តុលាការអេស្ប៉ាញដោះលែងក្រោមលក្ខខណ្ឌអ្នកនិពន្ធអាល្លឺម៉ង់ដើមកំណើតតួកគីមួយរូប
តុលាការអេស្ប៉ាញបានដោះលែងអ្នកនិពន្ធអាល្លឺម៉ង់ដើមកំណើតតួកគីមួយរូបអោយមានសេរីភាព នៅថ្ងៃអាទិត្យ២០សីហានេះ ដោយដាក់លក្ខខណ្ឌអោយគាត់ស្ថិតនៅតែក្នុងទីក្រុងម៉ាឌ្រីដ។ អ្នកនិពន្ធរូបនេះ ឈ្មោះថា Dogan Akhanli ត្រូវបានប៉ូលិសអេស្ប៉ាញចាប់ខ្លួន កាលពីថ្ងៃសៅរ៍ តាមការស្នើសុំរបស់អាជ្ញាធរតួកគី។ អាល្លឺម៉ង់ទាមទារអោយអេស្ប៉ាញកុំបញ្ជូនលោកអាខាន់លីទៅអោយតួកគីអោយសោះ។
ចុះផ្សាយនៅថ្ងៃ៖ កែប្រែថ្ងៃទី៖
លោក Dogan Akhanli ជាអ្នកនិពន្ធអាល្លឺម៉ង់ ដើមកំណើតតួកគី ត្រូវបានប៉ូលិសអេស្ប៉ាញចាប់ខ្លួន កាលពីថ្ងៃសៅរ៍ ក្នុងទឹកដីអេស្ប៉ាញ ស្របតាមសំណើរបស់តួកគី។ តួកគីបានសុំអោយប៉ូលិសអាំងទែរប៉ូល ចេញដីកាចាប់ខ្លួនអ្នកនិពន្ធអាខាន់លី។ ថ្ងៃអាទិត្យនេះ លោកអាខាន់លី ត្រូវបានតុលាការអេស្ប៉ាញដោះលែង ដោយដាក់ លក្ខខណ្ឌអោយលោកស្ថិតនៅតែក្នុងទីក្រុងម៉ាឌ្រីដ។ ក្នុងពេលនេះ តួកគីនឹងធ្វើសំណើសុំអោយអេស្ប៉ាញប្រគល់ខ្លួនអ្នកនិពន្ធដើមកំណើតតួកគីរូបនេះ ទៅអោយតួកគីវិញ។
យោងតាមមេធាវីរបស់អ្នកនិពន្ធអាខាន់លី ការចាប់ខ្លួនលោកអាខាន់លីកាលពីថ្ងៃសៅរ៍ គឺជាចេតនារបស់រដ្ឋាភិបាលតួកគី ដែលចង់វាយប្រហារក្រុមរិះគន់ នៅក្រៅប្រទេស។ អ្នកនិពន្ធអាខាន់លី អាយុ៦០ឆ្នាំ ធ្លាប់ជាប់ឃុំនៅតួកគី ក្នុងទស្សវត្សឆ្នាំ១៩៨០ ពីបទធ្វើសកម្មភាពប្រឆាំង ពិសេសដោយសារតែលោកបានគ្រប់គ្រងសារពត៌មានឆ្វេងនិយមមួយ។ លោកបានភៀសខ្លួនពីតួកគីឆ្នាំ១៩៩១ ហើយបានមករស់នៅទីក្រុងកូឡូញ ប្រទេសអាល្លឺម៉ង់។ ខាងតួកគីវិញប្រាប់ថា លោកអាខាន់លី ជាប់សង្ស័យថា ពាក់ព័ន្ធនឹងការលួចប្រដាប់អាវុធមួយ ក្នុងឆ្នាំ១៩៨៩។ លោកត្រូវបានចាប់ខ្លួន នៅឆ្នាំ២០១០ នៅអ៊ីស្តង់ប៊ូល មុននឹងត្រូវដោះលែងវិញ រួចហើយត្រូវបានតួកគីសម្រេចថា គ្មានទោស។ ប៉ុន្តែ ក្រោយមកក៏មាននិតិវិធីប្រឆាំងរូបលោកម្តងទៀត។ តំណាងរាស្ត្រអាល្លឺម៉ង់មួយចំនួនលើកឡើងថា ការតាមប្រមាញ់លោកអាខាន់លី គឺជារឿង នយោបាយ។ អ្នកតំណាងក្រសួងការបរទេសអាល្លឹម៉ង់មួយរូប ប្រាប់ថា អាល្លឺម៉ង់នឹងទាក់ទងអាជ្ញាធរអេស្ប៉ាញ សុំអោយអាល្លឺម៉ង់បានអន្តរាគមន៍ក្នុងរឿងអ្នកនិពន្ធអាខាន់លី ដែលមានសញ្ជាតិអាល្លឺម៉ង់នេះដែរ។ អាល្លឺម៉ង់នឹងរារាំងមិនអោយតួកគីសម្រេចបំណងអោយអេស្ប៉ាញប្រគល់ខ្លួនអ្នកនិពន្ធរូបនេះទៅអោយតួកគីវិញទេ។
ទំនាក់ទំនងអាល្លឺម៉ង់និងតួកគីមានភាពតានតឹងនឹងគ្នា តាំងពីតួកគីធ្វើការបង្ក្រាបក្រុមបះបោររដ្ឋប្រហារថ្ងៃ១៥កក្កដាមក។ សព្វថ្ងៃនេះ មានពលរដ្ឋអាល្លឺម៉ង់១០នាក់ ក្នុងនោះមានអ្នកមានសញ្ជាតិអាល្លឺម៉ង់តួកគីផងដែរ កំពុងជាប់ឃុំក្នុងទឹកដីតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ