នាយករដ្ឋមន្ត្រីសុំឲ្យធ្វើអធិការកិច្ចសំណុំរឿងថោងសារ៉ាត់
លោកនាយករដ្ឋមន្ត្រី ហ៊ុន សែន បានបញ្ចេញប្រតិកម្មខ្លាំងៗនៅថ្ងៃអង្គារនេះចំពោះចៅក្រមតុលាការដែលបានដោះលែងឳពុកម្តាយឧកញ៉ា ថោង សារ៉ាត់ឲ្យនៅក្រៅឃុំកាលពីថ្ងៃទី ៧ កុម្ភៈប៉ុន្តែ ត្រូវបានសមត្ថកិច្ចចាប់ខ្លួនមកវិញ។ ប្រមុខរដ្ឋាភិបាលបានហៅការសម្រេចចិត្តឲ្យនៅក្រៅឃុំដោយមូលហេតុសុខភាពថាជារឿងអយុត្តិធម៌ចំពោះពលរដ្ឋផ្សេងទៀត និងបានសុំឲ្យឧត្តមក្រុមប្រឹក្សានៃអង្គចៅក្រមធ្វើអធិការកិច្ចចំពោះសំណុំរឿងនេះជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោកនាយករដ្ឋមន្ត្រី ហ៊ុន សែន បានដំឡើងសំឡេងខ្លាំងៗដាក់មន្ត្រីតុលាការជាថ្មីម្តងទៀតចំពោះការសម្រេចឲ្យដោះលែងឪពុកម្តាយឧកញ៉ា ថោង សារ៉ាត់ ឲ្យនៅក្រៅឃុំកាលពីថ្ងៃទី៧កុម្ភៈ។ សម្រាប់លោកនាយករដ្ឋមន្ត្រី ការសម្រេចបែបនេះគឺជារឿងអយុត្តិធម៌មួយដែលមិនអាចទទួលយកបាន។
ថ្លែងក្នុងពិធីចែកសញ្ញាបត្រដល់និស្សិតនៃសាកលវិទ្យាល័យធនធានមនុស្សនៅថ្ងៃអង្គារទី ១៧ កុម្ភៈនេះ ប្រមុខរដ្ឋាភិបាលបានអះអាងថា ការលើកហេតុផលសុខភាពមកសំអាងដើម្បីដោះលែងជនសង្ស័យក្នុងសំណុំរឿងព្រហ្មទណ្ឌដ៏ធំមួយគឺជាហេតុផលរាក់កំផែល។ លោក ហ៊ុន សែន បានស្នើសុំឲ្យឧត្តមក្រុមប្រឹក្សានៃអង្គចៅក្រមធ្វើអធិការកិច្ចជាបន្ទាន់ទៅលើសំណុំរឿងនេះ។
ប្រតិកម្មជាសាធារណៈរបស់លោកនាយករដ្ឋមន្ត្រីបានធ្វើឡើងភ្លាមៗបន្ទាប់ពីសមត្ថកិច្ចបានចាប់ខ្លួនលោកថោង ចំរើន និងលោកស្រី កែវ សារី បញ្ជូនទៅតុលាការវិញកាលពីយប់ថ្ងៃទី ១៥ កុម្ភៈខណៈដែលអ្នកទាំងពីរកំពុងធ្វើដំណើរទៅកាន់ប្រទេសវៀតណាម។ សាលាដំបូងរាជធានីភ្នំពេញក៏បានចេញដីកានៅរសៀលថ្ងៃចន្ទទី ១៦ កុម្ភៈបង្គាប់ឲ្យឃុំខ្លួនឳពុកម្តាយលោកឧកញ៉ា ថោង សារ៉ាត់ នៅក្នុងពន្ធនាគារព្រៃសវិញក្រោមបទចោទប្រកាន់ថាបានប្រើប្រាស់អាវុធខុសច្បាប់។
គួររម្លឹកថា ករណីឃាតកម្មទៅលើឧកញ៉ា អ៊ឹង ម៉េងជឺ កាលពីថ្ងៃទី ២២វិច្ឆិកាឆ្នាំ ២០១៤ កណ្តាលទីក្រុងភ្នំពេញគឺជាសំណុំរឿងឃាតកម្មដ៏ធំមួយដែលធ្វើឲ្យរញ្ជួយពាសពេញទីក្រុង។ ក្រោយមក ឧកញ៉ាថោង សារ៉ាត់ ម្ចាស់ បូរី ៩៩៩ ត្រូវបានសមត្ថកិច្ចស្វែងរកចាប់ខ្លួនពីបទថាបានបញ្ជាឲ្យកងអង្គរក្សបាញ់សម្លាប់ជនរងគ្រោះ។ អង្គរក្សឧកញ៉ារូបនេះ ៤នាក់ត្រូវបានចាប់ខ្លួនខណៈដែលឧកញ៉ាថោង សារ៉ាត់បានគេចខ្លួនបាត់ស្រមោល។ ឪពុកម្តាយរបស់ឧកញ៉ារូបនេះត្រូវបានចាប់ខ្លួនបន្ទាប់ពីសមត្ថកិច្ចឆែកឆេរហើយរកឃើញអាវុធជាច្រើនដើមដែលលាក់ទុកក្នុងផ្ទះ។
តាមរយៈឃ្លីបវីដេអូដែលត្រូវបានបង្ហោះតាមបណ្តាញសង្គម លោកថោង សារ៉ាត់ ដែលបានអះអាងថាត្រូវបានគេទម្លាក់កំហុសដាក់នោះបានសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ឲ្យជួយរកយុត្តិធម៌។ ប៉ុន្តែ អន្តរាគមន៍របស់លោកនាយករដ្ឋមន្ត្រីពេលនេះគឺមិនមែនដើម្បីជួយឧកញ៉ាថោង សារ៉ាត់ឲ្យរួចផុតពីការចោទប្រកាន់នោះឡើយ តែវាជាការដាក់បន្ទុកច្រើនជាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ