កិច្ចសន្យាពាណិជ្ជកម្មចំនួន ២៧ ក្នុងទឹកប្រាក់ ១៥.០០០លានដុល្លារ
នេះជាលទ្ធផលនៃទស្សនកិច្ចរបស់លោកឧបនាយករដ្ឋមន្ត្រីចិន Li Keqiang រយៈពេល ៥ថ្ងៃនៅរុស្ស៊ី ដែលឈានដល់ទីបញ្ចប់ នៅថ្ងៃចន្ទ ទី៣០ មេសានេះ។ ក្នុងក្របខ័ណ្ឌទស្សនកិច្ចនេះ ដោយរួមជាមួយសមភាគីរុស្ស៊ី លោក Igor Shuvalov គាត់បានសម្ពោធ “វេទិកាចិន-រុស្ស៊ីខាងបញ្ហាវិនិយោគ និងពាណិជ្ជកម្ម”។ គាត់ក៏បានជួបជាមួយថ្នាក់ដឹកនាំកំពូលរុស្ស៊ីទាំង៤នាក់។
ចុះផ្សាយនៅថ្ងៃ៖
ស្តាប់ - ០២:៤១
ក្នុងពិធីសម្ពោធវេទិកានោះ ដែលចូលរួមដោយពួកអ្នកតំណាងមជ្ឈដ្ឋាន Business ចិន និងរុស្ស៊ីចំនួន ១.២០០នាក់ លោកឧបនាយករដ្ឋមន្ត្រីចិន Li Keqiang បានថ្លែងសុន្ទរកថា ក្រោមចំណងជើងថា “ លើកសហប្រតិបត្តិការចិន-រុស្ស៊ី ខាងវិនិយោគ និងពាណិជ្ជកម្មឲ្យឡើងដល់កំពស់ថ្មី” ទាំងសង្កត់ធ្ងន់ថា ទំនាក់ទំនងចិន-រុស្ស៊ីនាប៉ុន្មានឆ្នាំចុងក្រោយ រីកផុសផុលសម្បើមដល់កម្រិតដែលមិនធ្លាប់មាន ហើយវាចាក់ឫសកាន់តែជ្រៅទៅៗលើគ្រប់វិស័យនៃភាពជាដៃគូយុទ្ធសាស្ត្រ។ តាមប្រសាសន៍លោក Li Keqiang រុស្ស៊ី និងចិនគ្រោងបង្កើនដូចគ្នា ទំហំផ្តោះប្តូរពាណិជ្ជកម្មទ្វេភាគីដែលក្នុងឆ្នាំមុន មានទឹកប្រាក់ ៨៣.០០០លានដុល្លារ ឲ្យទៅទល់ឆ្នាំ២០១៥ ឡើងដល់ ១០០.០០០លានដុល្លារ ហើយទៅទល់ឆ្នាំ២០២០ ឲ្យស្ទុះដល់២០០.០០០លានដុល្លារតែម្តង។
អំពីកិច្ចសន្យាពាណិជ្ជកម្មដែលមានចុះចំនួន ២៧ច្បាប់ ក្នុងទឹកប្រាក់សរុប១៥.០០០លានដុល្លារ លោកឧបនាយករដ្ឋមន្ត្រីចិនបង្ហើបឲ្យដឹងថា វាប៉ះជាអាទិ៍លើវិស័យថាមពល វិស័យផលិតគ្រឿងចក្រ ផលិតគ្រឿងអេឡេចត្រូនិក។ល។ លោកឧបនាយករដ្ឋមន្ត្រីរុស្ស៊ីទី១ Igor Shuvalov ពីចំណែកខ្លួនគូសបញ្ជាក់ថា ចិនជាប់ចំណាត់ថ្នាក់ទី១ ក្នុងចំណោមដៃគូពាណិជ្ជកម្មបរទេសរបស់រុស្ស៊ី ដោយធ្លាក់ទៅលើចំណែកចិន គឺដល់ទៅជាង១០% នៃទំហំផ្តោះប្តូរពាណិជ្ជកម្មក្រៅប្រទេសរបស់រុស្ស៊ី។ អំពីសាច់រឿងវេទិកាដែលប្រព្រឹត្តទៅ គាត់លើកឡើងថា ឧទាហរណ៍ជាក់ស្តែងនៃសហប្រតិបត្តិការប្រកបដោយប្រសិទ្ធិភាពលើវិស័យវិនិយោគរវាងប្រទេសទាំងពីរ គឺការបង្កើតឡើងជា “មូលនិធិវិនិយោគចិន-រុស្ស៊ី”៖ ដែលពីខាងរុស្ស៊ី ចូលរួម គឺ “មូលនិធិរុស្ស៊ីខាងវិនិយោគត្រង់ផ្ទាល់” ហើយពីខាងចិន គឺសាជីវកម្មចិនខាងវិនិយោគ” China Investment Corporation “ ហៅកាត់ថា CIC។ បច្ចុប្បន្ន មូលនិធិរួមនេះ មានទឹកប្រាក់ ៤.០០០លានដុល្លារ។ គោលដៅ គឺសម្រាប់ជំរុញដល់ការបញ្ចូលវិនិយោគទៅក្នុងគម្រោងរួមនៃសហប្រតិបត្តិការចិន-រុស្ស៊ី។
ក្នុងក្របខ័ណ្ឌទស្សនកិច្ចនៅរុស្ស៊ី ពីថ្ងៃទី២៦ដល់ទី៣០ មេសា លោកឧបនាយករដ្ឋមន្ត្រីចិន Li Keqiang ត្រូវបានទទួលជួបដោយលោកមេដវេដេវ ប្រធានាធិបតីជិតផុតអាណត្តិ។ បន្ទាប់មក គាត់បានជួបចរចា ជាមួយលោកនាយករដ្ឋមន្ត្រីពូទីន ដែល១សប្តាហ៍ទៀតនឹងឡើងកាន់តំណែង ជាប្រធានាធិបតីថ្មី ព្រមទាំងបានជួបប្រស្រ័យជាមួយលោកប្រធានសភាឌូម៉ា និងលោកស្រីប្រធានព្រឹទ្ធសភារុស្ស៊ី។ ក្នុងជំនួបទាំងនេះ តែងគូសបញ្ជាក់ ដោយមិនរំលងឡើយ ពីភាពជាដៃគូយុទ្ធសាស្ត្ររវាងមហាប្រទេសចិន និងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ