មូលនិធិពិភពលោកដើម្បីធម្មជាតិរិះគន់របាយការណ៍បរិស្ថាននៃទំនប់វារីអគ្គិសនី ដនសាហុង
មូលនិធិពិភពលោកដើម្បីធម្មជាតិ ឬអង្គការ WWF វាយប្រហាររបាយការណ៍វាយតម្លៃផលប៉ះពាល់បរិស្ថាននៃគម្រោងទំនប់វារីអគ្គិសនី ដនសាហុង របស់ឡាវ ថាមិនល្អិតល្អន់។ អង្គការនេះយល់ឃើញថាការស្ថាបនាទំនប់វារីអគ្គិសនីដនសាហុង នៅទន្លេហ៊ូសាហុងនឹងបិទផ្លូវត្រីមិនឱ្យចុះតាមខ្សែទឹកទន្លេមេគង្គ ថ្វីបើរបាយការណ៍នោះបាននិយាយអំពីការបង្វែរចរាចរណ៍ត្រីតាមផ្លូវទឹកផ្សេងទៀតក្តី។ WWF បារម្ភអំពីបរិមាណត្រីសម្រាប់ប្រជាជន៦០លាននាក់ ដែលរស់ក្នុងតំបន់នៃអាងទន្លេមេគង្គខាងក្រោម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
គម្រោងទំនប់វារីអគ្គិសនី ដន សាហុង មានទីតាំងស្ថិតនៅចម្ងាយត្រឹមតែ ១ គីឡូម៉ែត្រប៉ុណ្ណោះ ពីព្រំប្រទល់កម្ពុជា-ឡាវ។ ប្រសិនបើសាងសង់ ទំនប់នេះ វានឹងបិទទន្លេហ៊ូសាហុង ដែល WWF អះអាងថាជាច្រក«តែមួយគត់»សម្រាប់ចរាចរណ៍ត្រីពេញមួយឆ្នាំ។ មូលនិធិពិភពលោកដើម្បីធម្មជាតិបារម្ភថា នេះជា«កត្តាបង្កឲ្យមានការខូចខាតជាអចិន្ត្រៃយ៍ដល់ធនធានជលផលដ៏សម្បូរនៅក្នុងអាងទន្លេមេគង្គ ដែលមានតម្លៃចន្លោះពី១ពាន់ ៤រយលានដុល្លារ ដល់៣ពាន់៩រយលានដុល្លារក្នុងមួយឆ្នាំ»។
តាមពិត នៅជុំវិញកន្លែងសង់ទំនប់វារីអគ្គិសនីនោះ មានផ្លូវទឹកជាច្រើនទៀតក្រៅពីទន្លេងហ៊ូសាហុង។ ក្រុមអ្នកស្រាវជ្រាវវាយតម្លៃផលប៉ះពាល់បរិស្ថាននៃគម្រោងទំនប់វារីអគ្គិសនី ដនសាហុង បានស្នើឱ្យបង្វែរផ្លូវសម្រាប់ត្រីឆ្លងកាត់ទៅផ្លូវទឹកផ្សេងៗទៀត ដែល«អាចរក្សាបាននូវអត្រា៩៥%»នៃចរាចរណ៍ត្រីតាមលក្ខខណ្ឌកំណត់របស់គណៈកម្មាធិការទន្លេមេគង្គ។
ប៉ុន្តែ របាយការណ៍វិភាគរបស់អង្គការ WWF ដែលធើ្វឡើងដោយអ្នកជំនាញផ្នែកផ្លូវចរាចរត្រី រកឃើញបញ្ហាមួយចំនួន នៅក្នុងរបាយការណ៍វាយតម្លៃហេតុប៉ះពាល់បរិស្ថាននោះ។ បញ្ហាទាំងនោះមានដូចជា វិធីសាស្ត្រស្រាវជ្រាវមិនសមស្រប កង្វះភ័ស្តុតាង ភ័ស្តុតាងដែលផ្តល់ឱ្យមានលក្ខណៈមិនច្បាស់លាស់ ហើយការផ្តល់អនុសាសន៍ពាក់ព័ន្ធនឹងការកាត់បន្ថយហេតុប៉ះពាល់នោះ គ្មានអំណះអំណាងបញ្ជាក់អំពីប្រសិទ្ធភាពជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ