តុលាការអាមេរិកចោទប្រកាន់ប៉ូលិសស្រីស្បែកស ក្នុងករណីបាញ់សម្លាប់បុរសស្បែកខ្មៅនៅរដ្ឋOklahoma
ថ្ងៃព្រហស្បតិ៍ម្សិលមិញ តុលាការអាមេរិកបានធ្វើការចោទប្រកាន់ និងចេញដីកាចាប់ខ្លួនប៉ូលិសស្រីស្បែកស ដែលបានបាញ់សម្លាប់បុរសស្បែកខ្មៅម្នាក់ នៅរដ្ឋOklahoma កាលពីថ្ងៃចន្ទដើមសប្តាហ៍។ យោងតាមរបាយការណ៍ដាក់ទៅតុលាការ ក្នុងពេលកើតហេតុ ប៉ូលិសស្រីរូបនេះ បានបញ្ចេញប្រតិកម្មហួសហេតុ ហួសពីស្ថានការណ៍ជាក់ស្តែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
ប៉ូលិសស្រីស្បែកស ដែលរងការចោទប្រកាន់ពីតុលាការ មានឈ្មោះថា បេតធី ស្ហ៊ែលប៊ី។ កាលពីថ្ងៃចន្ទ ប៉ូលិសស្រីរូបនេះបានបាញ់សម្លាប់បុរសស្បែកខ្មៅម្នាក់ ឈ្មោះធែររិនសឺ ក្រាត់ឆឺ អាយុ៤០ឆ្នាំ នៅរដ្ឋOklahoma ភាគកណ្តាលសហរដ្ឋអាមេរិក។ បើប៉ូលិសស្រីត្រូវបានគេរកឃើញថា មានទោសមែន គាត់អាចជាប់ពន្ធនាគារយ៉ាងហោច៤ឆ្នាំ។
ថ្ងៃចន្ទថ្ងៃកើតហេតុ ដើមសប្តាហ៍នេះ រថយន្តរបស់បុរសស្បែកខ្មៅឈ្មោះធែររិនសឺនោះ បានខូចនៅលើផ្លូវមួយកន្លែង នៅក្រុងToulsa។ រូបភាពវីដេអូថតចេញពីឧទ្ធម្ភាគចក្រ បង្ហាញថា បុរសស្បែកខ្មៅបានលើកដៃទៅលើ មួយស្របក់។ ប៉ូលិសស្រីបេតធី ទំនងជាបាញ់គាត់ ពេលដែលដៃគាត់ខិតទៅក្បែរបង្អួចរថយន្ត។
យោងតាមរបាយការណ៍ដាក់ទៅតុលាការ ស្ត្រីប៉ូលិសរូបនេះ បានបញ្ចេញប្រតិកម្មដោយប្រើអារមុ្មណ៍ខ្លួនច្រើន ហួសពីស្ថានភាពជាក់ស្តែង ធ្វើអោយស្ថានភាពកាន់តែធ្ងន់ធ្ងរ។ ប៉ូលិសស្រីបេតធីប្រាប់ក្រុមស៊ើ់បអង្កេតថា គាត់បារម្ភពីអាយុជីវិតគាត់ ហើយខ្លាចបុរសស្បែកខ្មៅនោះសម្លាប់គាត់។
វីដេអូហេតុការណ៍បាញ់សម្លាប់បុរសស្បែកខ្មៅនៅរដ្ឋ Oklahoma ត្រូវបានគេផ្សព្វផ្សាយជំរុញអោយមានការជជែកឡើងវិញ អំពីហិង្សាប៉ូលិសអាមេរិក ចំពោះជនជាតិស្បែកខ្មៅ។ កាលពីថ្ងៃអង្គារ ក៏មានករណីប៉ូលិសសម្លាប់ជនជាតិស្បែកខ្មៅ នៅក្រុងCharlotte រដ្ឋការ៉ូលីនខាងជើងដែរ។ ប៉ូលិសម្នាក់បានបាញ់បុរសស្បែកខ្មៅម្នាក់ អាយុ៤៣ឆ្នាំ ធ្វើអោយផ្ទុះបាតុកម្មតវ៉ា រាលដាលជាហិង្សាឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ