កិច្ចប្រជុំទីក្រុងឡុងដ៍ រកដំណោះស្រាយប្រឆាំងការជួញដូរផលិតផលសត្វព្រៃ
នៅថ្ងៃព្រហស្បតិ៍នេះ ប្រទេសជាង៤០ បានជួបជុំគ្នានៅទីក្រុងឡុងដ៍ ប្រទេសអង់គ្លេស ដើម្បីពិភាក្សាពីអាជីវកម្មលើផលិតផលសត្វព្រៃខុសច្បាប់ ដែលកំពុងរាលដាលនៅអាហ្វ្រិក និងអាស៊ី ធ្វើអោយពូជសត្វព្រៃជាច្រើនរងការគំរាមកំហែងបាត់បង់។ ក្រោមការផ្តួចផ្តើមពីរដ្ឋាភិបាលអង់គ្លេស និងព្រះអង្គម្ចាស់ Charles សាល និងWilliam វីល្លីយ៉ាំ កិច្ចប្រជុំនេះគ្រោងនឹងមិនអត់អោនដាច់ខាតដល់អ្នកបរបាញ់ និងអ្នកជួញដូរភ្លុកដំរី រឺក៏ស្នែងរមាស ដើម្បីបំបាត់អោយបាននូវការជួញដូរផលិតផលសត្វព្រៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ក្រោមការចូលរួមរបស់មេដឹកនាំ រដ្ឋមន្ត្រី មកពីប្រទេសជាង៤០ និងអង្គការអន្តរជាតិ ជាច្រើនទៀត កិច្ចប្រជុំនៅទីក្រុងឡុងដ៍ ស្តីពីបញ្ហាជួញដូរផលិតផលសត្វព្រៃ ថ្ងៃព្រហស្បតិ៍នេះ ផ្តោតការពិភាក្សាសំខាន់លើប្រភេទសត្វចំនួន៣ គឺដំរីអាហ្វ្រិក រមាស និងខ្លា។ កិច្ចប្រជុំនេះ ចង់រកអោយបាននូវដំណោះស្រាយ ដើម្បីបំបាត់អាជីវកម្មជួញដូរផលិតផលសត្វព្រៃដែលកំពុងរាលដាលក្នុងពេលបច្ចុប្បន្ននេះ។
គិត១០ឆ្នាំមកនេះ ការបរបាញ់សត្វព្រៃខុសច្បាប់ ដើម្បីចម្រាញ់យកផលិតផលមកធ្វើអាជីវកម្មនោះ បានធ្វើអោយពូជសត្វព្រៃជាច្រើននៅអាហ្វ្រិក និងអាស៊ី រងការគំរាមកំហែងបាត់បង់ពីពិភពលោកយើងនេះ។ ក្នុង១០ឆ្នាំមកនេះ ដំរី៦២ភាគរយនៅអាហ្វ្រិក ត្រូវបានសម្លាប់។ រមាសជាង១០០០ នៅអាហ្វ្រិកខាងត្បូង ត្រូវគេបរបាញ់ ក្នុងឆ្នាំ២០១៣កន្លងទៅ តួលេខខុសឆ្ងាយសម្បើមពីឆ្នាំ២០០៧ ដែលកាលណោះ មានតែរមាសចំនួន១៣ប៉ុណ្ណោះ នៅអាហ្វ្រិកខាងត្បូអ ដែលត្រូវបានគេបរបាញ់។ នៅអាស៊ីវិញ ចំនួនសត្វខ្លាបានថយចុះពីមួយសែន មកនៅត្រឹម៣ពាន់២រយក្បាលប៉ុណ្ណោះ គិតត្រឹមរយៈពេលមួយរយឆ្នាំមកនេះ។ យោងតាមអ្នកវិភាគនានា អាជីវកម្មជួញដូរសត្វព្រៃខុសច្បាប់នេះ គិតជាទឹកប្រាក់មានរហូតដល់ទៅ៨ពាន់លានដុល្លារ ទៅ១០ពាន់លានដុល្លារ ឯណោះ ក្នុងមួយឆ្នាំៗ។ ស្នែងរមាសមួយគីឡូ ថ្លៃ៤សែនអឺរ៉ូ មានតម្លៃខ្ពស់ជាងមាសទៅទៀត។
អង់គ្លេសជាម្ចាស់ផ្ទះរៀបចំកិច្ចប្រជុំនៅថ្ងៃព្រហស្បតិ៍នេះ មិនចង់បណ្តែតបណ្តោយពេលវេលា អោយជនខិលខូចបន្តអាជីវកម្ម កំចាត់ពូជសត្វព្រៃ តទៅទៀតឡើយ។ រដ្ឋមន្ត្រីការបរទេសអង់គ្លេស លោក វីល្លីយ៉ាំ ហ៊េក បានលើកឡើងថា បញ្ហានេះ មិនត្រឹមប៉ះពាល់បរិដ្ឋានតែមួយមុខនោះទេ វាបានក្លាយជាឧស្សាហកម្មបង្កអំពើឧក្រិដ្ឋ ប្រៀបបាននឹងការជួញដូរគ្រឿងញៀន ការជួញដូរអាវុធ រឺការជួញដូរមនុស្សដូច្នោះដែរ។
អង់គ្លេសជាម្ចាស់ផ្ទះរៀបចំកិច្ចប្រជុំនេះ ចង់បានកិច្ចព្រមព្រៀងមួយ បញ្ចូលវត្តមានបណ្តាប្រទេសអាហ្វ្រិកជាជម្រកសត្វព្រៃ និងប្រទេសអាស៊ីបែបយ៉ាងចិន និងវៀតណាម ដែលទទួលយកផលិតផលសត្វព្រៃនោះ។ អង់គ្លេសជំរុញអោយគ្រប់ប្រទេសទាំងអស់ ចៀសវាងអំពើពុករលួយ និងមិនអោយមានការអត់ឱនដាច់ខាតដល់ក្រុមអ្នកបរបាញ់ខុសច្បាប់ ដោយបញ្ជូនពួកគេទាំងនោះទៅកាត់ទោសតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ