សំណុំរឿងអតីតប្រមុខដឹកនាំប៉ាឡេស្ទីន ស្លាប់ដោយថ្នាំបំពុល ផ្ទុះឡើងជាថ្មី
សម្មតិកម្មដែលថា អតីតប្រធានរដ្ឋអំណាចប៉ាឡេស្ទីនស្លាប់ដោយគេបំពុល បានផ្ទុះឡើងជាថ្មី។ ១០ឆ្នាំក្រោយ ពោលគឺនៅពេលនេះ មន្ទីរពិសោធន៍ស្វីស ចេញផ្សាយរបាយការណ៍មួយចុះផ្សាយក្នុងទំព័រវិបសៃត៍ទូរទស្សន៍កាតារ al-Jazira ថា លោក យ៉ាស៊ែរ អារ៉ាហ្វាត (Yasser Arafat) ទំនងជាបានស្លាប់ដោយថ្នាំពុល ប៉ូឡូនីញ៉ូម-២១០។ គឺដូចអ្វីដែលលោកស្រីអារ៉ាហ្វាតជាភរិយា ធ្លាប់បានអះអាងតាំងពីដំបូង។ ប៉ុន្តែនៅមានចំណុចអាថ៌កំបាំងមួយចំនួនធំទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
មានតែទូរទស្សន៍ជាតិកាតារមួយប៉ុណ្ណោះដែលបានបំផុស សេចក្តីសន្និដ្ឋានចុងក្រោយទាក់ទងនឹងមូលហេតុនៃមរណភាពរបស់លោក យ៉ាស៊ែរ អារ៉ាហ្វាត ព្រោះបានទទួលការពឹងពាក់ពីលោកស្រីអារ៉ាហ្វាតជាភរិយា។ ការវិភាគ បានរកឃើញបរិមាណដ៏ច្រើនសន្ធឹកសន្ធាប់នៃសារធាតុប៉ូឡូនីញ៉ូម-២១០ ដែលជាសារធាតុវិទ្យុសកម្មពុលបំផុត ដល់ទៅ១៨ដងលើកំរិតអនុញ្ញាត។ បើតាមទូរទស្សន៍នេះដដែល របាយការណ៍របស់វិទ្យាស្ថានពិសោធន៍រូបវិទ្យាស្វីស ជាលទ្ធផលនៃការវិភាគសម្លៀកបំពាក់ អេសង់ទីយ៉ុង យកចេញពីផ្នូរ កាលពីឆ្នាំ២០១២។
សម្រាប់ពេលនេះ អាជ្ញាធរប៉ាឡេស្ទីន មិនបានផ្សព្វផ្សាយព័ត៌មានបញ្ជាក់បន្ថែមពីលើព័ត៌មានរបស់កាតារនេះទេ។ ចំណែកឯក្រុមអ្នកស្រាវជ្រាវវិទ្យាសាស្ត្រពីរក្រុមទៀត (ក្រុមរុស្ស៊ី និងបារាំង) ដែលបានទៅយកចំណែកអេសង់ទីយ៉ុង ពីសពលោក អារ៉ាហ្វាតកាលពីឆ្នាំ២០១២ ដែរ មិនទាន់បានផ្តល់សេចក្តីសន្និដ្ឋាននៅឡើយ។ យើងនៅចងចាំបានថា គឺនៅប្រទេសបារាំង ដែលភរិយាលោកអារ៉ាហ្វាត បានដាក់ពាក្យបណ្តឹង នៅឆ្នាំ២០១២ ពីបទឃាតកម្មសម្លាប់អតីតប្រមុខដឹកនាំប៉ាឡេស្ទីន។ ក្រុមគ្រួសារលោក អារ៉ាហ្វាត តែងចោទប្រកាន់ជានិច្ចថា អ៊ីស្រាអែល ជាអ្នកដាក់ថ្នាំបំពុលសម្លាប់អតីតប្រធានរដ្ឋអំណាចប៉ាឡេស្ទីនដែលកំពុងសម្រាកព្យាបាលជំងឺ ក្នុងប្រទេសបារាំង ឆ្នាំ២០០៤។ ការចោទប្រកាន់ដែលអ៊ីស្រាអែលបដិសេធទាត់ចោលជានិច្ច។
ប៉ូឡូនីញ៉ូម ជា សារធាតុពុលបំផុត ! ក្នុងបរិមាណដ៏តិចតួចបំផុតក៏អាចសម្លាប់ជីវិតមនុស្សបានដែរ។ នៅពេលសារធាតុនេះជ្រាបចូលទៅក្នុងខ្លួនភ្លាម វានឹងធ្វើតាមឈាម ហើយបញ្ចេញរស្មីវិទ្យុសកម្មលើសរីរាង្គមានជីវិត មួយម្តងៗ ឱ្យបញ្ឈប់សកម្មភាព។ ប្រព័ន្ធការពារខ្លួននឹងត្រូវបំផ្លាញខ្ទេច។ មនុស្សនឹងអាចស្លាប់ភ្លាមក្នុងរវាងពីរបីថ្ងៃ។ ប៉ុន្តែការប្រើថ្នាំបំពុលរបៀបនេះ មានលក្ខណៈស្មុគស្មាញ។ ថ្លៃ និងត្រូវការមន្ទីរពិសោធន៍នុយក្លេអ៊ែរទំនើប និងបុគ្គលមានបទពិសោធន៍ខ្លាំង ទើបហ៊ានប្រើសារធាតុពុលនេះដោយមិនសម្លាប់ខ្លួនឯងបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ