បង់ក្លាដែស ចាប់ខ្លួនជនអ៊ីស្លាមជ្រុលនិយម ពាក់ព័ន្ធការវាយប្រហារសម្លាប់មនុស្ស
កងកម្លាំងប៉ូលិសបង់ក្លាដែស បានចាប់ខ្លួនជនសង្ស័យម្នាក់ ដែលជាជនអ៊ីស្លាមជ្រុលនិយម ពាក់ព័ន្ធនឹងការវាយប្រហារមួយនាឆ្នាំ ២០១៦ ក្នុងទីក្រុងដាកា ដែលបានសម្លាប់ចំណាប់ខ្មាំងចំនួន ២២ នាក់ ដែលក្នុងនោះមានទាំងជនបរទេសចំនួន ១៨ នាក់ទៀតផង។ នេះបើតាម មន្ត្រីប៉ូលិសជាន់ខ្ពស់បង់ក្លាដែសមួយរូប ឲ្យដឹងនៅថ្ងៃអាទិត្យ ទី ២០ មករា នេះ។
ចុះផ្សាយនៅថ្ងៃ៖ កែប្រែថ្ងៃទី៖
អ្នកនាំពាក្យនៃកងកម្លាំងរហ័សប្រយុទ្ធប្រឆាំងនឹងក្រុមអ៊ីឥស្លាមនិយមបង់ក្លាដែស បាននិយាយថា បុរសដែលជាជនសង្ស័យមានអាយុ ៣០ ឆ្នាំនេះ ហើយត្រូវបានចាប់ខ្លួនខណៈពេលដែលធ្វើដំណើរតាមរថយន្តក្រុង នៅខាងក្រៅរដ្ឋធានីដាកា។
មួយវិញទៀត បើតាមមន្ត្រីប៉ូលិសបង់ក្លាដែស ជនសង្ស័យវ័យ៣០ ឈ្មោះ Mamunur Rashid ត្រូវចាប់ខ្លួន ក្រោមបទសង្ស័យថា បានផ្តល់ថវិកា អាវុធយុទ្ធភ័ណ្ឌ និងរំសេវផ្ទុះសម្រាប់ការវាយប្រហារ កាលពីឆ្នាំ២០១៦ កន្លងទៅ។ មិនតែប៉ុណ្ណោះ គេជឿថា លោក Rashid ក៏ជាបុគ្គលសំខាន់មួយរូបផងដែរ ដែលបានសម្រេចចិត្ត និងរៀបចំដំណើរវាយប្រហារ ដ៏ល្បីកក្រើកពាសពេញប្រទេសបង់ក្លាដែស ហើយដែលបានសម្លាប់មនុស្ស២២ នាក់កាលណោះ។
គួរជ្រាបទៀតថា ជនសង្ស័យ Rashid គឺជាអតីតប្រតិបត្តិករកុំព្យូទ័រម្នាក់ ហើយក៏មានជាប់សង្ស័យនឹងករណីវាយប្រហារមួយផ្សេងទៀតផងដែរ។ ប៉ូលីសបង់ក្លាដែស បានអះអាងថា លោក Rashid អាចជាអ្នកលួចផ្តល់ព័ត៌មានសំខាន់នានា ដល់ពួកអ៊ីស្លាមជ្រុលនិយមបង់ក្លដែស ដើម្បីអាចវាយប្រហារសម្លាប់ ជនជាតិភាគតិចជាច្រើននាក់ នៅភាគខាងជើងរបស់ប្រទេសនៅគ្រាកន្លងមកផងដែរ។
សូមជម្រាបជូនថា ការវាយប្រហារដោយហឹង្សា ឧស្សាហ៍កើតមានញឹកញាប់ណាស់ក្នុងប្រទេសបង់ក្លាដែស បើរាប់ចាប់តាំងពីឆ្នាំ២០១៣ មក។ ពួកអ៊ីស្លាមជ្រុលនិយមបង់ក្លាដែស តែងតែប៉ងវាយប្រហារ ទៅលើក្រុមអ្នកដែលប្រឆាំងនឹងនិន្នាការរបស់ពួកគេ ដូចជា ក្រុមអ្នកនិពន្ធ សកម្មជនសិទ្ធិមនុស្ស អ្នកស្រលាញ់ភេទដូចគ្នា ជនបរទេស និងជនជាតិភាគតិចជាដើម។
ឆ្លើយតបនឹងបញ្ហានេះដែរ រដ្ឋាភិបាលបង់ក្លាដែស បាននិងកំពុងចាត់វិធានការបង្ក្រាបយ៉ាងសកម្មនៅទូទាំងប្រទេស ប្រឆាំងទៅនឹងក្រុមអ៊ីស្លាមជ្រុលនិយមទាំងឡាយ ដែលបានបង្កជាភាពវឹកវរ និងអន្តិសុខនៅក្នុងប្រទេសនៅគ្រាកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ