
នៅក្នុងរូបភាពវីដេអូរបស់កាមេរ៉ាសុវត្ថិភាព ដែលមានរយៈពេល ៨ នាទី យើងឃើញយុវជន Tamir Rice កាន់កាំភ្លើង ដែលគេគិតថាទំនងជាកាំភ្លើងជ័រ ភ្ជង់សំដៅទៅមនុស្សម្នាក់កំពុងដើរតាមផ្លូវ។ រួចហើយ យុវជននោះដើរចុះឡើងម្នាក់ឯងនៅក្នុងសួនច្បារ មុននឹងយកកាំភ្លើងជ័រដាក់ជាប់ចង្កេះ។ បន្តិចក្រោយមក បន្ទាប់ពីបានទទួលព័ត៌មានតាមទូរស័ព្ទ យើងឃើញរថយន្តនគរបាលមួយគ្រឿងបានមកដល់កន្លែងកើតហេតុ។
បើយោងតាមសំដីរបស់នាយនគរបាលប្រចាំក្រុងគ្លីវើលែន (Cleveland) បានអោយដឹងថា ភ្នាក់ងារនគរបាលទាំងពីរនាក់បានសើ្នសុំអោយយុវជន Tamir Rice លើកដៃឡើងលើ ប៉ុន្តែ យុវជននោះពុំព្រមស្តាប់ ហើយហាក់ដូចជាយកដៃរាវរកវត្ថុអ្វីមួយនៅជាប់ចង្កេះ ដែលនេះជាហេតុធ្វើអោយនគរបាលបាញ់ទៅលើយុវជននោះតែម្តង។ លោក Edward Toma នាយរងនគរបាលប្រចាំក្រុងគ្លីវើលែន (Cleveland) បានបញ្ជាក់ថា ភ្នាក់ងារនគរបាលដែលបានបើកការបាញ់ប្រហារនោះឈ្មោះ Timothy Loehman អាយុ ២៦ ឆ្នាំ ជាភ្នាក់ងារពុំទាន់មានបទពិសោធន៍គ្រប់គ្រាន់ ដោយទើបតែចូលបំរើការងារបានត្រឹម ៨ ខែប៉ុណ្ណោះ។ ចំណែក ភ្នាក់ងារនគរបាលម្នាក់ទៀត ដែលជាអ្នកបើកបររថយន្តឈ្មោះ Frank Garmback អាយុ ៤៦ ឆ្នាំ ចូលបំរើការតាំងពីឆ្នាំ ២០០៨ មកម៉្លេះ។
ឆ្លើយតបសំនួររបស់អ្នកកាសែត នគរបាលក្រុង គ្លីវើលែន (Cleveland) បានអះអាងថា ពេលចុះធ្វើអន្តរាគមន៍ភ្លាមៗបែបនេះ ភ្នាក់ងារនគរបាលទាំងពីរពុំអាចមើលដឹងថា យុវជន Tamir Rice កាន់កាំភ្លើងជ័រ ឬកាំភ្លើងពឹតនោះទេ។ បន្ទាប់ពីហេតុការណ៍នេះ ភ្នាក់ងារនគរបាលទាំងពីររូបត្រូវបានគេសាកសួរ និងត្រូវបានព្យួរពីការងាររយៈពេលបណ្តោះអាសន្ន ដោយរង់ចាំការស៊ើបអង្កេតចប់សព្វគ្រប់។ រូបភាពវីដេអូដែលបានផ្សព្វផ្សាយជាសាធារណៈនេះត្រូវបានធ្វើឡើង ក្រោយពីមានការស្នើសុំពីសំណាក់គ្រួសារជនរងគ្រោះ។
ការស្លាប់របស់យុវជនស្បែកខ្មៅ Tamir Rice ដោយនគរបាលស្បែកស បានកើតឡើង ខណៈពេលដែលទីក្រុង Ferguson ក្នុងរដ្ឋ Missouri កំពុងរំជើបរំជួលដោយការតវ៉ាពីសំណាក់ហ្វូងបាតុករ ដែលខឹងសម្បារនឹងការសម្រេចចិត្តរបស់ក្រុមប្រឹក្សាតុលាការ។ ក្រុមប្រឹក្សាតុលាការបានសំរេចមិនផ្តឹងផ្តល់ភ្នាក់ងារនគរបាលស្បែកស ដែលបានសំលាប់យុវជនស្បែកខ្មៅ Michael Brown កាលពីខែសីហាកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ