រដ្ឋាភិបាលលោកអូបាម៉ាបដិសេធរឿងបង់លុយ៤០០លានដុល្លារទៅអ៊ីរ៉ង់ជាថ្នូរនឹងការដោះលែងពលរដ្ឋអាមេរិក
រដ្ឋាភិបាលរបស់លោកអូបាម៉ាបានច្រានចោលការចោទប្រកាន់ដែលថា អាមេរិកបានបង់លុយចំនួន ៤០០លានដុល្លារទៅឲ្យអ៊ីរ៉ង់ ជាថ្នូរនឹងការដោះលែងពលរដ្ឋអាមេរិក ៥នាក់ កាលពីខែមករាកន្លងទៅ។ មន្រ្តីសេតវិមានបានទទួលស្គាល់ថា ពិតជាបានបញ្ជូនលុយ ៤០០លានដុល្លារទៅឲ្យអ៊ីរ៉ង់ពិតមែន ក៏ប៉ុន្តែ វាមិនមែនជាលុយថ្នូរនឹងការដោះលែងពលរដ្ឋអាមេរិកនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ភាពចម្រូងចម្រាសជុំវិញរឿងលោកអូបាម៉ាបង់លុយឲ្យអ៊ីរ៉ង់ជាថ្នូរនឹងការដោះលែងពលរដ្ឋអាមេរិក បានផ្ទុះឡើងសាជាថ្មី ក្រោយពីមានការចុះផ្សាយរបស់កាសែត The Wall Street Journal កាលពីថ្ងៃអង្គារ ដោយបានលើកឡើង អំពីការបញ្ជូនលុយចំនួន ៤០០លានដុល្លារអាមេរិក ជាក្រដាសប្រាក់អឺរ៉ូ និងហ្វ្រង់ស្វ៊ីស ដឹកតាមយន្តហោះដោយសម្ងាត់ទៅឲ្យអ៊ីរ៉ង់ ភ្លាមៗ ក្រោយពីពលរដ្ឋអាមេរិក ៤នាក់ ត្រូវបានអ៊ីរ៉ង់ដោះលែងឲ្យមានសេរីភាពវិញ។
ភ្លាមៗក្រោយការចុះផ្សាយនេះ អ្នកនយោបាយសំខាន់ៗនៅក្នុងគណបក្សសាធារណរដ្ឋក៏បាននាំគ្នាធ្វើការវាយប្រហារលើលោកអូបាម៉ាថា បានផ្តល់លុយទៅឲ្យអ៊ីរ៉ង់ ជារង្វាន់ចំពោះការចាប់ឃុំពលរដ្ឋអាមេរិកដោយខុសច្បាប់ និងជាការធ្វើខុសពីគោលការណ៍ដែលអាមេរិកប្រកាន់យកតាំងពីដើមរៀងមក គឺមិនបង់លុយជាថ្នូរនឹងការដោះលែងចំណាប់ខ្មាំង។
បេក្ខជនប្រធានាធិបតីមកពីគណបក្សសាធារណរដ្ឋ គឺលោកដូណាល់ ត្រាំ បានឆ្លៀតយករឿងនេះមកធ្វើការវាយប្រហារទៅលើលោកស្រី ហ៊ីឡារី គ្លីនតុន ដែលជាគូប្រជែង ដោយបានលើកឡើងថា លោកស្រី គឺជាអតីតរដ្ឋមន្រ្តីក្រសួងការបរទេសក្នុងរដ្ឋាភិបាលរបស់លោកអូបាម៉ា ហើយជាអ្នកដែលបានចូលរួមក្នុងការចរចាជាមួយអ៊ីរ៉ង់។
ប្រឈមមុខនឹងការចោទប្រកាន់អស់ទាំងនេះ មន្រ្តីអ្នកនាំពាក្យសេតវិមានបានចេញមុខពន្យល់ថា អាមេរិកពិតជាបានបញ្ជូនលុយចំនួន ៤០០លានដុល្លារទៅឲ្យអ៊ីរ៉ង់ពិតមែន ក៏ប៉ុន្តែ លុយនេះមិនមែនជាថ្នូរនឹងការដោះលែងពលរដ្ឋអាមេរិកនោះទេ តែជាលុយសងបំណុលដែលអាមេរិកជំពាក់អ៊ីរ៉ង់ តាំងពីមុនបដិវត្តន៍ឆ្នាំ១៩៧៩។
យោងតាមការពន្យល់របស់សេតវិមាន លុយ ៤០០លានដុល្លារនេះជាលុយដែលអ៊ីរ៉ង់ប្រគល់មកឲ្យអាមេរិក នៅក្នុងកិច្ចសន្យាទិញបរិក្ខាយោធា នៅក្នុងអំឡុងទសវត្សរ៍ឆ្នាំ៧០ នៅពេលដែលអ៊ីរ៉ង់ និងអាមេរិក នៅជាសម្ព័ន្ធមិត្តនឹងគ្នា។ ក៏ប៉ុន្តែ ក្រោយមក អាមេរិកនិងអ៊ីរ៉ង់ក៏មានក្តីក្តាំនឹងគ្នា រហូតទៅដល់តុលាការក្រុងឡាអេ ហើយតុលាការបានសម្រេចឲ្យអាមេរិកសងលុយ ៤០០លានដុល្លារនេះទៅអ៊ីរ៉ង់វិញ។ ក៏ប៉ុន្តែ ដោយសារតែមានជម្លោះក្នុងសំណុំរឿងនុយក្លេអ៊ែរ អាមេរិកបានផ្អិបលុយនេះទុក រហូតដល់ក្រោយពីមានកិច្ចព្រមព្រៀងនុយក្លេអ៊ែរ ទើបអាមេរិកសុខចិត្តសងលុយនេះទៅអ៊ីរ៉ង់វិញ។ ដូច្នេះ យោងតាមការអះអាងរបស់មន្រ្តីអ្នកនាំពាក្យសេតវិមាន ថ្វីដ្បិតតែការបញ្ជូនលុយនេះទៅឲ្យអ៊ីរ៉ង់ត្រូវបានធ្វើឡើងមិនយូរប៉ុន្មាន ក្រោយពីអ៊ីរ៉ង់ដោះលែងពលរដ្ឋអាមេរិក តែវាមិនមែនជាលុយថ្នូរនឹងការដោះលែងនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ